Romeo aguilar

RETIRED GENERAL KINWESTYON ANG PAMUMUNO NINA GATCHALIAN AT TULFO

Naglabas ng matapang na pahayag si retired Major General Romeo V. Poquiz kasabay ng nagpapatuloy na kontrobersiya sa Senado at sa Gatchalian Bloc Blue Ribbon Committee hearing na pinamumunuan ni Senador Erwin Tulfo.

Sa kanyang social media post, diretsahang kinuwestiyon ng retiradong heneral ang pagiging angkop ni Tulfo na manguna sa imbestigasyon kaugnay ng mga alegasyon ng katiwalian sa flood control projects, lalo na’t kabilang umano ang senador sa mga pangalang idinadawit ng ilang testigo.

“Paano ka mamuno sa pag-iimbestiga ng pagnanakaw kung ikaw mismo ay tinuturong kasama sa pagnananakaw?”

Hindi lamang ang pagdinig ang kanyang kinuwestiyon. Tinanong din niya ang isyu ng liderato sa Senado na hanggang ngayon ay pinagtatalunan pa rin ng magkatunggaling kampo.

“Paano ka naging Acting Senate President kung meron namang nakaupong Senate President?”

Dumating ang pahayag habang nagpapatuloy ang bangayan sa Senado matapos ang kontrobersyal na reorganisasyon noong Hunyo 3, kung saan idineklarang bakante ang mga posisyon sa liderato at iniluklok si Sen. Sherwin Gatchalian bilang Senate President Pro Tempore.

Ang hakbang na ito ay kinuwestiyon naman ng kampo ni Senate President Alan Peter Cayetano, na nagsasabing walang legal na quorum nang isagawa ang reorganisasyon. Paulit-ulit nilang iginiit na 13 senador ang kinakailangang quorum sa 24-miyembrong Senado.

Kasabay nito, ipinagpatuloy ni Tulfo ang kanyang bersyon ng Blue Ribbon Committee hearing kaugnay ng mga alegasyon ng anomalya sa flood control projects.

Gayunman, kabilang sa mga usaping lumutang sa mga naunang pagdinig ang mga alegasyong ibinabato ng ilang testigo laban sa iba’t ibang personalidad, kabilang si Tulfo. Mariin namang itinanggi ng senador ang mga paratang laban sa kanya.

Sa ngayon, wala pang agarang tugon si Senador Tulfo sa pinakahuling pahayag ni retired Major General Poquiz. Patuloy naman ang pagdinig at ang palitan ng mga akusasyon sa gitna ng lumalalim na sigalot sa Senado.