د. سماح طه عبد الخالق

رحلة علاج .... والفضل لله ثم لصبر المريضة 💕

كل عام وأنتم بخير ، ربنا يحقق أمانيكم ، ويعود علينا بالأمن والأمان والصحة والسلامة .

✨✨ ٣٠ رمضان

انقضى شهر الرحمة ، تقبل الله منا ومنكم صيامه وقيامه قبولا حسنا .

وآخر ما نختم به سلسلة #ثقافةجلدية

⚡⚡ الجمال ما لون واحد ❌

ليه بنقارن روحنا بالآخرين ؟ ليه بنحاول نكون نسخة تانية ؟ وننسى إنو في الأصل نحن كويسين زي ما نحن. الفكرة ما إنك ما تتغير، لكن إنك ما تبدأ التغيير من إحساس إنك “ناقص”.

⚡⚡ الجمال ما لون واحد ❌

وفكرة انه اللون الأبيض هو معيار الجمال الأوحد اقتربت من الاندثار ، الناس بدت تقتنع انه الجمال في التنوع، وفي إنك تكون مرتاح في لونك وهويتك زي ما هي.
شكلنا قربنا نتخلص من اللهث وراء منتجات التفتيح و التبييض😌
ومفهوم " الفسخ والجلخ " حيبقى من الماضي باذن الله ✋😄

ودمتم بعافية 🌺

#ثقافةجلدية #تسميرالبشرة #فسخ #وجلخ #جالخات

✨✨ ٢٩ رمضان

هل الشفايف لازم تكون وردية؟ 🤔

كتير من الناس، خاصة أصحاب البشرة الداكنة، بيفتكروا إنو الشفايف المفروض تكون وردية عشان تكون “صحية” أو “جميلة”… لكن الحقيقة غير كده 👇
لون الشفايف الطبيعي بيختلف من شخص للتاني، وبيعتمد على صبغة الجلد (الميلانين).
يعني ممكن تكون:
• وردية
• بنية
• أو أغمق شويه .

وكلها ألوان طبيعية 100% 👌

طيب لو الشفايف بقت وردية بعد ما كانت غامقة؟
في الغالب دا طبيعي، وممكن يكون بسبب:
• تحسن في الترطيب .
• تقليل التعرض للشمس .
• إيقاف منتجات كانت مسببة تهيّج أو تصبغ (زي حالات Contact dermatitis) الاكزيما التلامسية .

متين نقلق؟
لو التغيير في اللون جاء مع:
• تعب عام أو دوخة : ممكن يكون في Anemia .
• تقرحات أو ألم .
• تغير مفاجئ شديد في اللون د

هنا الأفضل مراجعة طبيب جلدية 👩‍⚕️

الخلاصة:
ما في لون واحد “صح” للشفايف…
والأهم هو صحتها، مش ترند اللون ✨

#توريدـالشفايف

هل هو إجراء ضروري؟

لا. توريد الشفايف إجراء تجميلي اختياري فقط، ما عنده أي ضرورة طبية.
لون الشفايف الطبيعي (فاتح أو غامق) ما مشكلة صحية.

طيب كإجراء تجميلي كيف بيتم ؟
ممكن يكون بطرق مختلفة زي:
• ليزر او جلسات ديرما بن .
• تقشير كيميائي خفيف .
• أحياناً منتجات تفتيح طبية .

هل النتيجة دائمة؟

غالباً لا ❌
النتيجة بتكون مؤقتة، لأنه :
• التصبغ ممكن يرجع مع الشمس .
• أو مع التدخين والجفاف .
• أو لو السبب الأساسي ما اتعالج .

يعني محتاجة جلسات متكررة + عناية مستمرة

نقطة مهمة جداً:
لو في تصبّغ بسبب التهاب أو تحسس (زي Contact dermatitis)، لازم نعالج السبب أول…
وإلا النتيجة ما حتستمر.

الخلاصة:
توريد الشفايف:
✔️ اختيار تجميلي .
✔️ نتيجته مؤقتة .
✔️ أفضل نتائج بتكون مع عناية مستمرة وروتين صحيح .

ودمتم بعافية 🌺

#ثقافةجلدية #توريد #شفايف #لب #بالم #تصبغات
#لون #وردي #ليزر #ديرمابن

✨✨٢٩رمضان

⚡⚡ النخالبة المبرقشة (Pityriasis Versicolor) :

هي حالة جلدية شائعة جداً ناتجة عن زيادة نمو فطر طبيعي موجود في الجلد اسمه ملاسيزيا Malassezia، وبتظهر كبقع مختلفة اللون.

🔬 بتصيب منو أكتر؟

النخالية المبرقشة بتظهر غالباً في:
* الشباب والمراهقين (بسبب زيادة إفراز الدهون في الجلد).
* الناس البشرتهم دهنية .
* الأشخاص في المناطق الحارة والرطبة (زي عندنا في السودان) ☀️
* الناس البتتعرق كتير .
* مرضى ضعف المناعة أو الناس البستخدموا كورتيزون لفترات طويلة .
* ممكن تظهر أكتر في الناس البعندهم تاريخ سابق بيها (بتتكرر)

🎨 الأعراض والشكل:

بقع فاتحة، غامقة أو وردية
قشور خفيفة (بتظهر أكتر عند الحك أو الفرك)
غالباً في الصدر، الظهر، الرقبة، الكتفين
نادراً حكة خفيفة
بتكون أوضح بعد الشمس لأن الجلد الطبيعي بيسمر والبقع لا

المرضى عادة بيكونوا خايفين لانه بيخلطوا بينها وبن البهاق vitiligo ✋

لكن عين الطبيب الخبيرة بتفرق بيناتهم بسهولة ،

🧪 التشخيص:

غالباً بالفحص السريري ،
ممكن الطبيب يستخدم جهاز بسيط اسمه وود لامب Wood’s lamp أو كشط بسيط للجلد .

⚖️ الفرق بين النخالية المبرقشة (Pityriasis Versicolor) والبهاق (Vitiligo) :

🔍 اللون:
النخالية المبرقشة: بقع فاتحة أو غامقة، وما لونها أبيض ناصع .
البهاق: بقع بيضاء واضحة جداً زي لون الحليب . (milk-white) .

🧩 الحدود:
النخالية: حدودها غير واضحة وممكن تكون متداخلة
البهاق: حدود واضحة ومحددة .

🧴 القشور:
النخالية: فيها قشور خفيفة (بتظهر مع الحك 👌)
البهاق: بدون أي قشور ❌

📍 أماكن الظهور:
النخالية: الصدر، الظهر، الرقبة، الكتفين
البهاق: ممكن يظهر في أي مكان، خاصة الوجه، اليدين، وحول الفم والعينين .

☀️ مع الشمس:
النخالية: بتكون أوضح بعد الشمس .
البهاق: برضو بتكون واضحة لكن ما بتتغير بالقشور .

🔬 السبب:
النخالية: فطر سطحي
البهاق: مرض مناعي (الجسم بيهاجم الخلايا الصبغية) .

💊 العلاج:

مضادات فطريات موضعية:
(شامبو أو كريمات زي كيتوكونازول او سلينيوم سلفايد .
الحالات الواسعة أو المتكررة:
ممكن تحتاج علاج حبوب مضادة للفطريات بالفم .

⏳ معلومة مهمة:

اللون ممكن يتأخر يرجع طبيعي لعدة أسابيع أو شهور
🔁 هل بترجع؟
نعم، لأنها مرتبطة بطبيعة الجلد والجو
لذلك ممكن نستخدم علاج وقائي (مثلاً شامبو مضاد فطري مرة في الأسبوع)

💡 نصائح للوقاية:

تقليل التعرق والحر الشديد .
لبس ملابس قطنية .
الاستحمام بعد التعرق .
تجنب الزيوت الثقيلة على الجلد .

ودمتم بعافية 🌺

#ثقافةجلدية #نخالةـمبرقشة #امراض #جلدية
#فطريات #كيتوكونازول

✨✨ ٢٨ رمضان

تصبّغ الشفاه (Lip hyperpigmentation) حالة شائعة جداً في عيادات الجلدية .
هو تغيّر لون الشفايف للغامق (بني، رمادي أو أسود خفيف) بدل اللون الطبيعي.
الأسباب الشائعة:
• الشمس: التعرض المستمر بدون حماية .
• التدخين: من أهم الأسباب .
• الجفاف وقلة الترطيب .
• التحسس من منتجات (زي الروج أو معجون الأسنان) ، ممكن يكون جزء من اكزيما تلامسية .
• ل*ق الشفاه باستمرار .
• نقص بعض الفيتامينات (زي B12 أحياناً) .
• استخدام منتجات فيها عطور أو مواد مهيجة .

كيف نمنع أو نقلل التصبغ؟
• استخدام Lip balm / ليب بالم فيه واقي شمس (SPF) .
• الإكثار من الترطيب .
• تجنب ل*ق الشفاه .
• إيقاف المنتجات المسببة للتحسس .
• شرب موية كفاية .
• لو في تدخين : تقليلو أو إيقافه .

العلاج:
بيعتمد على السبب، لكن ممكن يشمل:
• مرطبات طبية
• كريمات تفتيح خفيفة (تحت إشراف طبي) .
• علاج التحسس لو موجود
• في حالات معينة: إجراءات زي التقشير الخفيف .

معلومة مهمة:
أي تصبغ مفاجئ، شديد، أو مصحوب بتقرحات أو نزيف لازم يتفحص، لأنو نادراً ممكن يكون مرتبط بحالات طبية تانية.

ودمتم بعافية 🌺

#ثقافةجلدية #تصبغات #واقي #شمس #شفاه

✨✨٢٧ رمضان

⚡⚡التهاب الجلد حول الفم (Perioral Dermatitis)

مشكلة بسيطة لكن مزعجة!

في ناس كتير بلاحظوا ظهور حبوبات صغيرة حمرا أو جافة حوالين الفم، وأحياناً مع حكة خفيفة أو حرقان ،
دي نوع من التهابات الجلد، بتحصل غالباً حوالين الفم (وأحياناً حوالين الأنف أو العيون)، وبتكون على شكل حبوب صغيرة مع جفاف وتقشر.

بتظهر ليه؟
من أشهر الأسباب:
• استعمال كريمات فيها كورتيزون لفترة طويلة (حتى لو كانت خفيفة)
• معاجين الأسنان القوية أو فيها فلورايد عالي .
• مستحضرات التجميل التقيلة أو الكتيرة .
• الترطيب الزائد أو استخدام كريمات كتيرة في نفس الوقت .

كيف شكلها؟
• حبوب صغيرة حمرا أو بنية .
• جفاف وتقشير .
• أحياناً إحساس بحرقان أو لسعة .
• المميز إنها بتكون حوالين الفم لكن الشفايف نفسها غالباً سليمة .

أهم نقطة لازم تنتبهوا ليها:
كتير من الناس أول ما يشوفوها يستخدموا كورتيزون… ودي أكبر غلطة!
الكورتيزون ممكن يحسنها مؤقت، لكن بعد فترة بترجع أسوأ من الأول.

العلاج شنو؟
• أول خطوة: نوقف أي كورتيزون على الوجه
• نقلل المنتجات ونبسط الروتين
• استخدام غسول لطيف وكريم خفيف
• في بعض الحالات بنحتاج كريمات أو مضادات حيوية يكتبها طبيب الجلدية

نصيحة مهمة:
ما تجربوا أي كريم عشوائي على الوجه، خصوصاً الكورتيزون، لأنو ممكن يحول المشكلة البسيطة لحاجة مزمنة.

لو لاحظتوا الحالة دي، الأفضل تستشيروا طبيب جلدية بدري 👌

ودمتم بعافية 🌺

#ثقافةجلدية #تصبغات #حبوب #كورتيزون

✨✨ ٢٦ رمضان

الثعلبة… هل فعلاً مرض خطير؟

كتير من الناس فجأة يلقوا في فروة الرأس أو اللحية بقعة فاضية من الشعر شكلها مدور أو بيضاوي، والشعر فيها واقع تماماً. الحالة دي اسمها الثعلبة.

شنو هي الثعلبة؟
الثعلبة مرض مناعي بسيط، يعني جهاز المناعة في الجسم بالغلط بيهاجم بصيلات الشعر، فالشعر في المنطقة دي بيقع. لكن المهم تعرفوا إنو البصيلة نفسها ما بتموت، عشان كده الشعر ممكن يرجع ينبت تاني.

هل الثعلبة معدية؟
لا. الثعلبة ما معدية نهائي وما بتنتقل باللمس ولا بالمشاركة في المشط أو المخدة.

شنو أسبابها؟
السبب الحقيقي لسه ما معروف تماماً، لكن في عوامل ممكن تساعد في ظهورها زي:
• التوتر والضغوط النفسية
• وجود تاريخ في العائلة
• بعض أمراض المناعة

كيف شكلها؟
غالباً بتكون:
• بقعة ناعمة خالية من الشعر
• حدودها واضحة
• ممكن تكون في الرأس، اللحية، الحواجب أو أي مكان في الجسم

هل الشعر بيرجع؟
في كتير من الحالات الشعر بيرجع لوحده خلال شهور. وأحياناً بنحتاج علاج بسيط من طبيب الجلدية يساعد في رجوع الشعر أسرع.

العلاج شنو؟
العلاج بيختلف حسب الحالة، ومن أشهرها:
• مراهم أو لوشنات طبية
• حقن كورتيزون موضعي في البقعة
• أدوية تنشط نمو الشعر

معلومة مهمة:
الثعلبة ما معناها إنو الشعر حيقع كله، ومعظم الحالات بتتحسن كويس بالعلاج.

لو لاحظت بقعة فاضية في الشعر، الأفضل تمشي لطبيب جلدية بدري عشان التشخيص والعلاج المناسب.

✨✨ ٢٥ رمضان

#كريم #واقي #الشمس

#ثقافةـجلدية

كريم واقي الشمس ما رفاهية!

في ناس قايلين واقي الشمس (Sunscreen) ده رفاهية ، أو فلهمه ساي 😒 بس الحقيقة الطبية انه مهم جدا وأهم من خلطة التفتيح البقت كأنها شي الزامي عند كل ست وفتاة ! 🙄

​⚡ ليه لازم نستخدمه؟

أشعة الشمس فيها نوعين خطرين جداً من الأشعة فوق البنفسجية:
​أشعة UVA: دي الـ "سوسة" الحقيقية، بتخترق طبقات الجلد العميقة وبتكسر "الكولاجين" و"الإيلاستين" (الألياف المسؤولة عن شد البشرة) و النتيجة تجاعيد مبكرة وخطوط وترهل قبل الأوان .
​أشعة UVB: دي المسؤولة عن "الحرقة" المباشرة، التصبغات، والغمقان السريع، وبعض الأمراض الجلدية ، طبعاً أخطر حاجة إنها بتدمر الحمض النووي (DNA) في خلايا الجلد وده ممكن يؤدي لسرطانات الجلد لا قدر الله.

⚡ كيف نختار الواقي الصح؟

ما تشتروا أي علبة وخلاص، ركزي في المصطلحات دي:

* ​Broad Spectrum: واسع الطيف
معناها بيحمينا من النوعين (UVA & UVB).

* ​SPF 30 or higher: معامل الحماية

في جونا ده، أي حاجة أقل من 30 ما بتخارج. الـ 50 بتدي حماية حوالي 98%.

* ممكن نلقى واقي شمس على شكل جل او كريم ، نختار النوع المناسب لبشرتنا سواء دهنية او جافة او حساسة ، الصيدلي ممكن يساعدنا في الاختيار .

​⚡ الكمية قدر شنو ؟
(قاعدة الإصبعين):
عشان ناخد الحماية المكتوبة في العلبة، لازم نستخدم كمية كافية (خطين على طول اصبعين ) وتوزعيها على وشك ورقبتك.
وكمية اضافية للأيدي .

​🌀 معلومة مهمة :
واقي الشمس ما "كريم تفتيح"، هو "كريم حماية". لو استخدمناه بانتظام، اللون بيرجع طبيعي والبشرة حتكون صحية ومشدودة، والأهم من كده وقاية من سرطانات الجلد باذن الله .

🌀 معلومة أهم :
​حتى لو قاعدين في البيت قدام الشباك، أو لو الجو مغيم و"كتاحة" .. برضو الأشعة الضارة دي بتخترق الغيوم والقزاز وتصل لجلدنا ! يبقى استعمال كريم واقي الشمس ضروري حتى داخل البيت .

#تصحيح مفاهيم :
واقي الشمس ما بس للنساء ✋
اخوانا الرجال : انتو محتاجينه برضو لحمايتكم من بعض الأمراض الجلدية والحساسية المتعلقة بالشمس وزي ما قلنا من سرطانات الجلد .

ودمتم بعافية 🌺

✨✨ ٢٤ رمضان

​🚫 "قالوا وقلنا".. ٥ خرافات جلدية بنسمعها كتير ❌
​
​1️⃣ الخرافة: "صابون الكبريت والديتول هم الحل المثالي للحبوب والنظافة!" 🧼🚿
​الحقيقة: العكس تماماً! الصوابين دي قوية شديد (Harsh) وبتمسح الطبقة الدهنية الطبيعية ال بتحمي جلدك. والنتيجة الجلد بيجف شديد وبيحصل فيهو "تهيج"، وعشان يعوض الجفاف ده، بيقوم يفرز دهون أكتر، والنتيجة حبوب أكتر وتحسس. الأفضل دايماً تستخدمي غسول طبي متوازن (pH balanced) عشان تنظفي من غير ما تدري جلدك.

​2️⃣ الخرافة: "الفازلين بالنهار بيسود الوش وبيحرقه!" 🔥🧴
​الحقيقة: الفازلين أصلاً ما بغير لون الجلد، لكن لأنه "زيتي" وسميك، لو طلعتي بيهو في شمس السودان الحارة دي، بيحبس الحرارة وممكن يسبب تهيج أو "لذعة" شمس. هو مرطب ممتاز للبيت بالليل، لكن ما بديل لـ "واقي الشمس" بالنهار.

​3️⃣ الخرافة: "معجون الأسنان بينشف الحبة وبضيع أثرها!" 🦷🪥
​الحقيقة: المعجون فيهو مواد حارقة (زي المنثول والتريك لوزان) بتجفف الحبة فعلاً، لكنها بتعمل "حرق كيميائي" وبتخلي مكان الحبة بقعة سوداء أصعب في علاجها من الحبة نفسها. خليك في العلاج الطبي أحسن.

​4️⃣ الخرافة: "لازم تفركي جسمك بالليفة (القوية) عشان تنظفي الجلد الميت!" 🧼🧽
​الحقيقة: الدعك القوي والفرك العنيف بيعمل تهيج وجفاف شديد ، وبيحصل رد فعل عكسي وبيفرز صبغة أكتر، وده بيسبب "اسمرار" في المفاصل والركب. النظافة بالراحة والترطيب هو السر.

​5️⃣ الخرافة: "الكريمات المخلوطة (الخلطات) بتصفي البشرة وبترجعها مراية!" ✨🧪
​الحقيقة: الخلطات دي "قنبلة موقوتة". غالباً بكون فيها كورتيزون بتركيز عالي أو زئبق. بتديك نتيجة سريعة في أسبوع، لكن بعدها الجلد بيترقق ، العروق بتظهر، والحبوب بتطلع وما بتتعالج بسهولة. "السمح" هو الجلد الصحي، ما اللون الفاتح بالمركبات الخطرة.

ودمتم بعافية 🌺

#كريمات #صباعات #حارة
#ثقافةـجلدية