Islam Message center

سخت اور کٹھن حالات میں لوگ عموماً ایک دوسرے کو دلاسہ دینے کی کوشش کرتے ہیں، مگر ایک مسلمان کے لیے غم و اندوہ کے اندھیروں میں سب سے روشن چراغ اور سب سے مؤثر تسلی قرآنِ مجید ہی ہے؛ وہی دلوں کو سکون بخشتا ہے، بے قرار روح کو قرار عطا کرتا ہے، اور مایوسی کی گھٹاؤں میں امید کی کرن بن کر جلوہ گر ہوتا ہے۔

«نہایت لطیف اور ضروری ادب»

استئذان کے آداب میں سے ایک نہایت لطیف اور بامعنی ادب یہ ہے کہ جب تم کسی دروازے پر دستک دو اور اندر سے پوچھا جائے: "کون ہے؟" تو محض "میں ہوں" کہہ کر اکتفا نہ کرو، بلکہ اپنا نام واضح طور پر بیان کرو، تاکہ کسی اشتباہ اور التباس کی گنجائش باقی نہ رہے۔

یہ نفیس ادب اس مبارک واقعے سے ماخوذ ہے جو شبِ معراج کے موقع پر پیش آیا؛ جب حضرت جبرئیل علیہ السلام آسمانِ دنیا کے دروازے پر پہنچے اور دربان سے فرمایا: "دروازہ کھولو۔" دربان نے دریافت کیا: "کون ہے؟" تو آپؑ نے نہایت صراحت کے ساتھ جواب دیا: "جبرئیل ہوں۔"

یہی وہ باریک نکتہ ہے جو ہمیں سکھاتا ہے کہ گفتگو میں وضاحت، شائستگی اور حسنِ تعبیر کس قدر اہم ہیں۔

اختلافِ رائے انسانی فطرت کا ناگزیر تقاضا ہے؛ یہ کسی بھی فرد کے ساتھ واقع ہو سکتا ہے—خواہ وہ شیخُ الحدیث ہو، مفتیٔ اعظم ہو یا شیخُ الاسلام، بلکہ ائمۂ دین کے اکابرین کے ساتھ بھی علمی دائرے میں اختلاف کیا جا سکتا ہے۔ تاہم یہ اختلاف اپنے حدود و قیود کا پابند ہونا چاہیے: دین کے مسائل تک محدود، مضبوط دلائل پر قائم، نفسانی خواہشات، دنیاوی شہرت اور ذاتی اغراض سے پاک، اور اسلوب میں ادب و احترام کا دامن ہرگز ہاتھ سے نہ چھوٹے۔

لیکن اس سے بڑھ کر کسی شیخُ الحدیث کی تصویر کو مسخ کرنا، اسے اہانت آمیز انداز میں پیش کرنا یا تمسخر کا نشانہ بنانا—یہ نہایت قبیح، مہلک اور تباہ کن رویّے ہیں جو معاشرے کی اخلاقی بنیادوں کو کھوکھلا کر دیتے ہیں۔

بارگاہِ الٰہی میں دستِ دعا ہے کہ وہ ہمیں ایسی پست اور ناپسندیدہ حرکات سے محفوظ رکھے، اور ہمیں علم کے ساتھ ادب کی دولت بھی عطا فرمائے۔

آجکل شیخ الحدیث حضرت مولانا ادریس صاحب کے بارے میں کچھ نازیبا الفاظ اور غیر اخلاقی تصاویر سوشل میڈیا پر گردش کر رہی ہے اسی کے خاطر تحریر قلم بند کرنے کا ارادہ کیا۔

کچھ لوگوں کا تجھ سے جدا ہونا بھی رحمتِ خداوندی ہے، جس کی حکمت کے منکشف ہونے کے لیے وقت کے گزرنے کا انتظار کرنا پڑتا ہے۔

چراغدانِ حکمت۔

لسانیت، قومیت اور عصبیت ایسی خطرناک بیماریاں ہیں جو قوموں کو تقسیم کر دیتی ہیں، ملکوں کو کمزور بنا دیتی ہیں اور معاشروں کو تباہی کے قریب پہنچا دیتی ہیں۔

حضرت عبد الله بن عمرؓ ایک سفر میں جا رہے تھے کہ ایک کمسن چرواہے کو بکریاں چراتے دیکھا۔ آپؓ نے اس سے ایک بکری خریدنے کا کہا، مگر اس نے امانت داری سے جواب دیا کہ یہ اس کی ملکیت نہیں۔ آپؓ نے حیلہ سکھایا کہ مالک سے کہہ دینا بھیڑیا لے گیا، تو وہ تڑپ اٹھا اور پکارا: “پھر اللہ کہاں ہے؟”

یہ کلمہ سن کر آپؓ بہت متاثر ہوئے۔ مدینہ واپس آکر اس چرواہے اور بکریوں کو خرید لیا، غلام کو آزاد کر دیا اور بکریاں اسی کے حوالے کر دیں، اس کی دیانت اور خوفِ خدا کے اعتراف میں۔