Amna hair care

خلونا نتفق انو الشعر الطويل بزيد البت جمال وهيبة وزينة 🥰
عشان كدي شعرك دا م تستخسري فيو ماسكات بخاخات مكملات ...م تنشفيها علي نفسك وتقعدي تحسبيها وطول عمرك تكوني قرعة 🫣

بعدين لما تشغلي غنوة اقدلي ...هي اقدلي...اقدلي👏👏👏
القدلة دايرة شعر ...👏👏👏

#آمنة

الشعر "بيتنفّس"؟ 🤔

الحقيقة العلمية 👇🏽
الشعرة نفسها ما فيها حياة…
يعني ما بتتنفّس زي الجلد ❌

لكن 👇🏽
فروة الرأس هي الحيّة 💚
وفيها مسام وبصيلات محتاجة تكون نظيفة ومتوازنة

لما نكتر منتجات تقيلة أو نخلي الماسك فترة طويلة:
بتتراكم على الفروة و بتسد المسام وبتسبب مشاكل زي الحكة و التساقط

عشان كدا بنغسل الماسك ✔️
ونخلي الفروة "مرتاحه" ونضيفة ✨

لذلك
الشعر ما بيتنفس…
لكن الفروة لازم تكون نظيفة عشان الشعر ينمو بصحة 💚

عشان كدي اووووعك تنومي بالماسك ...سامعة 🤼

#آمنة

من قلب التحدي.. ولدت حكاية Amna Hair Care ✨🇸🇩"

عايزة احكي ليكم قصة البراند

"أنا آمنة.. أم لطفلين، خريجة هندسة جامعة السودان. 👷‍♀️👩‍👧‍👦

قصتي مع الشعر ما بدأت في معمل هادي، بدأت بعد الحرب مباشرة بغد م نزحنا في عززز الصيف في ظروف صعبة ودرجات حرارة عالية جداً في الشمالية ونهر النيل بالتحديد. كنت كل ما أطلع مشوار وأرجع أفك طرحتي، بلقى ريحة شعري اتغيرت وبقى (معتت) وفاقد لحيويته.. إحساس كان بضايقني شديد
بديت أبحث عن حل يحافظ لي على ريحة شعري وصحته، وفي رحلة البحث دي اكتشفت عالم مدهش! عرفت إنو شعورنا دي ممكن تطول وتوصل لآخر الظهر، عادي جدا من غير تعب، بس محتاجة (الاستثمار الصح). 🤳😍

من هنا بدأ الشغف..
كل يوم كان بالنسبة لي تحدي جديد، تجارب جديدة .. واستثمار يومي في شعري لحد ما وصلت لنتيجة (جبارة) بفضل الله.

ليه اخترت 'البامية' بالذات؟
لأني لقيت بي كل بساطة شعرنا عشان يطول محتاج يترطب..وبما إنها أعظم مرطب طبيعي خلقته الطبيعة، غنية بمادة (الميوسين) اللي بتغلف الشعرة وبتحميها. وبما إننا في بلدنا بنزرعها بكميات كبيرة، قررت أحول الخبرة دي لمنتج تجاري احترافي يوصل لكل وحدة فيكم. 🌿🧪

اليوم، Amna Hair Care هو مكانك الصح لو بتحلمي بشعر طويل وصحي. إحنا ما بس بنبيع منتجات، إحنا بنقدم نصايح وخبرة لكل أنواع الشعر (الأفريقي والناعم).
الحمد لله على نعمة السعي، والحمد لله على نعمة الوصول. 🤲✨
Amna Hair Care
#آمنة

بتك بتتجرس من التسريحة ؟

"واحدة من أكتر الحاجات اللي كانت بتهمني وأنا بعمل في الفورميلا، هي (الأمان). 🛡️

كأم وعندي بنوتات ح يجو مستقبلا كنت عايزة منتج أقدر أستخدمه لنفسي ولي بتي وأنا مرتاحة ومطمنة 100%. عشان كدة ماسك البامية :

✅ طبيعي 100%: بدون سيليكون، بدون بارابين، وبدون أي مواد كيميائية قاسية تخنق الشعرة.
✅ لطيف على الفروة: مادة 'الميوسين' بتغذي الخصلات وبترطبها بعمق من غير ما تسبب أي تهيج.
✅ مناسب لكل الأعمار: من البنوتات الصغار اللي شعرهن بيتعبنا في التسريح، لحد الجدات اللي عايزين يحافظوا على حيوية شعرهن.
إحنا ما بس بنبيع ماسك، إحنا بنقدم روتين عناية آمن، بيخلي (وقت تمشيط الشعر) وقت حب ودلع، مش وقت وجع ودموع. 🥰🌸

منو هنا بتعاني مع شعر بنتها الصباح؟ ورينا بتك عمرها كم ونقول ليكِ كيف الماسك حيغير روتينكم!

#آمنة

"كتير منكم لسة مابعرف الفرق بين ماسك البامية وجل البامية؟' 🤔

ومتوقعين لما يشتروها بلقوها لزجة ولايوقة
بصفتي مهندسة، كان هدفي من البداية إني ما أقدم مجرد 'وصفة'، بل منتج حقيقي بمواصفات عالمية تعالج شعرنا

✅ تركيبة مدروسة: الماسك ده مر بمرحلة استخلاص دقيقة عشان نطلع 'الميوسين' الصافي ونحافظ على خواصه العلاجية بدون أي شوائب.
✅ ثبات وجودة: اهتميت بي كل تفصيلة، من استقرار القوام لحد التغليف المحكم، عشان المنتج يوصلك في أحسن صورة ويحافظ على جودته لآخر قطرة.
✅ فخر الصناعة المحلية: انا بثبت إني قادرة اصنع منتجات طبيعية 100% وباحترافية تنافس الماركات العالمية. وذلك من فضل ربي

المهم قلت لي جيمناي بالله رايك شنو في الشغل دا...ولو بتحب الشعر.. بتشتري مني لو ضاعفت السعر ....بعد م كشفت ليو ورقي كلو واديتو المدخلات والمكونات بتاعة الماسك كلها ...واداني الرد الحلو دا
😍😍😍(طبعا توجد زيادة ف الاسعار)

#آمنة
خطوة_إهتمام_حتغير_شعرك

قبل ما نبدأ رحلتنا في Amna Hair Care،
وقبل ما نعرف يعني شنو "ماسك طبيعي" بمواصفات احترافية…

كان في إنسانة وضعت حجر الأساس للثقافة دي في السودان… أسوم ✨

زمان ..زمن الايام الخوالي كنا بنقول للماسك "خلطة"،
لحد ما جات وغيرت المفهوم ده تماماً،
وخلتنا نشوف إنو الطبيعة ممكن تتقدم بشكل راقي
ونتيجتها تكون واضحة وملموسة 💚

أسوم ما كانت بس صاحبة براند،
كانت مصدر إلهام لكل بنت سودانية فكرت تبدأ مشروعها في مجال التجميل الطبيعي 🌸
وبقت نمبر ون في السودان
وبشهادة كتير من البنات…
الأثر الجميل لسه موجود لليوم.

اليوم، وبصفتي صاحبة براند ناشئ،
بحب أرسل ليها رسالة تقدير واحترام،
وندعو ليها ربنا يكتب ليها الخير، ويطمّن قلبها، ويجمعها بأهلها وجمهورها في أحسن حال 🤍

الطيب لا يُنسى… والفضل لا يُنكر ✨

#آمنة


لو عندك تجربة أو كلمة طيبة عنها، اكتبيها في التعليقات 💬

"البامية ما بس للطبيخ ! 🥗

البامية جوكر للشعر
السر اللي بيخلي ماسك البامية للشعر مختلف هو مادة 'الميوسين' الطبيعية. ودي المادة اللزجة اللي في البامية
المادة دي بتغلف الشعرة وبتحبس الرطوبة داخلها، عشان كدا تعتبر كيراتين طبيعي للشعر وكمان وبترجع اللمعة اللي فاقدا الشعر بسبب الجفاف وعدم الترطيب أو بسبب الصبغة. ماسك طبيعي 100% وآمن لكل أفراد الأسرة.

#آمنة

لو عايزة تدمري فروة شعرك.. اعملي الـ 5 حاجات دي

1/استخدمي الشامبو التجاري المليان "سلفات" باستمرار ...لانو بيجرد فروة راسك من كل الزيوت الطبيعية ويخليها جاااافة زي الصحراء

2/تمشطي شعرك بشدة طول الوقت 😣
الشد المستمر بيسبب التهاب في الفروة وتساقط من الجذور!

3/ تهملي نضافة الفروة
تراكُم الزيوت والمنتجات بقفل المسام… والفروة ما بتتنفس 😵‍💫

4/تلبسي كاب السيتان ع شعرك وهو مبلول ..دي بيئة مثالية جدا لنمو البكتريا...الصاح ترطبي شعرك بي بخاخ ترطيب قبل النوم بي زمن كافي وشعرك ما فروتك

5/و اهم سبب ودا منتشر جدا عندنا اللي هو بنلطخ الزيت او الكركار مباشرة علي الفروة ودي اكبر غلطة ..الصاح نخلي الفروة نضييييفة وظريفة ..نديها بخاخ تحفيز فقط

انتي كزولة قريتي البوست دا كنتي عارفة الحاجات دي وللا لع

#آمنة

حجة نورة مالا؟
حجة نورة عسل

مشيت قبل يومين لي زولة عزيزة علي شديد وطبعا انا محل م امشي لازم تتفتح سيرة الشعر والاهتمام بالشعر والروتين وكدا
ف كالعادة جات السيرة وحكينا بالمكملات الغذائية وانها حاجة لابد منها في مسيرة الشعر وحاجة اساسية شديد وحكيت ليها بي مكملاتي الانا جربتها

و زولتي طبعا كانت لاخر لحظة كاسرة حنك الشعر لو م حجة نورة...ومن جماعة الشعر بعد دا نسويبو شنو مع العلم انها زولة شباب وسكرة اربعينية كدا زي الوردة ...

ف حكت لي قصة قالت لي جارتا عجووووز شعرا طال بعد جات من السعودية ..قامت سألت جارتا ...قالتلها والله ماشاء الله شعرك طال ..طوالي الحجة قالت ليها لما كنت في السعودية كنت ببلع فيتامينات مع بناتي...يمكن منها ؟؟؟
قالت لي مادام حجة نورة بتبلع ..انا ماااالي هاملة شعري 😂😂😂
المهم من داك اليوم زولتي دي بقت تسأل وتبحث واخر اهتمام وجلبطة بالشعر

حكينا القصة دي لييييي
عشان اوريك العمر مجرد رقم ..والشعر والجمال عموما م عندو عمر ؟شفتي غادة عبدالرازق عمرا كم ؟؟؟شفتيها كيف اتكلمت عن الاهتمام والجمال وطاقة الانوثة

لو كاسرة الحنك عشان عمرك يبقى اتلومتي في حق نفسك والبوست دا رسالة حب لي اي ام بتقول العمر فات م بتهتم بي شعرا
انتي ست الكل من باكر تبلعي مع بناتك ..ماسكاتك مع بناتك ...روتينك مع بناتك ...لانو في زمنك كان المفهوم غلط في العناية بالشعر

اقري البوست دا لي امك البتقول انا بعد دا زولة ابريق ومصلاية وياحبذا لو اهديتيها ماسك من عندنا ...نعمل لك تخفيض عشان خاطر عيون الحجة

فااااشنووو ...منشن لي زولتك المقتنعة انو العمر فاتا

طبعا غيرت اسم الحجة ...يمكن بناتا ما يرضن 🫣🫣🫣
#آمنة

كويتي شعرك صاح؟ 📢✨
مبروك عليك اللوك الجديد وكل سنة وانتي طيبة ..اتمنى تكوني استمتعتي بي شعرك 🫶

يلا بعد دا ماسك البروتين "وجب عديييييل" بعد الحرارة عارفة ليه؟ 🤔
لأنو المكواة والحرارة "بياكلوا" بروتين الشعر الطبيعي، وبخلو الشعرة ضعيفة ومجهدة، وأول ما تغسليه بتلقيه بقى باهت وناشف وممكن يتكسر عديل لو السبيبة ضعيفة ومكوتك حاااارة
عشان كدا قبل الغسيل لازم نتدخل بـ "ماسك بروتين " زي الحنة مثلا او اي ماسك بروتين سواء جاهز او في البيت عشان تقوي الروابط دي وتعوض الشعرة الارهاق الحصل لي روابطا بفعل الحرارة دي

وبعد داك الغسيل ثم تسريحة lco

#آمنة

كانن بدعن ليل نهار ...وربنا استجاب دعاهن

زماااان زمن الزمن جميل 2017 كنا في داخلية جامعة السودان وبنحكي عن استجابة الدعاء ...وانو كيف ربنا ممكن يستجيب اي دعوة وقال ادعوني استجب لكم

اها قامت عندناا بت قالت اييي دعوة بتستجيب مهما كانت مستحيلة وانا قلت لاااا...الدعاء يكون منطقي ...هي قالت نحن بنتعامل مع رب عظيم ايى شي ندعي بيو بستجيب ...وانا بقول من التأدب في الدعاء يكون منطقي وليس مستحيل مثلا م ممكن ادعي ربنا ينزل لي نجمة من السماء

المهم قامت قالت لي اوريك دعوة مستحيلة حصلت ؟ اها قولي
قالت عندهم بنات جيرانم شعرهم افريقي وكانو بدعو ليل نهار شعرهم يطول ؟طبعا نحن داك الزمن شايفين الشعر الزنجي او الافريقي مستحيل يطول ؟ قالت ربنا الهمم البامية بس وقعو البامية وقعة جدددد ..في ظرف سنتين البامية ختت ليهم شعر زي الشعر

نحن طبعا شفنا انو دي حاجة مستحيلة حصلت بفضل الدعاء ووقلنا ليها والله فعلا دي حاجة معجزة ...بس لو كنا بالوعي الكافي كنا غالطناها وقلنا ليها دي م معجزة دا شعر كان جاف ولقى ترطيب واي شعر بطول مهما اختلفت الجينات..وبرضو الدعاء فعلا بستجيب لكن محتاج سعي

المهم داك اليوم اول مرة كنت اسمع بي انو البامية بتطول الشعر

انتي سمعتي بيها متين للشعر ؟؟؟

#آمنة

ناوية تكوي شعرك في العيد؟ 🔥
وبقولو المكوى بتضر الشعر! كيف بتضر الشعر؟

الشعر أساساً مكوَّن من بروتين اسمو الكيراتين.
لما نعرّضه لحرارة عالية جداً ، الحرارة بتكسر جزء من الروابط داخل الشعرة وبتخليها تفقد جزء من الرطوبة الطبيعية.
النتيجة ممكن تكون: • جفاف
• تقصف
• تكسر
• ضعف في الشعرة مع الوقت
هنا بيجي دور البامية طبعا ودا ملعبنا 😎
البامية غنية بمادة هلامية طبيعية اسمها موسين البامية (Okra Mucin).
المادة دي بتعمل طبقة خفيفة حول الشعرة تساعد على حمايتا من الحرارة وكمان عندها فوايد كتير:

✨ حبس الترطيب داخل الشعرة
✨ تقليل الهيشان
✨ تسهيل التمشيط
✨ إعطاء نعومة ولمعان طبيعي
يعني الشعر مفترض يكون مرطب ومحمي قبل التصفيف الحراري.

نصيحة سريعة لو بتعملي ماسك بامية في البيت:
• اغلي البامية حوالي 5 دقائق فقط اول ونزليها طوالي لو عرضتيها لي درجة حرارة عالية الجل بتكسر
• صفيها وهي ساخنة عشان تطلعي أكبر كمية من الجل
• ممكن تضيفي نقطتين زيت جوجوبا لزيادة الترطيب و اللمعان
ماسك البامية الطبيعي عندنا في براند Amna hair care ركزنا فيه على استخلاص أنقى "Mucin" مع إضافة بروتينات حرير وزيوت علاجية، عشان يديكي نتيجة الصالونات وأنتِ في البيت وبمكونات طبيعية

#آمنة