G&M Beauty Center

من باب شهادة الحق
بس قبل أى حاجة
إنا لله وإنا إليه راجعون
ربنا يرحم دكتور ضياء العوضى ويثبته عند السؤال اللهم أمين

بتكلم من تجربتى الشخصية لأتباعى نظام الطيبات
وشهادة الحق امام ربنا فى حق دكتور ضياء

أنا كنت بعانى من خمول شديد وكسل ونوم ساعات طويلة
وأصحى جسمى كله واجعنى ومتألمة من صداع نصفى ومزاج مش حلو خالص
ومن أقل مجهود بتعب وبنهج وطبعآ بتعصب من أقل شئ
ووجع وآلام فى عضمى كله وتقل فى رجلى وشكة فى كعب رجلى
ونفخة فى جسمى وصوابع ايدى ورجلى

بمجرد ما منعت أكل الفراخ والبيض والدقيق واللبن
كل دا أختفى بنسبة كبيرة .. الحمد والفضل لله

وكنت بقلل الممنوعات واحدة واحدة
لأن غصب عنى فى الاول دى موارد موجودة فى البيت
لحد ما بدأت اظبط الدنيا على قائمة المسموحات

فأكتفيت بال 5 عناصر اللى قال عليهم لو هما متوفرين
ف الأنسان مش محتاج حاجة تانى
وهما
البطاطس
الرز
التمر
العسل
السكر

+ الدهون

منعت العيش البلدى والفينو والكيزر نهاااائى
ودا اللى كان مسببلى الصداع النصفى و تعب المعدة

منعت أكل الورقيات زى السبانخ والخس والخضار النى زى الجزر والخيار وماشابه تمامآ
ودا كان السبب فى المغص ووجع القولون المستمر
ومادام القولون تعبان يبقى الجسم بيعانى يبقى المزاج صفر

منعت اللبن
او ان اضيفه لمشروب
زى الشاى بلبن
وطبعآ دا موروث مقدس فى عيلتنا 🤫
وكان دا سبب خفقان القلب والتوتر والخنقة فى الصدر
وأقسم بالله لما كان بيبقى نفسى فيه وأشربه وخاصآ على معدة فاضية او مع الفطار
كان بيجيلى آلام مبرحة فى صدرى و ضهرى فى نفس الوقت
لحد ما فعلآ كرهته

طبعآ منعت كل المعجنات والمكرونة والفطاير وكل دااا
والكارثة المكرونة بالبشاميل
اللى هى عبارة عن صينية فيها حفلة من الممنوعات
مكرونة ولبن ودقيق وفى ناس بتحب تحط التاتش بتاعها
فتحط بيضة على الوش 😔
فعليكم انكم تتحيلواااا .. الله المستعان

منعت الكيك والكحك والبسكوت وكل الحاجات دى
اللى مبتعملش حاجة غير حرقان فى الصدر رهييييب
وحموضة فى المعدة
ولما كنت بلغبط واكل ولو حته صغيرة من اى حاجة
كنت بتألم فى ساعتها
وكل واحد بيحس بجسمه طبعآ
واللى بيمشى على النظام ويلغبط
فى نفس اللحظة جسمه بيديله أشارة انه دخله عنصر مضر
واليوم كله مبيكونش أحسن حاجة
ونصيحة الدكتور لو حصل لغبطة
الامتناع عن الأكل والصيام لمدة يوم او اتنين ونكتفى بالتمر مثلا لسد الجوع لحد الجسم ما يطهر نفسه

منعت الماية الكتير
لأن كتر الماية بتسبب الدوخة الشديدة
ودوخة يعنى عدم اتزان يعنى الجسم فيه لغبطة جامدة
وبشرب لما بعطش فقط

منعت الكنافة والقطايف ولقمة القاضى وكل الحاجات الشهية دى 🙃
كلهم طبعا من الدقيق وكارثة برده
وباكل المسموحة فقط وهى البسبوسة بدون لبن او زبادى

الدكتور مأكد فى النظام على الصيام أولآ
صوموا تصحوا اتباعآ لحديث الرسول
علشان الجسم يطهر نفسه اول بأول
اتنين وخميس
ويوم 13 .. 14 .. 15 من كل شهر هجرى
ودا اللى بحاول اعمله .. الله المستعان
ربنا يقوينى ويقويكم

وحقيقى كل ما الجسم فى حالة صيام بيكون مرتاح بسبب مفيش نشاط قائم للهضم وفى عملية فلترة من السموم

وكمان مش معنى ان فيه قائمة مسموحات من الأكل يبقى معناهاا نعمل تشكيلة من المسموحات على الغدا
احنا بنكتفى بعنصرين ل تلاتة فقط
ومبناكلش لحد ما نشبع .. لأ

الأكل تلت معدة
بنسيب مكان للسوائل وللتنفس
ودى كانت طريقة اكل الرسول صلى الله عليه وسلم

وكمان أكد لو فيه عنصر من المسموحات لو اكلته بيتعبك وقفه
وحس بجسمك واتعامل معاه برحمة
واحنا بناكل علشان نعيش بصحة وجسمنا يقدر يقوم بالمجهود المطلوب منه مش عايشين علشان ناكل وبس .. والفرق كبير

والآكل وقت الجوع فقط
مش كل شوية علشان يكون فيه استقرار فى الأنسولين
ومن باب رحمة الجسم
ان مش كل شوية يعمل عملية تقيلة زى الهضم

ومحدش يوقف علاج الا لما يمشى على النظام ل فترة
اقل مدة اسبوعين
وبمتابعة مع دكتورك الخاص
خاصآ الامراض المزمنة وهو من نفسه ممكن يقلل الجرعات او يمنع نوع من الدوا او يمنعه كله

يطول الكلام
علشان كدا ادخلوا صفحته واسمعوله Dr.Diaa Alawady
واشتركوا فى جروبات نظام الطيبات
وشوفوا بنفسكم تجارب الناس والمرضى على مستوى الوطن العربى
وجربوا مش هتخسروا حاجة بالعكس
وإن شاء الله تبقوا فى صحة كويسة
لأننا هنتسأل عليها

واخر حاجة هقولها للى زعل وغضب زيى من وقت خبر وفاته
احتسبوا عند ربنا الم مشاعركم
انا عارفة السيناريوهات اللى فى بالكم تعباكم ازاى
حسبنا الله
ولكن مهم تفرغوا وتحرروا
بلاش كبت دموع بالذات

الله المنتقم الجبار

ربنا يجعل علمه فى ميزان حسناته وشفيع ليه عند ربنا اللهم آآمين