عبق Abak

نتيجة إستعمال زيت السدر ✨✅
الفرق واضح الشعرة قوات والفروة تعمرت و مزال بالمداومة تتعمر أكثر .

ماسك النيلة الزرقاء في 5 دقائق ✨
الوصفة :
ربع ملعقة صغيرة نيلة زرقاء حرة
مغرف صغيرة لايورت طبيعي
رشة ماء ورد ( اختياري)

نخلط مليح المكونات و نحطو فالوجه و الرقبة على بشرة نظيفة ( اغسلو ب صابون او غسول لي يوالمكم باه ديرو الماسك )

الفوائد :
ترطيب البشرة
إزالة آثار الشمس
تخفيف التصبغات
تفتيح البشرة

ياسر عندهم مفهوم غالط على العناية!!

وهاذي حاجة لاحظتها من خلال تعاملي مع العديد من الفئات بحكم طبيعة خدمتي.

كي نقولو العناية بالشعر ولا بالبشرة، يروح بالكم ديراكت لوحدة يا إما بشرتها فيها حبوب ولا تصبغات، حابة تفتح بشرتها، ولا شعرها ينسل وخفيف… المهم يكون كاين مشكل باه تبدأ تهتم وتدور على الحل.

وهاذي الحاجة في رأيي راهي غالطة.
علاه ما نكونوش متهليين في الحاجة من قبل، باه ما توصلش لمرحلة وين نوليو نحاولو نصلحوها؟

مثال بسيط: تلقى ناس بشرتهم صحية وشعرهم صحي، ومع ذلك العناية عندهم حاجة أساسية في يومهم. ما يستناوش حتى يبان المشكل باه يبدؤوا يهتمو." كيما تشوفو عند الأجانب مثلا"
بمعنى آخر، مش لازم تكون بشرتي مدمرة باه نعتني بيها، ولا شعري لازم يتساقط ولا يتقصف باه نولي نجري نحوس على الحل في أقرب وقت.
صحا تجيني وحدة تقولي: "أنا شعري غاثي، منسحقش نعتني بيه، مشي حابة يزيد يتعمر أكثر."
صحيح شعرك غاثي وكثيف، بصح العناية ماشي معناها راح تزيدو يتعمر أكثر. العناية راح تساعدك تحافظي عليه صحي، قوي، مرتب وفيه لمعة وحيوية.

وزيد، بحكم نمط حياتنا ونظامنا الغذائي لي مش دايماً يكون متنوع ومتوازن، مع التعرض للشمس، استعمال منتجات ما تناسبش البشرة أو الشعر، وقلة بعض العناصر الغذائية… كاين عوامل يقدرو يأثرو على مظهر البشرة والشعر وحيويتهم.
مثلاً تلقاي شعرك طويل وكثيف، بصح من التحت خفيف ولا الأطراف متقصفة.
ولا شعرك قصير وغاثي، بصح تلقايه متقصف وجاف.
ولا بشرتك ما فيهاش حبوب ولا تصبغات، بصح تلقايها باهتة وما فيهاش الـ glow والحيوية لي تحبيها.

ومخلص الكلام: العناية المستمرة مش لازم تكون عندك مشكلة باه تعالجيها، وإنما باش تحافظي على جمال وصحة بشرتك، شعرك وجسمك.
لأن الجسم والشعر والبشرة يتأثرو بعوامل كثيرة: الماكلة، أشعة الشمس، المنتجات المستعملة، نمط الحياة، وبعض النقص الغذائي… وحوايج ياسر.

العناية ماشي علاج لمشكل، العناية هي الطريقة لي نحافظو بيها على جمالنا قبل ما يولي مشكل. 🤍

بما أن البنات للبنات ! 🫧🎀

اعتبريها صدقة جارية عليك و أنصحينا من قلبك بأي برودوي skin Care او make-up لي صح صح فادك و مقدرتيش تستغناي عليه .

خلينا فالتعليقات اسمه و كيفاه استعملتيه 🙏🏻

كي شفت تفاعلكم فالمنشور الأخير و فرحتوني حبيت نفرحكم انا تاني 😍
شفتو هادي!! شونتيو راح نمدها لي كليون فيدال لي ديما يتفاعلو و يشريو من عندنا و تفرحهم منتوجاتنا
وجدت دي شونتيون ياسر صغار من المخمرية الجديدة باه تجربوها و تشوفوها قدامكم خير من الفوطو و مبعد إلا عجبتكم مرحبا ب صحاباتي متأكدة راح تعجبكم بإذن الله و مبعد خليولي تجربتكم معاها ف ليكومنتار بعدما تجربوها و تشموها ، و بالتأكيد نتقبل جميع الآراء .
لي مبعتلهمش متخافوش راه كاين مسابقة جاية نربحكم فاها 🥰.

قبل ما نهدر !
شوفولي جمال الباكاجينغ 😍

قلتلكم بلي كاين جديد لكن مع الاسف نظراا لوش تعرضنا من حرائق ما قدرنا نبارطاجيو والو حتى البيع حبسنا لفترة ، و مادام الحمد لله طفات الحرائق و الناس المتضررة وقفوا معاها و عوضوها نقولو الحمد لله و ربي يرحم جميع الموتى ان شاء الله الباقي كلش يتعوض بإذن الله ، المهم رانا رجعنا للعمل تدريجياا و حبينا نرجعوا بحاجة جديدة كيما العادة ، كاينة زبونة فيدال قتلي بشوي علينا قتلتينا بجديد !! 🙂😂
المهم هاي ليكم مخمرية الصورة تهدر وحدها ،نهدرو على جمال اللون ؟ و لا قوة الريحة ؟ ولا روعة الباكاجينغ؟ ولا منظر البريق لي تخليهولك في يدك تولي تبرقي من بعيد !! فوق هادا كامل تستعمل للتوريد خاصة في منطقة الرقبة راح نحطلكم مواضع الاستعمال لاحقاا.
هااا طلعولي البوست مادابيكم جام و كومونتار ما راح ينقص فيكم والو 🙂هااا ني نتعب والله 🥲🤭