Brak Sonyta

"ស្រឡាញ់ខ្លួនឯង"
ជារឿយៗយើង តែងតែភ្លេចសម្លឹងមើលមនុស្សម្នាក់ដែលសំខាន់បំផុតនៅក្នុងជីវិត នោះគឺ "ខ្លួនយើង" មនុស្សជាច្រើនយល់ថា ការស្រលាញ់ខ្លួនឯងគឺជាភាពអាត្មានិយម ប៉ុន្តែការពិតទៅ វាគឺជាគ្រឹះដ៏រឹងមាំតែមួយគត់ ដែលអនុញ្ញាតឱ្យយើងមានកម្លាំងចិត្តទៅស្រលាញ់ និងមើលថែអ្នកដទៃបានកាន់តែល្អប្រសើរ។
ការស្រលាញ់ខ្លួនឯង មិនមែនមានន័យថាការទិញរបស់ថ្លៃៗ ឬការធ្វើខ្លួនឱ្យល្អឥតខ្ចោះគ្រប់ពេលនោះទេ ប៉ុន្តែវាគឺជាការរៀនយល់ចិត្តខ្លួនឯង ការផ្ដល់ឱកាសឱ្យខ្លួនឯងដើរខុសខ្លះៗ និងការចេះបត់បែនតាមស្ថានភាពជីវិតដោយក្ដីមេត្តា។
ក្នុងទីនេះសុវត្ថន៍នឹងនិយាយចំណុចខ្លះៗ មួយចំនួន ដើម្បីណែនាំជួយដាស់តឿនលោកអ្នកឱ្យចេះផ្តល់តម្លៃដល់ខ្លួនឯង និងរស់នៅក្នុងជីវិតដែលពោរពេញដោយសន្តិភាពផ្លូវចិត្ត ទោះបីជាលោកអ្នកមិនមែនជាមនុស្សដែលល្អឥតខ្ចោះក៏ដោយ...
១. ជីវិតមានទាំងរឿងល្អ និងរឿងអាក្រក់ — ហើយវាសុទ្ធតែមានតម្លៃដូចគ្នា
រឿងល្អធ្វើឱ្យអ្នកញញឹម រឿងអាក្រក់ធ្វើឱ្យអ្នកធំដឹងក្តី រាល់អ្វីដែលអ្នកបានជួប វាមិនមែនមកដើម្បីធ្វើបាបអ្នកទេ ប៉ុន្តែវាមកដើម្បីបង្រៀនឱ្យអ្នកយល់ពីជីវិត និងយល់ពីខ្លួនឯងកាន់តែច្បាស់។

២. ជ្រើសរើសនៅកន្លែងដែលមិនបឺតជញ្ជក់ថាមពលរបស់អ្នករហូតដល់រីងស្ងួត
មនុស្សខ្លះនៅក្បែរហើយគឺហត់នឿយបំផុត កន្លែងខ្លះនៅហើយមានអារម្មណ៍ថាធូរស្រាលក្នុងចិត្ត។ ត្រូវជ្រើសរើសនៅកន្លែងដែលផ្តល់កម្លាំងចិត្ត មិនមែនកន្លែងដែលបឺតយកពន្លឺចេញពីជីវិតអ្នកនោះទេ។

៣. គេងលក់ស្រួល = ជីវិតល្អ
កុំមើលងាយការគេង សាកល្បងអនុវត្តច្បាប់ ៣-២-១ ដូចខាងក្រោម
- ៣ ម៉ោងមុនគេង : ឈប់ញ៉ាំអ្វីទាំងអស់។
- ២ ម៉ោងមុនគេង : ឈប់ធ្វើការងារ។
- ១ ម៉ោងមុនគេង : ឈប់មើលអេក្រង់ទូរស័ព្ទ។
អ្នកនឹងដឹងថា ជីវិតពេលភ្ញាក់ពីគេងគឺខុសប្លែកគ្នាទាំងស្រុង។

៤. ធ្វើចលនារាងកាយខ្លះ មិនបាច់ពូកែទេ គ្រាន់តែធ្វើចលនាទៅបានហើយ
មិនចាំបាច់ទៅហាត់ប្រាណខ្លាំងៗ ឬរត់ម៉ារ៉ាតុងនោះទេ គ្រាន់តែដើរលេង យឺតសាច់ដុំ ឬបោសផ្ទះក៏គ្រប់គ្រាន់ដែរ រាងកាយនឹងបញ្ចេញសារធាតុរីករាយដោយខ្លួនឯង ដោយមិនបាច់ខំប្រឹងដេញតាមវាខ្លាំងពេក។

៥. ភាពខ្ជាប់ខ្ជួនឈ្នះភាពល្អឥតខ្ចោះ
មិនបាច់ធ្វើឱ្យល្អបំផុតរាល់ថ្ងៃនោះទេ គ្រាន់តែធ្វើ "ខ្លះ" ក៏ប្រសើរជាងមិនធ្វើសោះ។ កុំរង់ចាំថ្ងៃដែលអ្នក "ត្រៀមខ្លួនរួចរាល់" ព្រោះថ្ងៃនោះវាមិនមានពិតឡើយ។

៦. សុខភាពល្អមិនមែនជារឿង "មានពេលវេលា" ទេ — ប៉ុន្តែវាគឺជា "ការជ្រើសរើស"
- ជ្រើសរើសញ៉ាំអាហារដែលល្អជាងមុន។
- ជ្រើសរើសគេងឱ្យលឿនជាងមុន។
- ជ្រើសរើសធ្វើចលនាឱ្យច្រើនជាងមុន។
ជីវិតដែលល្អ គឺកើតចេញពីការជ្រើសរើសរឿងតូចតាចជារៀងរាល់ថ្ងៃ។

៧. ទំនាក់ទំនងឆ្លុះបញ្ចាំងពីតម្លៃដែលអ្នកផ្តល់ឱ្យខ្លួនឯង
បើអ្នកស្រលាញ់ខ្លួនឯងពិតប្រាកដ អ្នកនឹងមិនទ្រាំនៅក្នុងកន្លែងដែលធ្វើបាបផ្លូវចិត្តឡើយ អ្នកនឹងហ៊ានជ្រើសរើស ហើយក៏ហ៊ានដើរចេញ។

៨. ការស្រលាញ់ខ្លួនឯង មិនមែនជាការផ្លាស់ប្តូរខ្លួនឯងរហូតដល់លែងសល់ជា "ខ្លួនអ្នក" នោះទេ
បើត្រូវបង្ខំខ្លួនឯង បើត្រូវព្យាយាមធ្វើជាមនុស្សម្នាក់ផ្សេងទៀតដើម្បីឱ្យគេស្រលាញ់ នោះមិនមែនជាតំបន់សុវត្ថិភាពសម្រាប់អ្នកទៀតទេ។ ស្នេហាដែលល្អ មិនចាំបាច់យកអត្តសញ្ញាណរបស់ខ្លួនឯងទៅដោះដូរនោះទេ។

៩. បើកាត់ផ្ដាច់មនុស្សដែល "ពុល" (Toxic) មិនបានទេ ត្រូវដកឃ្លាសិន
មិនបាច់ឈ្លោះ មិនបាច់ជេរដៀល គ្រាន់តែសន្សឹមៗបន្ថយភាពស្និទ្ធស្នាល ហើយនិយាយពីអារម្មណ៍ពិតរបស់អ្នកត្រង់ៗដោយមិនបន្ទោសនរណា... "ខ្ញុំមានអារម្មណ៍បែបនេះ..." ប៉ុណ្ណឹងគឺគ្រប់គ្រាន់ហើយ។

១០. លុយកាក់ហូរហៀរ = ចិត្តនឹងន
មានប្រាក់បម្រុង = មិនបាច់ខ្លាចពិភពលោកខ្លាំងពេក។
ដឹងពីចំណូល និងចំណាយរបស់ខ្លួន។
សន្សំប្រាក់សម្រាប់គ្រាអាសន្ន។
វិនិយោគដោយប្រើសតិ។
ហើយឈប់ទិញរបស់របរដោយសារតែអារម្មណ៍ "អផ្សុក" ឬ "ឯកោ"។

១១. អភ័យទោសឱ្យខ្លួនឯងចំពោះកំហុសកាលពីអតីតកាល
កុំយកកំហុសកាលពីមុនមកដាក់ទោសខ្លួនឯងនៅពេលនេះ មនុស្សគ្រប់រូបសុទ្ធតែធ្លាប់សម្រេចចិត្តខុស ចូររៀនសូត្រពីវា រួចដើរទៅមុខបន្ត អ្នកនៅថ្ងៃនេះ មិនមែនជាអ្នកកាលពីម្សិលមិញនោះទេ។

១២. រៀននិយាយ "បដិសេធ" ដោយមិនចាំបាច់មានអារម្មណ៍ខុស
ការបដិសេធរឿងដែលអ្នកមិនចង់ធ្វើ ឬរឿងដែលធ្វើឱ្យអ្នកវិលមុខ មិនមែនជាភាពអាត្មានិយមទេ ប៉ុន្តែវាគឺជាការកំណត់ព្រំដែនដើម្បីការពារសុខភាពផ្លូវចិត្តខ្លួនឯង។ បើអ្នកមិនគោរពពេលវេលាខ្លួនឯង ក៏គ្មានអ្នកណាមកគោរពអ្នកដែរ។

១៣. កុំប្រៀបធៀប "ជីវិតពិត" របស់អ្នក ជាមួយ "រូបភាពល្អៗ" របស់អ្នកដទៃ
អ្វីដែលគេបង្ហាញលើ Facebook ឬ Instagram គ្រាន់តែជាជ្រុងមួយដែលស្អាតបំផុតរបស់គេប៉ុណ្ណោះ គ្រប់គ្នាមានទុក្ខលំបាករៀងៗខ្លួន ចូរផ្ដោតលើការរីកចម្រើនរបស់ខ្លួនឯង ប្រៀបធៀបខ្លួនឯងថ្ងៃនេះ ជាមួយខ្លួនឯងកាលពីម្សិលមិញបានហើយ។

១៤. និយាយជាមួយខ្លួនឯងឱ្យផ្អែមល្ហែម ដូចនិយាយជាមួយមនុស្សដែលខ្លួនស្រឡាញ់
សាកសង្កេតមើល តើអ្នកធ្លាប់ជេរខ្លួនឯងថា "ល្ងង់" ឬ "អន់" ប៉ុន្មានដងហើយ? បើអ្នកមិនហ៊ាននិយាយពាក្យទាំងនេះដាក់មនុស្សដែលខ្លួនស្រឡាញ់ទេ ក៏កុំនិយាយដាក់ខ្លួនឯងដែរ ចូរប្រើពាក្យលើកទឹកចិត្ត និងផ្តល់ក្តីមេត្តាឱ្យខ្លួនឯងឱ្យបានច្រើន។

១៥. រកចំណូលចិត្តដែលធ្វើដើម្បីតែ "ភាពសប្បាយចិត្ត" មិនមែនដើម្បី "លុយ"
ក្នុងលោកនេះមិនមែនគ្រប់យ៉ាងត្រូវតែបង្កើតជាចំណូលទាំងអស់នោះទេ ចូររកការងារដែលអ្នកចូលចិត្តធ្វើ (ដូចជា គូររូប ស្ដាប់ភ្លេង ដាំផ្កា ឬសរសេរអត្ថបទដូចអែតមីនក៏បាន) ដែលធ្វើទៅហើយអ្នកមានអារម្មណ៍ថាបានសម្រាក និងមានសេរីភាពពិតប្រាកដ។

១៦. រៀនព្រងើយកន្តើយនឹងរឿងដែលអ្នក "គ្រប់គ្រងមិនបាន"
អ្នកមិនអាចហាមមាត់អ្នកដទៃមិនឱ្យនិយាយដើមអ្នកបានទេ ហើយអ្នកក៏មិនអាចបញ្ជាឱ្យគ្រប់យ៉ាងដើរតាមបំណងអ្នកដែរ។ ចូរទុកថាមពលមកខ្វល់តែលើអ្វីដែលអ្នកអាចធ្វើបាននៅចំពោះមុខវិញ វានឹងធ្វើឱ្យអ្នកលែងសូវហត់ចិត្ត។

១៧. ការចំណាយពេលម្នាក់ឯង មិនមែនជា "ភាពឯកោ" ទេ
ការចេះនៅម្នាក់ឯងដោយមានសេចក្តីសុខ គឺជាជំនាញដ៏អស្ចារ្យ វាកើតចេញពីការដែលអ្នកមានទំនាក់ទំនងល្អជាមួយខ្លួនឯង ពេលអ្នកចេះសប្បាយចិត្តម្នាក់ឯង អ្នកនឹងលែងត្រូវរត់តាមអង្វរអ្នកដទៃឱ្យមកបំពេញចន្លោះប្រហោងក្នុងចិត្តអ្នកទៀតហើយ។

១៨. អបអរសាទរជ័យជម្នះតូចតាចប្រចាំថ្ងៃ
មិនបាច់ចាំដល់ជោគជ័យធំដុំទើបសប្បាយចិត្តទេ

ទោះជាត្រូវបានចាក់រាប់រយកាំបិតយ៉ាងសុះខ្លួនក៍នៅសល់ថាមពលចិត្តគឺពួកឯង🥰