DrRainee's Healthy Way

#স্মৰণীয়_দিন : কালি গুৱাহাটী প্ৰেচ ক্নাবত ’নিৰাময় ন্যাস’ৰ চতুৰ্থ বৰ্ষপূৰ্তি অনুষ্ঠানত উন্মোচন হোৱা ’ নিৰাময় স্বাস্থ্য’ মুখপত্ৰখনত মোৰ এটি লিখনি ’ টোপনি খতিও হ’ব পাৰে ৰোগৰ কাৰণ’ প্ৰকাশ হৈছে৷ অনুষ্ঠানটিত নেমকেয়াৰ হস্পিতেলৰ ডাঃ হিতেশ বৰুৱাকে ধৰি বহু কেইজন চিকিৎসক উপস্থিত আছিল৷ ইমান কেইজন গণ্য-মান্য ব্যক্তিৰ বহুমূলীয়া বক্তৃতাৰ মাজতে মোকো দুআষাৰমান ক’বলৈ সুযোগ দিয়াত নথৈ আনন্দিত হৈছো | নিৰাময় গোটে ৰক্তদান,দেহদান, বিনামূলীয়া চিকিৎসা সেৱা আদি সমাজ হিতকৰ কাম কৰি আহিছে৷ অনুষ্ঠানটোৰ সমুহ কৰ্মকৰ্তাক আন্তৰিক ধন্যবাদ জনালো মোক এইখিনি সন্মান দিয়া বাবে৷

#তিতাফুলৰ_ঔষধি_গুণ:- ফাগুন চ'তমহীয়া শুকান বতৰ বিভিন্ন ধৰণৰ ৰোগৰ কাৰক হৈ পৰে। এইসময়ত বতাহত নানা ধৰণৰ বীজাণুৰ উপস্থিতিয়ে নানান সংক্ৰমনজনীত ৰোগৰ সৃষ্টি কৰে। কাহ,জ্বৰ, চৰ্দি, বসন্ত ৰোগ আদি বিভিন্ন ধৰণৰ ৰোগে আমাক অশান্তি দিয়ে। তাতে বৰ্তমান সময়ত চাৰিওফালে কৰোনাৰ ( corona virus) আতংক। যিসকলৰ শৰীৰৰ ৰোগ প্ৰতিৰোধ ক্ষমতা তুলনামূলকভাৱে কম তেওঁলোক সততে যিকোনো ৰোগত আক্ৰান্ত হয়। বিশেষকৈ বয়সস্থ লোকসকল এইক্ষেত্ৰত অলপ সজাগ হোৱা উচিত। যিসকল ব্যক্তিৰ এলাৰ্জিৰ সমস্যা বা শ্বাস প্ৰশ্বাসজনীত সমস্যা আছে তেওঁলোকেও বহু ক্ষেত্ৰত সাৱধানতা অৱলম্বন কৰা উচিত। দেহৰ ৰোগ প্ৰতিৰোধ ক্ষমতা অটুট থাকিলে যিকোনো বেমাৰে আমাক সততে জুৰুলা কৰিব নোৱাৰে। গতিকে এইসময়ত আমি ঋতুজনীত ৰোগ প্ৰতিৰোধৰ বাবে আমাৰ শৰীৰৰ ৰোগ প্ৰতিৰোধ ক্ষমতা বৃদ্ধি কৰিবলৈ চেষ্টা কৰা উচিত। ইয়াৰ বাবে এইসময়ত উপলব্ধ বতৰৰ উপযোগী থলুৱা খাদ্যৰ সেৱন অতি উত্তম উপায়। তেনে এবিধ উপযোগী থলুৱা ঔষধি গছ হৈছে 'তিতাফুল'। ইয়াক তিতাবাহক, ৰঙা বাহক, বাহকা তিতা ইত্যাদি বিভিন্ন নামেৰে জনা যায়। আচলতে তিতাফুলৰ বিভিন্ন প্ৰজাতি আছে । কিছুমানৰ ফুলৰ ৰং অলপ বেলেগ আৰু কিছুমান বনৰীয়া প্ৰজাতিৰ। প্ৰাচীন আয়ুৰ্বেদ চিকিৎসা পদ্ধতিত এইবিধ ঔষধি গছ কফজনীত বিভিন্ন ৰোগত ব্যৱহাৰ হৈছিল। এতিয়াও অসমৰ গাঁৱে ভূঞে বিভিন্ন ৰোগৰ চিকিৎসাত তিতাফুল ব্যৱহাৰ হয়। উত্তৰ পূৰ্বাঞ্চলৰ বিভিন্ন জনগোষ্ঠীৰ পৰম্পৰাগত চিকিৎসা পদ্ধতিতো তিতাফুল ঔষধি হিচাবে ব্যৱহাৰ হয়। কেঁচা তিতাফুল ৰ'দত শুকুৱাই গোটেই বছৰৰ বাবে সংৰক্ষণ কৰিও ৰখা হয় যাতে প্ৰয়োজন সাপেক্ষে ইয়াক সেৱন কৰিব পাৰি। কেঁচা তিতাফুলতকৈ শুকান তিতাফুলৰ তিতা বা চোকটো কম যদিও গুণাগুণ একেই থাকে। সৰু সৰু আলুৰ লগত তিতাফুলৰ শুকান ভাজি, অমিতা আৰু খুদ চাউল দি বনোৱা তিতাফুলৰ খাৰ, বেঙেনা দি বনোৱা তিতাফুলৰ ভাজি আৰু তেনে বহুতো স্বাস্থ্যসন্মত ব্যঞ্জন আছে । এনেবোৰ ঔষধি ব্যঞ্জনে আমাৰ পৰম্পৰাগত খাদ্যসম্ভাৰক চহকী কৰি তোলাৰ উপৰিও আমাৰ স্বাস্থ্য ৰক্ষা আৰু ৰোগ প্ৰতিৰোধ আৰু নিৰাময়তো গুৰুত্বপূৰ্ণ ভুমিকা পালন কৰে। অতীজৰে পৰা এনেবোৰ ঔষধি খাদ্য সেৱন কৰি অহা হৈছে। সোৱাদত তিতা কিন্তু গুণত অমৃতসম মিঠা আমাৰ চিনাকি তিতাফুলৰ উপকাৰীতাসমূহ হৈছে-
🍀 বতৰ পৰিবৰ্তনৰ ফলত হোৱা কাহ,চৰ্দি , পানীলগা আদিত তিতাফুল খালে সুফল পোৱা যায়। ইয়াৰ উপৰিও ব্ৰংকাইটিছ, এজমা, যক্ষ্মা, নিউমনীয়া আৰু হাওঁফাওঁৰ বিভিন্ন ৰোগত তিতাফুল উপকাৰী। তিতাফুলৰ পাতো কফৰ মহৌষধ।
🍀তনচিলাইটিছ, ফেৰিনজাইটিছ আদি সমস্যাত ভোগা লোকৰ বাবেও তিতাফুল উপকাৰী । নহৰু জালুক দি ভাজি খালেও সুফল পোৱা যায়। নাইবা তিতাফুল খাৰ দি খালেও সুফল পোৱা যায়।
🍀তিতাফুল সেৱন কৰিলে তেজ পৰিষ্কাৰ হয়। বসন্ত ৰোগ, খৰ,খজুৱতি, এলাৰ্জি , ছালৰ বিভিন্ন ৰোগত তিতাফুল উপকাৰী। বেক্টেৰিয়ানাশক, ভেকুৰনাশক গুণ থকা বাবে সংক্ৰমনজনীত বিভিন্ন ৰোগত তিতাফুল উত্তম পথ্য।
🍀টাইফইড, মেলেৰিয়া আদি যিকোনো ধৰণৰ জ্বৰত তিতাফুল উত্তম পথ্য।
🍀তিতাফুলে লিভাৰৰ কাৰ্যক্ষমতা বৃদ্ধি কৰে আৰু অলাগতিয়াল বৰ্জিত পদাৰ্থ নিষ্কাশনত সহায় কৰে। সেয়েহে বিভিন্ন লিভাৰজনীত ৰোগত তিতাফুল উপকাৰী।
🍀 তিতাফুল ডায়েবেটিচ ৰোগীৰ বাবেও উপকাৰী। ডায়েবেটিচ ৰোগীয়ে মাজে সময়ে তিতাকেৰেলাৰ দৰে অন্য তিতা খাদ্যৰ নিচিনাকৈ তিতাফুল খাব পাৰে।
🍀 কলেষ্টৰলৰ সমস্যাতো তিতাফুল উপকাৰী।
🍀কৃমি পেলুৰ সমস্যাতো তিতাফুল উপকাৰী।
🍀🍀 ওপৰৰ কথাখিনিৰ পৰা এটাই কথা বুজা যায় যে প্ৰকৃতিৰ বুকুত উপলব্ধ এইবোৰ থলুৱা খাদ্যৰ অপৰিসীম ঔষধি গুণ আছে। ৰোগ প্ৰতিৰোধ আৰু নিৰাময়ৰ উপায় এইবোৰৰ মাজতেই লুকাই আছে। আমাৰ পূৰ্বপুৰুষ সকলে চিনাকি কৰি থৈ যোৱা এইবোৰ খাদ্য গ্ৰহণ কৰি থাকিলে নিশ্চয় বহু বেমাৰৰ পৰা আমি হাত সাৰি থাকিব পাৰিম।

#ডাঃ ৰেইনী দেৱী( আয়ুৰ্বেদিক চিকিৎসক)
BAMS ( GU)
গুৱাহাটী, ফোন- 7399114617

゚viralfollowersシ゚

সকলো সম্পদতকৈ শ্ৰেষ্ঠ হৈছে স্বাস্থ্য নামৰ পৰম সম্পদবিধ আৰু এটা পজিটিভ মন সকলো সুন্দৰ বস্তুতকৈ শ্ৰেষ্ঠ। সেয়ে সকলোৱে নিজৰ স্বাস্থ্যৰ যত্ন লওক আৰু পজিটিভ মনৰ গৰাকী হওক, জীৱন সুন্দৰ হওঁক

#স্বাস্থ্য_শিতান # #ফাগুন_মাহত_ল'ব লগা স্বাস্থ্যৰ যতন:- বাৰ মাহৰ ভিতৰত ফাগুনৰ এক সুকীয়া বৈশিষ্ট্য আছে। এইসময়ত জলবায়ুৰ যথেষ্ট পৰিৱৰ্তন হয়। পৰিবেশ শুকান হৈ পৰে, ফেৰফেৰীয়া বতাহ বলে, কেতিয়াবা ধুমুহাও হয়। সেয়েহে ফাগুনৰ বতাহজাকক 'ফাগুনৰ পছোৱা' বুলিও কোৱা হয়। কেৱল জলবায়ুতেই পৰিবৰ্তন নহয় ফাগুন মাহত আমাৰ মনবোৰো যেন সলনি হয়। বিশেষকৈ নৱযৌৱনাসকলৰ মনলৈ ফাগুনে যেন প্ৰেমৰ বীজ কঢ়িয়াই লৈ আনে । সেয়েহে কবিতা আৰু গানৰ ভাষাত কোৱা হয় 'মনলৈ ফাগুন আহে।' এই ফাগুন মাহতে উলহ মালহেৰে ৰঙৰ উৎসৱ 'ফাকুৱা' বা হোলী , শিৱৰাত্রী আদি উদযাপন কৰা হয়। এইবোৰ উৎসৱে আমাৰ মনলৈ আনন্দৰ জোৱাৰ লৈ আনে। আমাৰ বহুতৰে পছন্দৰ এই ফাগুন মাহতে কিন্তু বহু ৰোগ হোৱা দেখা যায়। কাৰণ এইসময়ত বতাহত ধোঁৱা, ধূলিকণা, ফুলৰ ৰেণু, শুং, জীৱ জন্তুৰ নোম, নানা ধৰণৰ বেক্টেৰিয়া, ভাইৰাছ আদি অণুজীৱ আদি মিহলি হৈ থাকে। যাৰ ফলত বেছিভাগ লোকেই কাহ, চৰ্দি, জ্বৰ, এলাৰ্জি, ছালৰ ৰোগ, বসন্ত ৰোগ, গেছ, বদ হজম, পেটৰ ৰোগ, ব্ৰংকাইটিছ, হাপানী আদিত ভোগে। যিসকলৰ ৰোগ প্ৰতিৰোধ ক্ষমতা কম তেওঁলোক সহজে এইবোৰ ৰোগত আক্ৰান্ত হয়। শিশু আৰু বৃদ্ধসকল সাধাৰণতে সোনকালে যিকোনো ৰোগৰ কৱলত পৰে। কিন্তু অলপ যত্ন ললে, ঋতু অনুযায়ী আহাৰ বিহাৰ কৰিলে, পথ্য অপথ্য মানি চলিলে আৰু অন্য কেতবোৰ নীতি নিয়ম মানি চলিলে আমি বহু পৰিমানে এনেবোৰ ৰোগৰ পৰা হাত সাৰি থাকিব পাৰো। আজিও গাঁৱলীয়া সমাজত এনে নীতি নিয়ম ,পৰম্পৰা মানি চলা হয় যিবোৰৰ বৈজ্ঞানিক ভিত্তি আছে। এই সময়ত উপলব্ধ কেতবোৰ ঔষধি দ্ৰব্যৰে আনায়সে আমি আমাৰ স্বাস্থ্যৰ যত্ন ল'ব পাৰো। ফাগুন মাহত ল'ব লগা তেনে কেইটামান যতন তলত উল্লেখ কৰা হৈছে।
🍀🍀 চাফ চিকুনতা তথা স্বাস্থ্য ৰক্ষাৰ নীতি নিয়ম পালন কৰাটো সকলোৰে কৰ্তব্য ও দায়িত্ব। এলাৰ্জিৰ সমস্যা , হাপানী, ব্ৰংকাইটিছ ,ছালৰ ৰোগ থকা লোকে ফাগুন মাহত বিশেষ সতৰ্কতা অৱলম্বন কৰা উচিত। নিজকে যিমান পাৰে ধূলি, বতাহ আদিৰ পৰা বচাই ৰাখক। বাহিৰত ওলাই গলে মাস্ক পৰিধান কৰক। ঘৰৰ চুক কোণ, চিলিং আদি চাফা কৰোতে নাক মুখত কাপোৰেৰে ভালকৈ ঢাকি লওক যাতে লেতেৰা ধূলি আদি নাকৰ ভিতৰত প্ৰৱেশ কৰিব নোৱাৰে। বীজাণুনাশক দ্ৰব্যৰে ঘৰৰ মজিয়া নিয়মিতভাৱে পৰিষ্কাৰ কৰি ৰাখক। ঘৰৰ চোফা, গাৰু, তোচক বা তুলি আদি মাজে মাজে ৰ'দাই থাকিলে বহু বীজাণু নাশ হয়। শিশুৰ কাপোৰ কানি ভালকৈ ধুই ৰ'দত দিয়া উচিত। নিম , তুলসী সিজোৱা পানীৰে মাজে সময়ে স্নান কৰক। নিমপাত ঘৰৰ চুকে কোণে ৰাখি দিব পাৰে কাৰণ নিমে বায়ুত থকা বিভিন্ন বেমাৰৰ বীজাণু নাশ কৰি বায়ু পৰিষ্কাৰ কৰে। ঘৰত নিমপাত এনেকৈ ৰাখিলে বসন্ত ৰোগ নহয় বুলি জনবিশ্বাস আছে যাৰ বৈজ্ঞানিক সত্যতা নথকা নহয়। ঘৰত এজোপা নিমগছ ৰুলে ই ঘৰৰ চৌহদৰ বায়ু পৰিষ্কাৰ কৰি ৰাখে।
🍀🍀 খাদ্য গ্ৰহণৰ ক্ষেত্ৰত কিছু সাৱধানতা অৱলম্বন কৰক। উৰহি, মাতিদাইল, কচু, ঔটেঙা, বৰালি মাছ ,বৰা চাউলৰ বস্তু যিমান পাৰে কমাই খাওক। ( কাৰণ এনেবোৰ খাদ্যৰ পৰাও বহু লোকৰ এলাৰ্জি হোৱা দেখা যায়)। মাজে মাজে নিমপাত, চিৰতা, তিতাফুল , ভেকুৰি তিতা , তিতা কেৰেলা, কলখাৰ আদি খাওক। তিতা আৰু খাৰে তেজ পৰিষ্কাৰ কৰে, জ্বৰ , কাহ, চৰ্দি, এলাৰ্জি, কফজনীত সমস্যা, ছালৰ ৰোগ, পেটৰ ৰোগ, কৃমিজনীত সমস্যা নিৰাময় কৰে। তিতাকেৰেলা, নিম আদিয়ে বসন্ত ৰোগ প্ৰতিৰোধ কৰে। ইয়াৰ উপৰিও এনেবোৰ ঔষধি দ্ৰব্যই লিভাৰৰ কাৰ্যক্ষমতা বৃদ্ধি কৰে আৰু শৰীৰৰ পৰা অলাগতিয়াল বৰ্জিত পদাৰ্থ নিষ্কাশন কৰি শৰীৰ শোধন কৰে। টেঙেচি, চুকা শাক, মধুসূলেং আদি টেঙা শাকৰ আঞ্জা খাব লাগে। এইবোৰে গ্ৰহণী, অতিসাৰ , পেটৰ কামোৰণি আদি পেটৰ অসুখ হোৱাত বাধা দিয়ে আৰু জণ্ডিচ, পেচাবৰ সংক্ৰমণ জনীত ৰোগ আদি প্ৰতিৰোধ কৰে। প্ৰচুৰ পৰিমাণে ভিটামিন চি থকাৰ বাবে শৰীৰৰ ৰোগ প্ৰতিৰোধ ক্ষমতা বৃদ্ধি কৰে
🍀🍀 ফাগুন মাহত হোৱা কেতবোৰ ৰোগ প্ৰতিৰোধ কৰিবলৈ আমি কেতবোৰ প্ৰাকৃতিক উপাদান ব্যৱহাৰ কৰিব পাৰো। সকলোৰে চিনাকি তেনে কেইবিধ ঔষধি দ্ৰব্যৰ সেৱন বিধি তলত উল্লেখ কৰা হ'ল।
🌺 তুলসী :- জীৱাণুনাশক, এলাৰ্জি প্ৰতিৰোধক , তেজ পৰিষ্কাৰক, কফ নাশক আদি গুণযুক্ত তুলসী পাতৰ সেৱনে আমাৰ শৰীৰৰ ৰোগ প্ৰতিৰোধ ক্ষমতা বৃদ্ধি কৰে। নিয়মিতভাৱে দুই তিনিখিলা কৈ তুলসী পাত সেৱন কৰিলে এইসময়ত হোৱা বহু ৰোগৰ পৰা হাত সাৰি থাকিব পাৰি। জ্বৰ, কাহ, এজমা আদি ৰোগতো তুলসী উপকাৰী। এনেবোৰ ৰোগত অন্য ঔষধিৰ লগত তুলসীৰ ব্যৱহাৰ কৰিলে সুফল পোৱা যায়।
🌺 আমলখি :- ভিটামিন চি, এন্টিঅক্সিডেন্ট আদিৰে ভৰপূৰ আমলখিয়ে শৰীৰৰ ৰোগ প্ৰতিৰোধ ক্ষমতা বৃদ্ধি কৰে , ছাল চুলিৰ সৌন্দৰ্য্য বৃদ্ধি কৰে, শৰীৰ শোধন কৰে আৰু বহু ৰোগ প্ৰতিৰোধ কৰে। নিয়মীয়াকৈ দুই তিনিটা আমলখি সেৱন কৰিলে বতৰ পৰিবৰ্তনৰ সময়ত হোৱা চৰ্দি,কাহ, এলাৰ্জি আদিৰ পৰা বাচি থাকিব পাৰি। আমলখিয়ে আমাক চিৰসেউজীয়া কৰিও ৰাখে অৰ্থাৎ দেহৰ যৌৱনাৱস্থা অটুট ৰখাত সহায় কৰে।
🌺 হালধি :- হালধিৰ অজস্ৰ গুণৰ কথা সকলোৱেই জানে। বিশেষকৈ এলাৰ্জিজনীত ৰোগ, ছালৰ ৰোগ, কফজনীত ৰোগ আদিত ইয়াৰ ব্যৱহাৰ চমকপ্ৰদ। হালধীয়ে তেজো পৰিষ্কাৰ কৰে যাৰ বাবে ছালৰ ৰোগত ই মহৌষধৰ কাম কৰে।কেঁচা হালধিৰ ৰস দুই চামুচ একাপ গাখীৰৰ লগত ৰাতিপুৱা সেৱন কৰিলে ই খুব সুন্দৰ ফল দিয়ে। কেঁচা হালধি নাপালে শুদ্ধ গুৰি হালধি এচামুছ এগিলাচ গাখীৰৰ লগত মিহলাই সেৱন কৰিলেও সুফল পোৱা যায়।
🌺 আদা :- আদাই হজমী শক্তি বৃদ্ধি কৰে , ভোক বঢ়ায় আৰু কফজনীত ৰোগ, পেটৰ ৰোগ আদিতো উপকাৰী। আদাৰ লগত অকণমান ক'লা নিমখ আৰু নেমুৰ ৰস দি ভোজন কৰাৰ আগত সেৱন কৰিলে পেটৰ ৰোগৰ পৰা হাত সাৰিব পাৰি। কফজনীত ৰোগতো আদাৰ ৰস, তুলসীৰ ৰস আৰু অন্যান্য ঔষধিৰ প্ৰয়োগ কৰিলে সুফল পোৱা যায়।
🌺 মৌজোল :- মৌ আমাৰ বাবে অমৃতসম। ৰোগ প্ৰতিৰোধ ক্ষমতা বৃদ্ধি কৰাৰ উপৰিও ই কাহ,চৰ্দি, এলাৰ্জি, হাপানী, ব্ৰংকাইটিছ আদি বহু ৰোগ নিৰাময় কৰে। নিয়মীয়াকৈ মৌজোল সেৱন কৰিলে ফাগুনত হোৱা বিভিন্ন ৰোগ প্ৰতিৰোধ ও নিৰাময় হয়। বিশেষকৈ ৰাতি শোৱাৰ সময়ত এচামুছ মৌ সেৱন কৰিলে বহু উপকৃত হোৱা দেখা যায়। তদুপৰি বিভিন্ন ৰোগত ঔষধিৰ লগত মৌক অনুপান হিচাবে সেৱন কৰিলে সুফল পোৱা যায়।
🌺 কেঁচা পিয়াজ :- কেঁচা পিয়াঁজ বৰ উপকাৰী বিশেষকৈ জ্বৰ,কাহ আদিত কেঁচা পিয়াঁজ খালে উপকাৰ পোৱা যায়। ই ৰোগ প্ৰতিৰোধ ক্ষমতা বৃদ্ধি কৰে, হৃদপিণ্ড সবল কৰে আৰু পেচাবৰ সংক্ৰমণ ৰোধ কৰে আৰু বহু ৰোগত উপকাৰী। কেঁচা পিয়াজ খালে মুখ গোন্ধায় বাবে ৰাতিৰ আহাৰৰ লগত গ্ৰহণ কৰিব পাৰে।
🌺নহৰু:- নহৰুয়ে বহু ৰোগ প্ৰতিৰোধ কৰে। বিশেষকৈ শৰীৰৰ ৰোগ প্ৰতিৰোধ ক্ষমতা বৃদ্ধি কৰাত সহায় কৰে, এলাৰ্জি, কফজনীত ৰোগ, ভাইৰাছ, বেক্টেৰিয়াজনীত ৰোগত সুফল দিয়ে। মাজে সময়ে নহৰু দুই তিনিফুটা গেছত সেকি বা কলপাতত সেকি খাব পাৰে।
🌺 দোৰোণ বন :- ফাগুন মাহত হোৱা যিকোনো ৰোগত দোৰোণ বন বৰ উপকাৰী। বিশেষকৈ তনচিলাইটিছ, চাইনাচাইটিছ, ফেৰিনজাইটিছ , পেটৰ সমস্যা , এলাৰ্জি, কফজনীত সমস্যা আদিত এই শাক উপকাৰী। নহৰু, জালুক দি কলপাতত সেকি নাইবা বইল কৰি পিতিকা হিচাবেও খাব পাৰি।
🌺 মানিমুনি :- দুয়োবিধ মানিমুনি বহু ৰোগৰ উত্তম পথ্য। শিশু আৰু বৃদ্ধ উভয়ে মানিমুনি শাকৰ আঞ্জা খালে বহু ৰোগ প্ৰতিৰোধ হয়। শৰীৰৰ ৰোগ প্ৰতিৰোধ ক্ষমতা বৃদ্ধিতো মানিমুনি উপকাৰী। মানিমুনিৰ জালুকীয়া আঞ্জাই শৰীৰত বল প্ৰদান কৰে।
🍀 ফাগুন মাহত ছাল, চুলি শুষ্ক হৈ পৰে । এই মাহত সহজলভ্য প্ৰাকৃতিক উপাদানেৰে ছাল চুলিৰ যত্ন ল'ব পাৰি। ছালৰ বাবে তেনে কেইবিধমান দিহা হৈছে :-
🌺 খাটি সৰিয়হ তেল বা অলিভ অইলেৰে দেহত মালিচ কৰি স্নান কৰিলে ছালৰ শুষ্কতা দূৰ হয়।
🍀মাহ হালধিৰে মুখমণ্ডল আৰু গা পৰিষ্কাৰ কৰিব পাৰে। এই মিশ্ৰণৰ গুণাগুণ বৃদ্ধি কৰিবলৈ মাহ হালধিৰ লগত, তুলসী, নিমপাত আদি দিও লব পাৰে।
☘️ বেচন, হালধি, দৈ মিহলাই পেক হিচাবে মুখত ব্যৱহাৰ কৰিব পাৰে।
☘️ মচুৰ দাইল ভালকৈ ধুই গাখীৰত তিয়াই লৈ তাৰ লগত ছালৰ প্ৰকাৰ অনুসৰি নিমপাত, হালধি আদি মিহলাই পেক হিচাবে ব্যৱহাৰ কৰিব পাৰে।
🍀চুলিৰ শুকান ভাব দূৰ কৰিবলৈ শ্বেম্পু কৰাৰ আগত তিল তেল, অলিভ অইল, নাৰিকল তেল আদি গৰম কৰি চুলিৰ গুৰিত মাচাজ কৰক। শুকান চুলিৰ গৰাকীয়ে মৌ মিহলি পানীৰে চুলিত কণ্ডিচনাৰ হিচাপে ব্যৱহাৰ কৰিব পাৰে। চুলি ফাটিলে চুলিৰ আগ অলপ কাটি দিব লাগে।
🌺🌺 শিশু আৰু বৃদ্ধ সকলৰ স্বাস্থ্যৰ যত্ন :- শিশুসকল আৰু বৃদ্ধ লোকে ঠাণ্ডা পানীৰ ব্যৱহাৰ, ঠাণ্ডা বতাহ , ধূলি আদিৰ পৰা যিমান পাৰে আঁতৰি থাকিব লাগে। তেওঁলোকৰ বাবে কুহুমীয়া পানীৰ ব্যৱহাৰ বেছি উপকাৰী। বেছিকৈ বতাহ বলা দিনকেইটাত শিশুসকলৰ বিশেষ যত্ন লওক। নৱজাতক আৰু কণ কণ শিশু সকলক ফাগুনৰ বতাহৰ পৰা বচাই ৰাখিব লাগে কাৰণ তেওঁলোকৰ ৰোগ প্ৰতিৰোধ ক্ষমতা কম হোৱা বাবে কফজনীত ৰোগ, পেটৰ ৰোগ আদিত ভোগাৰ সম্ভাৱনা থাকে। খাটি মিঠাতেল বা অলিভ অইলেৰে শৰীৰ মালিচ কৰি পুৱাৰ একেবাৰে কোমল ৰ'দটো কিছু সময় ল'ব পাৰিলে খুব ভাল। পুৱাৰ সূৰ্যৰ ৰশ্মি আমাৰ শৰীৰৰ বাবে খুব উপকাৰী। ই শৰীৰৰ ৰোগ প্ৰতিৰোধ ক্ষমতা বৃদ্ধি কৰে, দেহত বলৰ সঞ্চাৰ কৰে। লগতে এইসময়ত উপলব্ধ থলুৱা খাদ্য সামগ্ৰী গ্ৰহণ কৰিলে সকলো লোকেই নিৰোগী আৰু স্বাস্থ্যবান হৈ থাকিব পাৰে।

#ডাঃ ৰেইনী দেৱী ( আয়ুৰ্বেদিক চিকিৎসক)
BAMS ( GU)
গুৱাহাটী, ফোন -7399114617