حنان سري

✨ "قبل ما نشارك العالم، خاصني نشارك راسي.
المشروع ما هو إلا صدى ديال إحساس داخلي.
وإذا قلبي تعبان، خاصني نرّبته، نسمع ليه، نعطيه فرصة يتنفس.
اليوم ماشي نهار البدايات الكبيرة، ولكن النهار اللي نعانق فيه روحي الصغيرة، نقول ليها:
ماشي خاصك تكوني مثالية، غير كوني معايا… وأنا معاك.
ومن هنا تبدا القصة."

💌 "يمكن خاصني نعتذر… على داك الوقت لي كنت فيه بوحدي، تالفة، كنحاول نهرب من إحساسي وماكنلقى حتى فين.
مازال كنحاول نوقف، ومازال كنسقط ونرجع نوقف… وماشي ساهل، ولكن راه هادي هي الشجاعة.
إلى كنتي إنتي/إنتيّا دابا فواحد المرحلة بحالي، عافاك متحبسيش. خد/خدي نفس عميق، وحاول/ي تشارك إحساسك مع شي حد كتتق فيه… راه حتى خطوة صغيرة لقدام كتقدر تبدل بزاف." 🤍✨

🌸 كيف بدات "حنان سري"؟

مكنتش البداية فخطة،
ماكانش عندي دفتر ولا خارطة طريق.
كانت البداية... نبضة خرجات من قلبي،
وقت كنت أنا وسط الظلمة،
وكنت كنقلب على شعلة صغيرة، تْنوّر ليا الطريق.

ماكانش في بالي مشروع ولا اسم،
كان غير إحساس، كيغلي فقلبي،
كلمة بغيت نقولها لراسي قبل ما نوصلها لشي حد:

"غادي دوزي، وراك تستاهلي ترتاحي."

"راك مشي ناقصة، راك كافية بحدك."

"راك زوين، حتى من وسط كسراتك."

ومن هاد اللحظة،
تولدت حنان سري...
ماشي ماركة، ماشي صفحة، ماشي تعاطف الناس ليا .
حنان سري هي أنا وانتِ وهو،
أي واحد مرّ من وجع، ولقا فداخلو نقطة ضو،
بغى يقسمها مع غيرو 💫

هي لمّة ديال قلوب عرفات طعم الألم،
ولكن اختارت تهدي دفء، ماشي حزن.
كلمة دافية، صوت حنين، لمسة صافية.

🎕 حنان سري غادي تبقى:
حضن صامت، فيه كلام كبير
بسمة بسيطة، فيها شفاء
ونسمة طيبة، توصل لعمق الروح.

لكل قلب فيه شي حاجة كيتخبّى

> 💭
ماشي كلشي كيباين على الوجه،
كاين لي ضاحكة وداخلها ساكت،
وكاين لي باين عليها القوة… وهي كتحلم غير بشوية راحة.

"حنان سري"
ماشي مجرد فكرة،
هي حضن صغير، خرج من قلبي أنا… باش يوصل لقلب كل وحدة فيكم.

لكل بنت حاسة براسها بوحدها،
لكل أم كتجري النهار كامل ونسات تتهلا فراسها،
لكل وحدة عارفة تبان بخير… ولكن محتاجة طبطبة حقيقية.

هنا،
مكان صغير فيه الحنان، الطمأنينة، والتحفيز…

ماشي رفاهية،
هو حقّك. و"حنان سري" جا باش يذكّرك بيه.

من قلبي… ليكم ❤️

🌿 "ماشي قصة نجاح… قصة ما بغتش تسلم"

أنا ما عنديش قصة زوينة نبهر بيها الناس.
عندي قصة بدايتها كانت كلها ضياع،
ضغط من العائلة، صمت داخلي،
وأسئلة كتغرقني كل يوم:
"شنو غندير بحياتي؟ شكون أنا؟ علاش كنحس براسي ماشي فبلاصتي؟"

كنت كنكبر بين جدران ما كتفهمنيش،
ووسط ناس كيشوفو الحلم ضياع وقت،
والتفكير "تفلّي".
وحتى مني فكرت نخرج بشي فكرة…
جاوني الشكوك، الخوف، والوحدة.

ولكن!
وسط كل هاد العاصفة،
كان قلبي ما كيسكتش…
كان كيبكي بصوت خفيف وكيقولي:
"ماشي ضروري تكون البداية مثالية، غير بداي!"

هنا…
بدا "حنان سري".

ماشي كماركة،
ولكن كلمسة مني ليا، ومن قلبي للناس.

هاد المشروع ما جاش من راحة،
جا من تعب، ومن ليالٍ كنت كنقفل فيها فبلاصتي وباكية.
ولكن كل دمعة فيه كانت حجرة فالبنيان
وكل لحظة يأس كانت خطوة صغيرة لقدّام.

وإذا وصلتي لهنا، ونتي/نتا حاس براسك ضايع،
بغيت نقولك:
ماشي خاصك تكون بخير باش تبدا.
خاصك غير تصدّق باللي فـ قلبك، وتخليه يدوي.

أنا دبا ما وصلت،
أنا غير بديت.
وإلى بغيتو شي بلاصة تلقاو فيها لمسة دفء،
وصدق، وراحة فشكل بسيط…

مرحبا بكم فـ "حنان سري" ❤️
من قلبي ليكم، باش تلقاو شي حنان… حتى وإنتو ما عارفين شنو خاصكم.

حتى جا ذاك النهار...
وفهمت:
السرّ ماشي فالكلام.
السرّ... فـ اللمسة. 💌

كيفاش نلمس قلوب الناس بلا ما نهدر؟
كيفاش نوصل الحنان، بلا ما نغلب؟

شي حاجة صغيرة كانت ساكنة فـ قلبي...
كنت كنخليها تكبر بلا ما نحس.
🥹❤️‍🩹