GEZR جذر

اية الفرق بين الصابون الطبيعي والصابون المعمول من قواعد الجلسرين الجاهزة.

الصابون الطبيعي بيتعمل اما على البارد او على الساخن..بإضافة زيوت خام طبيعية مع الصودا بنسب معينه.

قواعد الجلسرين بتكون مواد شفافة مصنعة من مواد منظفه ومواد حافظة. بيتم تسييحها فى المايكرويف وإضافة الوان وزيت عطرى ليها وممكن بعض الاضافات التانيه.

قبل ما نشترى اى صابون طبيعي مهم نسأل ونتأكد هل الصابون دة مصنوع من قواعد جلسرين ولا مصنوع من زيوت خام على البارد او على الساخن.

قواعد الجلسرين بتبقى رخيصه وبالتالى تكلفة التصنيع بتبقى اقل.. على عكس الصابون الطبيعي الى تكلفه تصنيعة بتبقى اعلى بسبب الزيوت الخام.

Soap curing
أو مرحلة تعتيق الصابون

المرحلة دى بتستمر من ٤ ل٦ أسابيع بعد التصنيع مباشرة

الصابون لازم يتحط فى مكان جيد التهوية.

فى المرحلة دى اى مياة فى الصابون بتتبخر و الصلابه للبار بتزيد وروايح الزيوت العطرية بتبقى اوضح كل يوم.

دايما بنحسب نسبه معينه من الزيوت بتكون غالبا من ٥-٨% .النسبه دى بتكون زيوت حرة مش بتتصبن اسمها superfat أو الزيت الزائد/الإضافى

لو مفيش تهوية جيدة هنخاطر ان المياة الموجودة فى الصابون متتبخرش كويس وده هيسبب ان الزيت الإضافى الموجود فى البار هيتأكسد وهيظهر معانا على البار dos او dreaded orange spots

دى بتكون بقع لونها اصفر او برتقالى.. ومعناها ان البار (زنخ)..او الزيت الحر فى الصابون اتأكسد

الصابون بيفضل آمن برضه للاستخدام لكن الشكل العام بيبوظ وكمان بيأثر على ريحه الزيوت العطرية لان ريحه الزيت الى اتأكسد بتكون اقوى.

بنتغلب على المشكله دى بإننا نستخدم زيوت خام من مصادر موثوق فيها لان الزيوت المغشوشة بيكون فيها نسبه زيوت بالفعل مأكسدة ومزنخه ومش هتبان الا فى مرحله التعتيق

و لازم اننا نهتم نحط الصابون على ارفف جيدة التهوية لمدة من ٤ ل٦ اسابيع بعد التصنيع وقبل البيع

ولما تشترو صابون طبيعي يفضل انكو تحتفظو بيه فى مكان جاف ويكون جيد التهويه لان كل ما الصابون الطبيعي اتعتق كل ما كان أصلب وانعم ❤️❤️

ازاى نعتنى بالصابون الطبيعي ❤️❤️

الصابون الطبيعي غير الصابون الجاهز. لانه فيه نسبه كبيرة جدا من الجلسرين.

الجلسرين ناتج طبيعي من عمليه التصبن للزيوت الطبيعية وبيكون موجود فى كل الصابون الطبيعي.

عشان كدة مهم نحافظ على الصابونة على حامل الصابون يكون جاف و يكون بيخرج المياة منه اول بأول لان الجلسرين محب للمياة

فلو الصابونة فضلت فى مكان حواليه مياة بشكل مستمر دة هيخرج الجلسرين من الصابونه ويخليها طريه.

فالنصيحه رقم واحد هى انك تخلى الصابونه على حامل صابون كويس بيسمح ان الصابونة تجف بعد كل استعمال ❤️🥰🥰

مكونات كل صابونة 🥰❤️

عشان الجلد هو البوابة الى بتحمى الجسم كله لازم نحميه بمنتجات طبيعية و نبعد على اد ما نقدر عن المواد الكيماوية

والصابون هو اكتر حاجه بنستخدمها فى يومنا ومع أطفالنا

أغلب حالات تحسس الجلد والإكزيما والجفاف بسبب الصابون المصنع لأنه مش صابون.. هو مصنوع من مواد منظفة كيماوية بتضر الجلد والجسم

عشان كدة لازم نستخدم صابون طبيعي مصنوع من زيوت طبيعية بالكامل بدون قواعد جليسرين صناعية

للطلبات من رسائل الصفحة او على رقم الواتس آب على الصفحة

فيه عروض كتير للكميات و هدايا وعينات مع أول اوردر😍