Heavenly Home

നാട്ടറിവുകൾ
തുളസി
മിക്ക വീടുകളുടെയും തൊടിയിലും മുറ്റത്തുമെല്ലാം കാണപ്പെടുന്ന ഔഷധസസ്യമാണ് തുളസി. പല ആരോഗ്യ പ്രശ്നങ്ങളും ഭേദമാക്കാൻ തുളസി സഹായിക്കും. അതുകൊണ്ട് തന്നെ ആയുർവേദത്തിൽ തുളസിക്ക് ഒരു പ്രധാന സ്ഥാനമുണ്ട്. രോഗ പ്രതിരോധശേഷി മെച്ചപ്പെടുത്താനും പല തരത്തിലുള്ള ചർമ്മ രോഗങ്ങൾ സുഖപ്പെടുത്താനും തുളസി ഏറെ ഉത്തമമാണ്. ആന്റി ഓക്‌സിഡന്റ്, ആന്റിഫംഗൽ, ആന്റിസെപ്റ്റിക്, ആന്റി ബാക്റ്റീരിയൽ സവിശേഷതകൾ തുളസിയിലയിൽ ധാരാളമായി അടങ്ങിയിരിക്കുന്നു. വെറും വയറ്റിൽ കുറച്ച് തുളസിയില ചവയ്ക്കുന്നത് ജലദോഷം, പനി എന്നിവയിൽ നിന്ന് മുക്തി നേടാൻ നിങ്ങളെ സഹായിക്കും. 6-7 പുതിയ തുളസി ഇലകൾ ഒന്നോ രണ്ടോ ടീസ്പൂൺ പൊടിച്ച ഏലക്ക എന്നിവ അര ലിറ്റർ വെള്ളത്തിൽ കലർത്തി തിളപ്പിക്കുക. ഒരു ചെറിയ തീയിൽ വച്ച്, അതിന്റെ മൊത്തം അളവ് പകുതിയായി കുറയുന്നത് വരെ തിളപ്പിക്കണം. ആവശ്യമെങ്കിൽ, അതിൽ ഒരു ടേബിൾ സ്പൂൺ തേനോ പഞ്ചസാരയോ ചേർത്ത് രണ്ടോ മൂന്നോ മണിക്കൂർ കൂടുമ്പോൾ കുടിക്കുക. ഉണങ്ങിയ തുളസിയില പൊടിച്ച് പല്ല് തേച്ച് നോക്കിയിട്ടുണ്ടോ? വായ്നാറ്റം അകറ്റാൻ മാത്രമല്ല, മോണരോഗങ്ങൾ, പയോറിയ, മറ്റ് ദന്ത അണുബാധകൾ എന്നിവ തടയാനും ഇത് സഹായിക്കുന്നു. നല്ല ഫലങ്ങൾക്കായി തുളസി പൊടി കുറച്ച് തുള്ളി കടുകെണ്ണയുമായി കലർത്തുന്നതാണ് നല്ലത്. പല്ലുവേദന അകറ്റാനും തുളസി മികച്ചതാണ്. ഇതിനായി മൂന്ന് -നാല് തുളസി ഇലകൾ കഴുകിയ ശേഷം പേസ്റ്റ് രൂപത്തിൽ അരച്ചെടുക്കുക. ഇതിലേയ്ക്ക് അല്പം കുരുമുളക് പൊടി കൂടെ ചേർത്തിളക്കി പല്ലിന് മുകളിൽ പുരട്ടി കുറച്ച് മിനിറ്റ് വിടുക. വേദനയിൽ നിന്ന് ശാശ്വതമായ ആശ്വാസം ലഭിക്കുന്നതുവരെ ഇത് ദിവസത്തിൽ മൂന്ന് തവണ ചെയ്ത് നോക്കൂ. പൊള്ളൽ ഏറ്റതിന്റെ വേദന കുറയ്ക്കാൻ, ഒരു കോട്ടൺ പാഡോ വൃത്തിയുള്ള തുണിയോ ഉപയോഗിച്ച്, തുളസി നീര് തുല്യ അളവിൽ വെളിച്ചെണ്ണയിൽ കലർത്തി പൊള്ളലേറ്റ സ്ഥലത്ത് നേരിട്ട് പുരട്ടുക. ചൊറിച്ചിൽ നിന്ന് പെട്ടെന്ന് ആശ്വാസം ലഭിക്കാൻ, തുല്യ അളവിൽ തുളസി നീരും നാരങ്ങാനീരും കലർത്തുക. പ്രശ്ന ബാധിത പ്രദേശങ്ങളിൽ ഈ മിശ്രിതം നേരിട്ട് പ്രയോഗിക്കുക, സ്വാഭാവികമായി ഉണങ്ങാൻ അനുവദിക്കുക. തുളസിയുടെ ഏതാനും ചില സവിശേഷതകൾ മാത്രമാണ് ഇവിടെ പ്രതിപാദിച്ചിട്ടുള്ളത് . ഇതിനേക്കാൾ ഉപരിയായി ധാരാളം ഔഷധ ഗുണങ്ങൾ തുളസിക്കുള്ളതായി കണ്ടെത്തിയിട്ടുണ്ട് .

നാട്ടറിവുകൾ
മനുഷ്യൻറ്റെ എക്കാലത്തെയും അന്വേഷണ ത്വരയുടെ ഭാഗമാണ് ആരോഗ്യവും സൗന്ദര്യവും . നമുക്ക് കൈമോശം വന്നുപോയ ഏതാനും ഭക്ഷണ ചികിത്സാ രീതികളിലൂടെ ഉള്ള ഒരു യാത്രയാണ് നാട്ടറിവുകളിലൂടെ നാം നടത്തുന്നത് . ഏവർക്കും ഇത് ഉപകാരപ്രദമാകുമെന്ന് കരുതുന്നു