Zakariae Mohammed

وتشاء أنت ما تشاء،

ويشاء الله لك من الأقدارِ أجملها

الفرج فـ الغالب كيجي على غفلة...
ملي قلبك كيرضى بـ الحكمة ديال الله سبحانه وتعالى، وكيكون الهم ديالك هو الرضا ديالو قبل ما يزول البلاء.
ملي كتسلم أمرك ليه بـ ثقة وكتقول: "يا ربي أنا راضي بـ داكشي لي ختاريتيه ليا"، ديك الساعة ربي كيبدل الخوف ديالك بـ طمأنينة، والحيرة ديالك بـ راحة وسكينة.
وما بين لحظة وأخرى، كيجي الفرج من الباب لي ما كنتيش معول عليه.. بـ واحد الطريقة لي كتنسيك فـ العذاب وطول الانتظار. 🤍
﴿وَمَن يَتَّقِ اللَّهَ يَجْعَل لَّهُ مَخْرَجًا ۝ وَيَرْزُقْهُ مِنْ حَيْثُ لَا يَحْتَسِبُ﴾

الأغلبية ديال الحوايج لي شاغلة ليك بالك دابا.. الخدمة، الفلوس، الزواج، المستقبل، ولا أي رزق كتمناه فـ خاطرك.. هادي كلها أمور لي الله سبحانه وتعالى كاتبها ومقدرها ليك قبل كاع ما تخلق فـ هاد الدنيا.
وعلى قبل العظمة ديال هاد المعنى، الله سبحانه وتعالى أقسم بـ جلالة قدره وقال:
﴿وَفِي السَّمَاءِ رِزْقُكُمْ وَمَا تُوعَدُونَ * فَوَرَبِّ السَّمَاءِ وَالْأَرْضِ إِنَّهُ لَحَقٌّ مِثْلَ مَا أَنَّكُمْ تَنْطِقُونَ﴾.
سمع واحد الأعرابي هاد الآية، تعجب وقال:
"سبحان الله.. مَن الذي أغضب الجليل حتى حلف؟"
داكشي علاش، ما تخليش الخوف على الرزق يسرق منك راحة البال ديالك.. اسعى وخذ بـ الأسباب ودير داكشي لي عليك، ولكن خلي النتيجة فـ يد الله سبحانه وتعالى.
قول: "يا رب" من أعماق قلبك، ونتا كلك يقين بلي رب الخير ما كيختار لينا غير الخير، وبلي رزقك عمرو ما غادي يمشي لـ شي حد آخر، وعمرو ما غادي يفوتك إلا لـ حكمة بالغة. ♥️

عَسَىٰ رَبُّنَا أَن يُبْدِلَنَا خَيْرًا مِّنْهَا إِنَّا إِلَىٰ رَبِّنَا رَاغِبُونَ﴾
طفي بـ هاد الآية أي حزن ولا حسرة فـ قلبك؛
على أي فرصة ضاعت منك، وعلى أي خدمة مشات ليك ولا ما تقبلتيش فيها، وعلى أي إنسان عزيز طلق من يدك وباعك فـ نص الطريق، وعلى أي صاحب سحاب ليك المعدن ديالو أصيل وطيب، وفـ اللخر صدق داكشي غير قناع مخبي موراه.
داكشي لي خداه منك الله سبحانه وتعالى فـ راه لـ شي حكمة هو بوحدو لي كيعلمها، وداكشي لي خلاه ليك وما خداهش فـ راه رحمة بيك. يلا فهمتي الحكمة من داكشي لي كيوقع ليك، حمد الله سبحانه وتعالى وشكرو، ويلا ما فهمتيهاش، صبر وطلب العوض من عندو.
خليك متأكد بلي الأقدار ديال الله سبحانه وتعالى والتدابير ديالو كلها خير، واخا تكون كضرك ومقلقاك دابا.

ألف مبروك لفريق المغرب الفاسي الفوز بالبطولة الوطنية ،هنيئا لساكنة فاس ولجماهير الفريق الوفية

الأربعون شبيهًا مجرّد حكاية...فبعضُ الأرواح لا تتكرّر،فما كان فريدًا بحقّ، لا تُعيده الحياة مرّتين."

خاصنا نقتانعو بالجملة ديال سيدنا الخضر:
﴿إِنَّكَ لَن تَسْتَطِيعَ مَعِيَ صَبْرًا﴾
ما غاديش تقدر تفهم الأقدار ديال الله سبحانه و تعالى ، حيت الصورة كبر بزاف من عقلك ومن الاستيعاب ديالك!
يقدر تبقى عايش حياتك كاملة ونتا كيسحاب ليك بلي القدر ظلمك فـ شي حاجة معينة، ولكن الحقيقة راها فـ شكل آخر!
الحقيقة هي أن ربي حماك، ومنعها عليك لـ شي خير، غير حنا لي ما كنفهموش هادشي فـ وقتو.. بحال كيفما أم الغلام ما فهماتش شنو وقع لـ ولدها، وأكيد غتكون بقات كتدعي على لي دار هكاك فـ ولدها، وبحال كيفما موالين السفينة حتى هما ما فهموش!
كاينا واحد المقولة زوينة بزاف فـ التفسير ديال هاد المعنى كتقول: استعن بلطف الله الخفي، لتصبر على أقداره التي لا تفهمها
وقول ديما مع راسك: "أنا ما فاهمش الأقدار، ولكن متصالح مع حقيقة أنني ما فاهمهاش، وعندي يقين كامل بلي راها كلها من عند الله".
يلا وصلتي لـ هاد المرحلة، راك غادي توصل لـ راحة البال والطمأنينة الحقيقية.. وهادي هي الحالة لي الإنسان ما كيتزعزع وما كايتهز فيها بـ حتى شي حاجة كتوقع ليه، سواء كانت باينة قدامو خير ولا شر، وكيبقى يحمد سيدي ربي على كل حال.
فـ الحمد لله ديما وأبدا. 🤍

كاينين شي جدود وجدات ساكنين غير على بعد دقائق من ولاد ولادهم ، ومع ذلك تقدر تدوز شهور وشهور وما يشوفوهمش.
ماشي حيت ما يقدروش...
ولكن حيت ببساطة ما باغينش.
وفالمقابل، كاينين جدود كيشدو الطريق ويسافرو لساعات طويلة، وكيرونو البرنامج ديالهم لي كيكون عامر، غير باش يقدرو يدوزو غير سويعات قليلة مع الأحفاد لي كيبغيوهم.
يعني باش تكون جد ولا جدة، القضية ما عندها حتى علاقة بالمسافة والقرابة الجغرافية.
القضية عندها علاقة بحجم الاهتمام والمجهود لي كدير.
الدراري الصغار كيعقلو مزيان على شكون لي كان حاضر فـ حياتهم.
شكون لي صونا باش يسول فيهم.
شكون لي عطى قيمة للتفاصيل ديالهم الصغيرة.
وشكون لي خلاهم يحسو بلي راهم محبوبين وبلي عندهم بلاصة كبيرة فقلبو.
السكنى قريبة ليهم ما كتعني حتى شي حاجة يلا ما كنتيش كتخصص ليهم وقت من وقتك.
فـ اللخر، العلاقات ما كَتِّبْناش على المسافات...
بل كَتِّبْنا على الحضور والاهتمام. 🤍

يقدر يتلف ليك الطريق فشي وقت...
ويقدرو يدوزو عليك سنين وتحس فيهم بلي أحلامك معكسة، وبلي داكشي لي داير بيك ما غاديش كيفما تمنيتي وبغيتي.
وتقدر توصل لواحد المرحلة لي يولي كيسحاب ليك فيها بلي كاع الناس فاتوك وسبقوك...
ولكن، الحياة ما كتقاسش بلحظة وحدة، ولا بشي طيحة مؤقتة.
شحال من إنسان كان تالف ومجلي فشي مرحلة من عمرو... ومن بعد نور ليه الله سبحانه وتعالى بصيرتو ولقى طريقو.
وشحال من واحد سحابلو بلي فرصتو ضاعت ومشا عليه الحال... ومن بعد سنين، عاد بدات أجمل فصول حياتو.
الحياة ماشي سباق قصير كنجريو فيه... الحياة راها رحلة طويلة ديال التعلم، النضج، والمحاولات لي ما كتساليش.
الأهم فهادشي كامل... هو أنك ما توقفش.
استمر، طوّر من راسك، تهلا فصحتك، تعلم، صبر، وبني العادات الزوينة ديالك نهار مورا نهار.
راه تقدر تبدل حياتك فـ سنين قليلة، كثر من داكشي لي كاع كنتي كتخيل.
ما تيأسش يلا تعطلو عليك النتائج... حيت بعض الثمار كتحتاج وقت أطول باش تطيب وتزيان.
وتفكر ديما: ماشي المهم فين واقف نتا اليوم... الأهم هو فـ أي اتجاه غادي.
وتيقن بلي الله سبحانه وتعالى قادر ينقلك من الصفر للمية فـ رمشة عين، أسرع من داكشي لي كيسحاب ليك... ما حدك درتي يقينك فيه، وما استسلمتيش

يلا سولتييني شنو هي أغلى نصائح نقدر نعطيها لأي واحد بادي مشروع جديد، غنقول ليك:
• قاد حساباتك والسيستيم ديالك قبل ما تبدا.
• سير دقة دقة وخطوة بخطوة.
• ديها فوَرقتك وركز غير مع خدمتك وسوق راسك.
• هز على قد جهدك وما تكلفش راسك فوق طاقتها.
• خلي راحة بالك هي المشروع ديال حياتك.
• ما تظلمش راسك وما تقصرش فحق عائلتك وداركم.
• بعد من الكريديات (القروض).
• قيد كلشي ووثق أمورك ليك وللي غيجي موراك.
• حط لراسك أهداف باينة وواضحة.
• خرج واحد النسبة من أرباح مشروعك لوجه الله.
• حافظ على العطلة ديالك الأسبوعية والسنوية، وما تخدمش فيهم نهائياً.
• حط التليفون من يدك ملي تكون جالس مع عائلتك وحبابك.
• وقف مع راسك كل عام ودير كشف حساب (بيلان) لخدمتك ولحياتك.
• غير توقع ليك شي روينة أو مشكل فحياتك ولا خدمتك، وقف فالبلاصة وحل المشكل. ما تكملش فديك الروينة وما تقبلهاش كأمر واقع، حيت الحلول فالأول كتكون ساهلة.
• صلاتك، عبادتك، وعلاقتك مع سيدي ربي هما مشروعك الحقيقي فالدنيا. يلا ربحتي العالم كامل وخسرتي علاقتك مع الله، راك خسرتي كلشي وخسرتي حتى راسك.
وأخيراً..
• ما تنساش بلي الحياة عبارة على قاعة امتحان، وأعظم سؤال فيها هو السؤال ديال الصلاة.
• التحدي الحقيقي هو أنك، وسط هاد الطحانة ديال الحياة، تحافظ على قلبك حي، وتحميه من الغفلة والتفريط.
• أنك فعز المعركة ديال الدنيا، ما ناسيش علاش جيتي ليها وشنو مطلوب منك.
• وسؤال التميز (المستوى الخاص) هو أنك وسط هاد الضغوطات الخيالية، ما كتفرطش أبداً فدينك، صلاتك، قرآنك، عبادتك، وحقوق عباد الله.