Pathanjali YOGA DUBAI

#പ്രമേഹം/മധുമേഹം
#സത്യവും #മിഥ്യയും

നമ്മുടെ ശരീരത്തിനു വളരെ ആവശ്യമുള്ള വസ്തുവാണ് ഗ്ലൂക്കോസ്. നാം കഴിക്കുന്ന ഭക്ഷണം പ്രധാനമായും ഗ്ലൂക്കോസ് ആയി മാറിയാണ് ശരീരത്തിന്‍റെ ഊര്‍ജ ആവശ്യങ്ങള്‍ക്ക് ഉപയോഗിക്കപ്പെടുന്നത്. ചില പ്രത്യേക സാഹചര്യങ്ങളില്‍ ഈ ഗ്ലൂക്കോസിന് നമ്മുടെ ശരീരത്തിലെ കോശങ്ങളില്‍ കയറിക്കൂടാന്‍ സാധിക്കാതെ വരാം. തുടര്‍ന്ന് കോശങ്ങള്‍ക്ക് ഗ്ലൂക്കോസ് ലഭിക്കാതെ അവ പട്ടിണി ആകും. ശരീരം നിര്‍മിച്ച ഗ്ലൂക്കോസ് ആകട്ടെ, ഗതി കിട്ടാതെ രക്തത്തില്‍ കറങ്ങി നടക്കുകയും ചെയ്യും. ഇതാണ് പ്രമേഹം.
പഞ്ചസാര രക്തത്തിൽ കൂടിയാൽ രക്തത്തിന് കട്ടി കൂടും. ഇത് അപകടമായതുകൊണ്ട് വൃക്കകള്‍ ഈ ഗ്ലൂക്കോസിനെ മൂത്രത്തില്‍ പുറം കൂടി തള്ളുകയും ചെയ്യും. അതുകൊണ്ടാണ് പ്രമേഹ രോഗിയുടെ മൂത്രത്തില്‍ പഞ്ചസാര കാണപ്പെടുന്നത്. പ്രമേഹമെന്നത് (ഡയബറ്റിസ് മെലിറ്റസ്) ഒരൊറ്റ രോഗമല്ല. ശരീരത്തിലെ ഒരു പ്രധാന പ്രവർത്തനമായ ഗ്ലൂക്കോസ്‌ വിന്യാസം കൃത്യമായി നടക്കാതെ വരികയും അതേ തുടർന്ന്‌ വിവിധ അവയവങ്ങളുടെ സ്വാഭാവികധർമ്മങ്ങൾ അപര്യാപ്‌തവുമാകുന്ന അവസ്‌ഥയാണ്‌ പ്രമേഹം.

രക്തത്തിലെ ഗ്ലൂക്കോസിന്റെ അളവ് പ്രധാനമായും നിയന്ത്രിക്കുന്നത് ഇൻസുലിൻ, ഗ്ലൂക്കഗോൺ തുടങ്ങിയ ആഗ്നേയഗ്രന്ഥിയിൽ ഉത്പാദിപ്പിക്കുന്ന ഹോർമോണുകളുടെ പ്രവർത്തനത്തിലുള്ള ബാലൻസിങ്ങ് വഴിയാണ്. ഇൻസുലിന്റെ ഉത്പാദനത്തിലും പ്രവർത്തനത്തിലും വ്യതിയാനം വരുന്നത് ഗ്ലൂക്കോസ് അളവിൽ ഏറ്റക്കുറച്ചിലുണ്ടാക്കും. ഇൻസുലിന്റെ ഉത്പാദനത്തിലെ കുറവ്, ഇൻസുലിൻ റെസിസ്റ്റൻസ് തുടങ്ങി പല കാരണങ്ങൾ മൂലം പ്രമേഹമുണ്ടാകാം.

ഒരു വശത്ത് ഒരാനയും മറുവശത്ത് നാലഞ്ചു മല്ലന്മാരും നിന്ന് വടം വലി മത്സരം നടത്തുന്ന ഒരു വിനോദം കണ്ടു കാണുമല്ലോ. ഒരു വശത്ത് ഇൻസുലിൻ എന്ന ആനയും മറുവശത്ത് ഗ്ലൂക്കഗോൺ, അഡ്രിനാലിൻ, നോർ-അഡ്രിനാലിൻ തുടങ്ങിയ മല്ലന്മാരും എന്നു വെക്കുക. ഗ്ലൂക്കോസ് അടക്കമുള്ള ഊർജ്ജസ്രോതസ്സുകളുടെ യുക്തമായ ഉപയോഗത്തിലൂടെയും കോശങ്ങളിൽ ശേഖരിച്ചു വെക്കുന്നതിലൂടെയും ഷുഗറിന്റെ രക്തത്തിലെ അളവ് കുറക്കുവാൻ ആന ഒരു വശത്തേക്ക് വടം വലിക്കുന്നു. മറുവശത്ത് നിൽക്കുന്നവർ ശേഖരിച്ചു വെച്ചതിൽ നിന്ന് രക്തത്തിലേക്ക് ഗ്ലൂക്കോസ് എത്തിച്ച് ഷുഗറിന്റെ അളവ് കൂട്ടുന്നു. ഈ വടംവലിയിൽ ആരും ജയിക്കുന്നില്ല. ശരീരത്തിന്റെ ആവശ്യം അനുസരിച്ച് ആനയും മല്ലന്മാരും മേൽക്കൈ നേടും. സകലം സ്വസ്ഥം, ഭദ്രം.

എന്നാൽ പ്രമേഹത്തിൽ ഈ അവസ്ഥ അട്ടിമറിക്കപ്പെടുന്നു. പാൻക്രിയാസ് എന്ന ചെറുകുടലിന്റെ വളവിലുള്ള ഗ്രന്ഥിയിലെ ബീറ്റാ കോശങ്ങളാണ് ഇൻസുലിൻ ഉത്പാദിപ്പിക്കുന്നത്. ബീറ്റാ കോശങ്ങളിൽ നിന്നും ആവശ്യത്തിന് ഇൻസുലിൻ ഉത്പാദിക്കപ്പെടാത്തതും (Type 1) ഉത്പാദിക്കപ്പെടുന്ന ഇൻസുലിനോട് കോശങ്ങൾ പ്രതികരിക്കാത്തതും (ഇൻസുലിൻ നിസ്സംഗത - Insulin Resistance- Type II) പ്രമേഹത്തിന് വഴി തെളിക്കുന്നു.

കൂടുതൽ വെള്ളം കുടിച്ചകൊണ്ട് രക്തത്തിലെ ഷുഗർ ലെവൽ കുറയുന്നില്ല, ശരീരത്തിന് താങ്ങാനാവാത്ത അളവിൽ രക്തത്തിൽ പഞ്ചസാര ഉണ്ടെങ്കിൽ നമ്മൾ ഒന്നും ചെയ്യാതെ തന്നെ ശരീരം അത് മൂത്രത്തിൽ കൂടി പുറംതള്ളും. ദാഹം മൂലം നാം കൂടുതൽ വെള്ളം കുടിക്കുകയും ചെയ്യും. എന്നാൽ ഇതുകൊണ്ട് പ്രമേഹരോഗം പരിഹരിക്കപ്പെടുകയില്ല. ശരീരത്തിന് വളരെ ആവശ്യമുള്ള ഇന്ധനമായ പഞ്ചസാരയാണ് മൂത്രത്തിൽ നഷ്ടപ്പെടുന്നത്. ഇതുമൂലം ശരീരം മെലിയുകയും പൊതുവായ ആരോഗ്യം മോശമാകുകയും വൃക്കകളുടെ പ്രവർത്തനഭാരം വർദ്ധിക്കുകയും ചെയ്യും. ശരീരത്തിന് ആവശ്യമുള്ള ജലാംശവും ലവണങ്ങളും മൂത്രത്തിൽ കൂടി നഷ്ടപ്പെടുകയും ചെയ്യും. ഇത്രയൊക്കെ സംഭവിച്ചാൽപ്പോലും രക്തത്തിലെ പഞ്ചസാര സാധാരണ നിലയിൽ എത്തിക്കാൻ വൃക്കകൾക്ക് സാധിക്കുകയുമില്ല.

പ്രമേഹം ഉണ്ടോ എന്നറിയാന്‍ മാത്രമല്ല നാം ഒരാളുടെ രക്തത്തിലെ പഞ്ചസാരയുടെ അളവ് പരിശോധിക്കുന്നത്. പ്രമേഹം മൂലം രക്തക്കുഴലുകള്‍, വൃക്കകൾ, കണ്ണുകള്‍, ഹൃദയം, നാഡികള്‍, തലച്ചോര്‍ എന്നീ അവയവങ്ങള്‍ക്കൊക്കെ തകരാറുകള്‍ സംഭവിക്കാം. ഈ തകരാറുകളാണ് ഒരു പ്രമേഹ രോഗിയുടെ ജീവിതം ദുഷ്കരമാക്കുന്നത്. ജീവിത ശൈലിയിലെ മാറ്റവും കൃത്യമായ തോതില്‍ മരുന്നുകളും ഉപയോഗിച്ച് രക്തത്തിലെ പഞ്ചസാരയെ പരിധിക്കുള്ളിൽ നിര്‍ത്തിയില്ലെങ്കില്‍ അത് ആന്തരാവയവങ്ങളെ തകരാറിലാക്കും. പ്രമേഹത്തിന്റെ നില എത്രയെന്നറിയാനും കൂടിയാണ് പരിശോധനകൾ ചെയ്യുന്നത്.

കൂടുതൽ കൃത്യതയും വ്യക്തതയുമുള്ള ടെസ്റ്റുകൾ വരുമ്പോൾ പഴമയുടെ പോകേണ്ട കാര്യമില്ലല്ലോ. മൂത്ര പരിശോധനയിലെ നിറവ്യത്യാസം നോക്കി ശരീരത്തിലെ പഞ്ചസാരയെ കുറിച്ചെകദേശ ധാരണ ഉണ്ടാക്കുവാൻ മാത്രമേ പണ്ട് സാധിച്ചിരുന്നുള്ളൂ. എന്നാൽ ശാസ്ത്രത്തിന്റെ വളർച്ചകൊണ്ട് കൂടുതൽ കൃത്യമായി രക്തത്തിലെ ഗ്ലൂക്കോസ് നിർണ്ണയിക്കാനാവുന്നു.

രക്തത്തിലെ പഞ്ചസാരയുടെ അളവ് ഭക്ഷണം കഴിക്കാതെ രാവിലെ രക്തം പരിശോധിച്ചാല്‍ പഞ്ചസാര 126 നു മുകളില്‍ ഉണ്ടെങ്കിലാണ് പ്രമേഹം എന്നു പറയുന്നത്. 140 വരെ മരുന്ന് കഴിക്കണം എന്നില്ല. ഭക്ഷണം കഴിച്ച ശേഷം 200 നു മുകളില്‍ ഉണ്ടെങ്കിലും പ്രമേഹം ഉണ്ടെന്നു മനസ്സിലാക്കാം. ആരോഗ്യവാനായ ഒരാള്‍ക്ക് ഭക്ഷണത്തിനു മുന്‍പ് 110 നു താഴെ ആയിരിക്കണം പഞ്ചസാരയുടെ അളവ്. 110നും 126 നും ഇടയില്‍ ഉള്ളവര്‍ ഭാവിയില്‍ പ്രമേഹരോഗി ആകാന്‍ സാധ്യത ഏറെയാണ്‌. ഇത്തരക്കാര്‍ ജീവിത ശൈലിയില്‍ കര്‍ശന നിയന്ത്രണങ്ങള്‍ നടപ്പാക്കണം.

തലേന്ന് ഭക്ഷണം കഴിക്കാതെ ഡോക്ടറെ കാണുന്ന കൊണ്ട് കാര്യമില്ല. മൂന്ന് മാസത്തെ ഏകദേശ ഷുഗർ നിയന്ത്രണത്തെക്കുറിച്ച് അറിയാൻ ഉള്ള ടെസ്റ്റും ഉണ്ട്, HbA1C.

പ്രമേഹ രോഗം രക്തക്കുഴലുകളെ ബാധിക്കാന്‍ സാധ്യതയുണ്ട്. രക്തത്തില്‍ ഉയര്‍ന്നു നില്‍ക്കുന്ന പഞ്ചസാര മറ്റു കോശങ്ങളെയും മോശമായി ബാധിക്കും. പ്രമേഹ രോഗത്തില്‍ പട്ടിണി ആയ കോശങ്ങള്‍ രക്ഷപ്പെടാന്‍ പല വഴികളും തേടും. ഇതും ശരീരത്തിന്‍റെ ഉപാപചയ പ്രക്രിയയെ താളം തെറ്റിക്കും. പ്രമേഹം നിയന്ത്രിച്ചില്ലെങ്കിൽ കണ്ണ്, നാഡികൾ തുടങ്ങിയവക്കും കേടുപാടുകൾ സംഭവിക്കും. രക്തത്തിലെ ഉയർന്ന അളവിലുള്ള ഗ്ലൂക്കോസ് ചുവന്ന രക്താണുക്കളിലും മാറ്റങ്ങൾ സൃഷ്ടിക്കും. മുറിവുകൾ ഉണങ്ങാൻ കാലതാമസം നേരിടുക, ഹൃദ്രോഗത്തിനുള്ള ഉയർന്ന സാദ്ധ്യത, സ്ട്രോക്ക് പോലെയുള്ള അസുഖങ്ങൾക്ക് ഉയർന്ന സാദ്ധ്യത തുടങ്ങി ലൈംഗിക ശേഷിയിലെ വ്യതിയാനം വരെ നീണ്ട ഒരു ലിസ്റ്റുണ്ട്.

ഏതെങ്കിലും ഒരു അവയവത്തെ മാത്രം ബാധിക്കുന്ന ഒരു രോഗമല്ല പ്രമേഹം. പ്രമേഹരോഗം കണ്ടുപിടിക്കുന്നത് രോഗം ആരംഭിച്ച് വർഷങ്ങൾക്ക് ശേഷമായിരിക്കും. അപ്പോഴേക്ക് മറ്റ് അവയവങ്ങളെ ബാധിക്കാൻ തുടങ്ങിയിട്ടുണ്ടാകും. പുതുതായി രോഗം കണ്ടുപിടിക്കപ്പെട്ടവരിൽ 35% ആളുകൾക്കും എന്തെങ്കിലും ഒരു തരത്തിലുള്ള കോമ്പ്ലിക്കേഷനുകൾ ഉണ്ടായിരിക്കുമെന്നാണ് കണക്ക്.

പ്രമേഹത്തിനു വ്യായാമവും, മാനസിക വിശ്രമവും ആണ് ഏറ്റവും അത്യാവശ്യം. രക്തത്തിലെ മാലിന്യം വിയർപ്പിലൂടെ ആണ് പോകുന്നത് അതിനാൽ വിയർക്കുന്ന വ്യായാമങ്ങൾ പ്രമേഹത്തിന് വളരെ നല്ലതാണ്. യോഗ സൂര്യ നമസ്കാരം, മാനസിക വിശ്രമത്തിന് ശവാസനം, ധ്യാനം ഒക്കെ യാണ് ഏറ്റവും ഉത്തമം. ഒരു നല്ല യോഗ അധ്യാപകനെ കണ്ടു പരിശീലിച്ചാൽ 10 ദിവസം കൊണ്ട് നല്ല ഫലം കാണാവുന്നതാണ്. ഇത് ശാസ്ത്രീയമായി തെളിയിക്കപ്പെട്ടിട്ടുണ്ട്. ഓട്ടോ ഐമ്മ്യൂണിറ്റി യെ പ്രതിരോധിക്കാൻ യോഗയോളം മറ്റൊരു മാർഗം ഇല്ലെന്നുതന്നെ പറയാം....

9496332058, 8891139811
www.keralayoga.org

#പ്രണയാമ_ചിന്തകൾ....
ഒരു യോഗി തന്റെ ആയുസ്സ് നിര്ണ്ണയിക്കുന്നത് വര്‍ഷങ്ങളുടെ അടിസ്ഥാനത്തിൽ അല്ല മറിച്ചു ശ്വാസത്തിന്റെ എണ്ണം കൊണ്ടാണ്.
(സ്വാമി ശിവാനന്ദ)

ഒരു മിനിറ്റിൽ പതിനഞ്ചു തവണ ശ്വാസം എടുക്കുന്ന വ്യക്തി ഏകദേശം എഴുപത്തിയഞ്ച് വയസ്സ് വരെ ജീവിച്ചിരിക്കും എന്ന് പറയപ്പെടുന്നു.ഇത് പത്തിൽ താഴെ ആണെങ്കിൽ ആയുസ്സു നൂറ് വര്‍ഷം കടക്കുമെന്നും വേഗത്തിൽ ശ്വസിക്കുന്നവർ അൽപ്പായുസ്സുള്ളവർ ആകുമെന്നും പറയപ്പെടുന്നു.

നമ്മൾ ജനിച്ചപ്പോൾ മുതൽ ശ്വസന പ്രക്രിയ നാം അറിയാതെ തന്നെ നടന്നുകൊണ്ടിരിക്കുന്നു. അത് നാം ഉറങ്ങുമ്പോഴും ഉണർന്നിരിക്കുമ്പോഴും സ്വപ്നലോകത്തിലും ഒരു പ്രത്യേക താളത്തിൽ നടന്നുകൊണ്ടിരിക്കുന്നു.

അറിയാതെ എന്നാൽ ഇടമുറിയാതെ നടക്കുന്ന ഈ ശ്വസന പ്രക്രിയ നമ്മുടെ മനസ്സുമായി ഏറെ ബന്ധപ്പെട്ടു കിടക്കുന്നു.ഇതേ ശ്വസനപ്രക്രിയയിലൂടെ നമുക്ക് ബോധത്തിന്റെ വ്യത്യസ്ത തലത്തിലൂടെ സഞ്ചരിക്കാൻ കഴിയുന്നു.പൂര്‍ണ ബോധത്തോടെ ഉള്ള ശ്വാസത്തിനു നമ്മുടെ ഭൗതികവും മാനസികവും വൈകാരികവുമായ തലങ്ങളെ സ്വാധീനിക്കാൻ കഴിയുമെന്ന് ആചാര്യന്മാർ പറഞ്ഞിട്ടുണ്ട്.

അറിയാതെ ഉള്ള യാന്ത്രികമായ ശ്വസനത്തിൽ നിന്നും ബോധത്തോടെ ഉള്ള ശ്വസനം നമ്മെ വർത്തമാന കാലത്തിലേക്കു കൊണ്ടുവരുന്നു. ഭൂതകാലത്തിലും ഭാവികാലത്തിലും അലഞ്ഞു നടക്കുന്ന മനസ്സിനെ വർത്തമാനകാലത്തിന്റെ സത്യത്തിലേക്ക് ആനയിക്കുവാൻ ബോധപൂർണമായ ശ്വസനം സഹായിക്കുന്നു. ഇതു തന്നെ ആണ് ധ്യാനവും.

ശ്വാസത്തിന്റെ ഗതിവിഗതികളിൽ മാറ്റം വരുത്തി നമുക്ക് മനസ്സിന്റെ അവസ്ഥകളെ നിയന്ത്രിക്കാനാകും.
മറ്റൊരു തരത്തിൽ പറഞ്ഞാൽ മനസ്സിന്റെ ചലനങ്ങളുമായി ശ്വാസതാളം ഏറെ ബന്ധപ്പെട്ടു കിടക്കുന്നു. അതുകൊണ്ടു തന്നെ ശ്വാസതാളത്തിന്റെ ഗതിയിലൂടെ മനസിന്റെ താളവും മാറിമറിയുന്നു.

ശരീരത്തിലെ 72000 ഊർജ്ജചാലകങ്ങളിൽ ഇഡ പിഗംള സുഷുമ്ന എന്നീ മൂന്നു നാഡികൾ ആണ് ഊർജ്ജപ്രവാഹത്തിൽ സാരമായ പങ്കുവഹിക്കുന്നവ. മൂലാധാരചക്രത്തിൽ നിന്ന് തുടങ്ങി വലത്തേ നാസികയിൽ അവസാനിക്കുന്ന പിഗംളയും മൂലാധാരചക്രത്തിൽ നിന്ന് തുടങ്ങി ഇടത്തെ നാസികയിൽ അവസാനിക്കുന്ന ഇഡയും സൂര്യചന്ദ്രന്മാരുടെ ഊർജ്ജവുമായി ബന്ധപ്പെട്ടിരിക്കുന്നു.
നടുവിലുള്ള സുഷുമ്ന നാഡിയിലൂടെ സന്തുലിതമായ കുണ്ഡലിനി ഊർജ്ജപ്രവാഹവും നടക്കുന്നു.

ശരീരത്തിന്റെയും മനസിന്റെയും അവസ്ഥ അനുസരിച്ചു ശ്വാസം കൂടുതലായി ഏതെങ്കിലും ഒരു നാസികയിലൂടെ സഞ്ചരിക്കുന്നു. ഇത് ദിവസത്തിൽ പലതവണ ഇടതിൽ നിന്ന് വലതിലേക്കും തിരികെയും മാറുന്നു.
ഇഡ പിഗംള നാഡിയിലെ ഊർജ്ജപ്രവാഹം സന്തുലിതമാകുമ്പോൾ സുഷുമ്ന നാഡി ഉണരുകയും അതിലൂടെ ഊർജ്ജപ്രവാഹം അല്പസമയത്തേക്കെങ്കിലും നടക്കുകയും ചെയുന്നു.

യോഗാഭ്യാസത്തിന്റെ പ്രധാനമായ വിഷയമാണ് പ്രാണായാമം അഥവാ നിയന്ത്രണവിധേയമായ ശ്വാസോച്ഛ്വാസം. ഇതിൽ ബോധപൂർവ്വം നിയന്ത്രണങ്ങൾ പാലിച്ചുകൊണ്ടാണ് ഇവിടെ ശ്വാസോച്ഛ്വാസം നടത്തുന്നത്. ഇപ്രകാരം ആവശ്യമായ ഓക്സിജനും ഊർജ്ജവും ആഗിരണം ചെയ്യപ്പെടുന്നു. യോഗശാസ്ത്രപ്രകാരം മനോനിയന്ത്രണമില്ലായ്മ രോഗങ്ങളായി പരിണമിയ്ക്കുന്നു. മനസ്സും ശ്വാസവും പരസ്പരപൂരകങ്ങളാണ്. വികാരതീവ്രത മനസ്സിനെ വികലമാക്കുക വഴി ശ്വാസോച്ഛ്വാസത്തിന്റെ ഗതിവേഗതയേയും മാറ്റുന്നു. നിയന്ത്രണവിധേയമായ ശ്വാസോച്ഛ്വാസം പ്രാണായാമം കൊണ്ട് സാധ്യമാക്കുന്നു.

യോഗയിലൂടെ ശ്വാസകോശത്തെ പൂർണ സംഭരണ ശേഷിയിലെത്തിക്കുകയും, പ്രാണവായുവിന്റെ പ്രവാഹം പൂർണ്ണതയിൽ എത്തിച്ചു തലച്ചോറിന്റെ പ്രവർത്തനം ഉന്നതിയിലെത്തിക്കുകയും, അതിലൂടെ ചിന്തകൾ ഉയർച്ച പ്രാപിക്കുകയും ചെയ്യുന്നു. ശ്വാസനിയന്ത്രണ ത്തിലൂടെ വികാരനിയന്ത്രണം സാധ്യമാകുകയും ആത്മീയ ഉന്നതി പ്രാപ്തമാകുകയും ചെയ്യുന്നു.

ചുരുക്കത്തിൽ ശ്വാസനിയന്ത്രണം കൊണ്ട് ജീവിതത്തിൽ ശാരീരികമായും മാനസികമായും ഉണർച്ചയും ഉയർച്ചയും ഉണ്ടാകാനും അതുവഴി ജീവിതം ധന്യമാക്കാനും കഴിയുന്നു.

Patanjali College of Yoga
9388038880, 9388803300
http://www.patanjalicollegeofyoga.org