J'Den 3RJ OS

SUGATANG OPERATIBA NG SWAT SA CEBU CITY, PINARANGALAN NG PNP DAHIL SA KANYANG KABAYANIHAN

Bilang pagtugon sa panawagan ni Pangulong Ferdinand R. Marcos Jr. na bigyang-pugay at suportahan ang kabayanihan ng ating mga uniformed personnel, kinikilala ng Philippine National Police (PNP) ang katapangan ni Police Senior Master Sergeant (PSMS) Allain Abellanosa, isang miyembro ng Special Weapons and Tactics (SWAT) ng Cebu City Police Office (CCPO), na nasugatan habang matapang na ginagampanan ang kanyang tungkulin sa isang delikadong operasyon.

Ayon sa ulat, noong Marso 27, 2025, rumesponde si PSMS Abellanosa at ang kanyang team sa isang tensyonadong domestic dispute sa Balagtas Street, Barangay Pahina Central, kung saan sangkot ang isang kilalang suspek na kinilalang si “Cardo.” Sa simula ay maayos ang negosasyon, ngunit biglang naging marahas ang suspek at nagpaputok ng baril.

Habang sinusubukang maayos ang sitwasyon sa mahinahong paraan, tinamaan si PSMS Abellanosa ng mga fragment mula sa semento sa kaliwang sentido matapos tamaan ng bala ang pader. Isa pang tumalbog na bala ang tumama sa kanyang kaliwang braso. Kahit sugatan, mabilis na kumilos ang kanyang mga kasama upang ma-neutralize ang banta at matiyak ang kaligtasan ng mga residente. Agad namang isinugod sa ospital si PSMS Abellanosa para sa lunas.

Bilang pagkilala sa kanyang katapangan at sakripisyo, ginawaran siya ng Medalya ng Sugatang Magiting at Medalya ng Kagalingan. Tiniyak din ng PNP na sasagutin ang lahat ng gastusing medikal ni PSMS Abellanosa at ng kanyang pamilya. Bukod pa rito, nagbigay rin ng tulong pinansyal at pormal na inihayag ang kanyang endorsement para sa meritorious promotion.

Simula pa nang pumasok sa serbisyo noong 2009 bilang miyembro ng PNP Class "IDLAS," pinangarap na ni PSMS Abellanosa na maging bahagi ng elite SWAT unit. Mula nang mapasama siya sa CCPO SWAT team noong 2022, palagi niyang ipinapakita ang dedikasyon bilang isang lingkod-bayan—matatag sa oras ng panganib at laging handang magbuwis ng sarili para sa seguridad ng kanyang komunidad.

Bukod sa pagiging pulis, isa rin siyang mapagmahal na asawa sa kapwa niya miyembro ng PNP at ama ng dalawang batang anak. Ang kanyang paggaling ngayon ay sumasalamin sa katatagan at tunay na dedikasyon—isang buhay na patunay ng tapang sa serbisyo para sa kapayapaan at kaayusan.

Pinuri ni PNP Chief, Police General Rommel Francisco D. Marbil, ang kabayanihan ni PSMS Abellanosa at sinabi: “Si PSMS Abellanosa ay huwaran ng isang tunay na pulis. Ang kanyang katapangan sa gitna ng panganib ay sumasalamin sa pinakadakilang tradisyon ng aming hanay. Ang kanyang kwento ay kwento rin ng PNP—handa kaming mag-alay ng buhay para sa bayan. Kaisa kami ng kanyang pamilya sa pagharap sa panibagong yugto ng kanyang buhay bilang isang bayani.”

Mananatiling tapat ang Philippine National Police sa pagkilala at pagsuporta sa mga alagad ng batas na buong tapang na tumutupad sa tungkulin—naglilingkod sa bayan nang may integridad at sakripisyo.

MGA SCALAWAG DI DAPAT KAAWAAN: PNP, KUKUMPISKAHIN ANG MGA FRUITS OF THE CRIME

Kasunod ng panawagan ni Pangulong Ferdinand R. Marcos Jr. para sa pananagutan at malinis na pamamahala, pinalakas ng Philippine National Police (PNP) ang kanilang paglilinis laban sa mga rogue cops, na nagsasabing ang mga mapapatunayang nagkasala ay hindi lang matatanggal o makukulong — pati na rin ang mga pera mula sa ilegal na transaksyon ay sasamsamin.

“Marami na kaming napatanggal, meron na rin tayong napakulong, at patuloy na tinatanggal ang mga wala nang puwang sa ating hanay. Ang paglilinis sa PNP ay tuloy-tuloy at hindi kami titigil,” wika ng Chief PNP.

Nagbigay siya ng matinding babala sa mga tiwali sa hanay ng kapulisan: “Kung pipiliin niyong mainvolve sa ilegal na gawain, maghanda kayo — hahanapin namin kayo at pati na ang mga ari-arian niyong nakuha mula sa inyong mga krimen. Susuriin namin ang inyong mga bank accounts at mga ari-arian para mabawi ang mga perang ninakaw niyo. Hindi lang kayo matatanggal o makukulong — sisiguraduhin naming mawala lahat ng inyong pinaghirapan sa pamamagitan ng katiwalian.”

Inulit ng Chief PNP na walang “second chance” para sa mga may kasalanan sa kapulisan, at walang sinuman ang nakatataas sa batas.

Nagbabala rin ang hepe ng PNP sa lahat ng establisimyento o indibidwal na nagsisilbing tagapagdala o kasangkapan sa paglilinis ng ilegal na pera o tumutulong sa mga krimen, direktang o hindi direktang kasangkot, na haharap sa buong pwersa ng batas. Ang mga negosyo o mga financial institution na kasangkot sa pagtatago o pag-facilitate ng illegal na proceeds ay pananagutin at kakasuhan.

“Hindi lang ito tungkol sa pagpaparusa sa mga nagkakamali — ito ay tungkol sa muling pagbabalik ng integridad, tiwala, at pananagutan sa serbisyo-pulis. Karapatan ng mga Pilipino ang magkaroon ng mga tapat na alagad ng batas na nagpapatupad ng batas, hindi ang mga umaabuso nito,” pahayag ng pamunuan ng PNP.

Hinihikayat ng PNP ang publiko na maging mapagmatyag at makipagtulungan sa pamamagitan ng pag-report ng mga kahina-hinalang gawain o ilegal na aktibidad ng mga miyembro ng kapulisan.

“Walang lugar para sa mga scalawags sa PNP. Ang mga magtatangkang lumabag sa direktibang ito ay haharap sa mga parusa — hindi lang pagkawala ng pwesto kundi pati ang pagkawala ng lahat ng kanilang nakaw na yaman,” dagdag pa ng Chief PNP.