Ayla

Merci de faire partie de mes followers les plus actifs ainsi que de ma liste hebdomadaire des interactions ! 🎉 ام بشير, Douja Djamal, Ameni Majdallah, Walid Boukerche, Oussama Oussama, Karim Saltani, ام سيرين, Razona Razona, ولدي قرة عيني, مريم مريم

البقلاوة أنواعها و أسرارها
1)- البقلاوة بإستعمال #آلة حل العجينة
@ طريقة بقلاوة تبقى مقرمشة حتى شهر ما يتغيرش ذوقها نعطيكم كمية تاع عرس يعني سينية كبيرة تاع العراس تقطع 180 حبة ونتوما ديرو قد ما حبيتو وفي نفس الوقت تجي 2 سنيوات تع الفور 30/35 ..
- نحتاجو تقريبا 3 كلغ فرينة .و بين 3 حتى 4 كلغ لوز او كوكاو حسب حجم الحبة تاع البقلاوة الي حبيتوه .
بالنسبة لليدام الي نخدمو بيه نستعملو علبة تاع سمن 1.8 كلغ ( نحتاج كيلو و800 غ ) مع 500 غ مرغرين التوريق نذوبوهم مع بعض ونحطوهم جانبا..
- وتحتاجو معاها 5 كلغ عسل.
بالنسبة للعجين : 3 كيلات فرينة مغربلة مع نص كيلة ليدام الي حضرناه نخلطوهم مليح و نجمعوهم بالماء و ماء زهر ،العجينة تكون شوي طرية ماشي يابسة ،نعجنوها مليح و نخليوها تريح على الاقل 2 سوايع ومن الاحسن تريح ليلة كاملة تعطيكم نتيجة روعة.
- دايما تحطو الخليط تاع ليدام فوق نار هادئة باش يبقالكم ذايب.وكي تجيو تخدمو بيه حركوه قبل خطراش مرغرين تهبط للتحت .
- اولا ادهنو الصينية تاعكم بطبقة مليحة تاع ليدام
- العجينة اذا لقيتو فيها الحبيبات عقبوها ثلاث مرات 3 في المشينة يتنحاولكم ..
- تبداو تحلو العجينة في رقم 1 من بعد رقم 4 من بعد رقم الاخير.جامي تزيدو الفرينة للعجين باش تحلوها رشو ايديكم بالفرينة و امسحو العجين .
- الحاشية تاع صينية لازم تكون شوي عالية باش تجيكم بقلاوة مليحة و عالية.
- العجين كي تخرجوها من المشينة لازم تزيدو تكسلوها مليح بايديكم تجبدوها مليح كيما نحلو المسمن تجيكم رقيقة
- كل ما تحطو طبقة خرجو منها الهوا و ادهنوها مليح بليدام باش تجيكم مقرمشة ومورقة
- ديرو 7 طبقات و الطبقة الاخيرة ما نديروش فيها ليدام باش نحطو فوقها الحشو
الحشو : هنا كل وحدة ومقدورها دير لوز ولا لوز وجوز ولا كوكاو ولا دير حشو طبقات ضك نحكيلكم عليه
- اولا المقدار هو 3 كيلات لوز بنص كيلة سكر عادي باش ما تجيكمش حلوة تقهم خطراش نديرولها العسل
- احسن البقلاوة هي الي تجي باللوز بقشورو بلا ما تحمصوه ارحيوه و اخدمو بيه عندها ذوق رائع
- اذا درتو جوز و لوز تقدرو ديرو 2 ونص لوز ونص كيلة جوز
- اذا درتو لوز مقشر لازم تحمصوه باش ديرو بقلاوتكم .
- اذا حبيتو ديرو كوكاو تقدرو تستعملو الكوكاو الي بذوق اللوز الي درتو في درس سابق او تقدرو كوكاو بصح حمصوه مليح،
- اذا حبيتو بقلاوة بحشو طبقات ملونين ديرو الطبقة الاولى كيلة ربع جوز و الباقي لوز و الطبقة الثانية كيلة بيستاش و الطبقة الثالثة كيلة لوز مقشر محمص.
- الي ما عندهاش تقدر دير الكيلة الاولى طبقة كوكاو بقشورتزيدلو عطر الجوز .و الطبقة الثانية كوكاو بذوق البيستاش و الطبقة الثالثة كوكاو بذوق اللوز هاذو الي حطيتلكم طريقة تحضيرهم في درس سابق.
خلطو الحشو ديرولو ليدام مليح كيما نديرو بربوشة –طعام – افتلوه مليح ،جامي ديرو الحشو بماء زهر خطراش هو الي يخليها تجي معجنة ، كي تشبعوه ليدام احكمو فرشوه فوق طبقات البقلاوة من بعد رشوه كامل غير بشوي ماء زهر ما تكثروش..
- كي تكملو حطو 7 طبقات لخرين تاع العجين بنفس الطريقة .من بعد كي نكملوهم ،نحيو الحواف تاع العجين اضغطو عليها بالحلال ،من يعد احكمو موس قلبوه يعني اخدمو بقفاه ،دخلوه في الفرينة و دخلو هاذيك الحاشية تاع البقلاوة هكذا باش كي طيب ما تجيكمش خارجة طالعة لفوق..
- قطعوها كيما حبيتو سواء مربعات ولا مقروطات دايما الموس نتاعكم دخلوه في الفرينة و تقطعو بالجهة الماضية
هنا البقلاة الصينية الكبيرة اذا قطعتوها شكل مقروطات تقطعلكم 180 حبة الى 200 حسب الحجم.واذا درتوها مربعات تقطعلكم 160 حبة
ديكوريوها كيما حبيتو و ارشقو فيها حبات لوز و غطيوها مليح بليدام .
حطوها طيب ساعة كاملة على 180 درجة في فور شعلوه ربع ساعة من قبل كي تلقاو بلي اللون تاع الحواشي حمارو مليح و تكمشو شوي و طلعو اعرفوها بلي طابت زيدو حمروها من فوق ،كي تطيب مباشرة فرغو عليها العسل و بيتوها ليلة كاملة باش تقطعوها.
- العسل عمركم ديرو فيه ماء زهر خطراش يومين تلاثة ترجعلكم بقلاوتكم بلاستيك اشريوه واجد..
2)- البقلاوة بدون إستعمال #آلة حل العجينة .
عليك وعلا ذراعك..
5كيلات فرينة من نوع لميلح (سيم) + كيلة مخلطة (سمن + زبدةتوريق ذايبة نص/ بنص )+ نصف كيلة مايزينة + ملعقتين كبار سكر رطب + ملعقتين خل ابيض +ملعقتين ماء الزهر+ فاني بودر حسب الرغبة+ قرصة ملح
ونعجن بالماء بارد ونحط جميع المواد في اناء البيتراونعجن بيد وانحطها تعجن امليح ونتحصلو على عجينة متمسكة وطرية في نفس الوقت ونكورها كريات ونخليها تريح ليلة كاملة في ثلاجة ..
نقسم العجينة 12 كرية ونرمدهم في المايزينة ونحل بلوحدة قرصات قد بعض ثم نحط كل 6 فوق بعض ونعمر بيناتهم المايزينة ونحل العجينة رقيقة طول، حبيباتي هنا ندهن بلاطو بالزبدة ونحط العجينة ونتخلص من الحواف الزائدة نحط الحشوة ونعاود نغطي بالعجينة بنفس الطريقة ونقطعها كيما نحب ونشربها بالسمن ونخليها ترتاح باش نطيبها،
الحشو: 3كيلات لوز اوكاوكاو او لوز مع جوز نص بنص مرحي متوسط نوع ما رقيق حسب الرغبة واش عندك .
كيلة الا ربع سكر عادي +ملعقتين سمن ذايب +قشور قارص + فاني غبرة ونفتل بالماء الزهر ماندريهاش عجينة تجيء كي بربوشة
3)- بقلاوة سريعة:
ديري 3 كيلات فرينه +كيله مايزينة+ كيله زبده صالحه ذايبة وفانيليا وحبه بيض ورشه ملح ولمي بماء زهر وماء وخليها ترتاح كل ما ترتاح تجي روعه ، افتحي تجي روعه وكي تحلي حلي بالمايزينة ما تحليش بالفرينه وديري 4 قرصات من تحت و4 من فوق حلي الكرات مع بعض مش كل. وحدة وحدها،
الحشوه 3 كيلات لوز بكيله سكر وشوي قرفه اذا حبيتى وطبقه لي رح تحطي عليها الخليط ما تدهنيهاش بالسمن وكي تدهني بين طبقه واخره ادهنى شوي وذري شوي نشاءبش تجيك مورقه ومعد ما تكملي كلش ادهنى الطبقه الاخيره بزاف سمن وحطيها تشرب ليله كامله وكي طيب شربيها بعسيله .
4)- بقلاوة بعجينة الفيلو
نشري العجينة جاهزة
جيبي بلاطو تدهنيه بالسمن الذايب وجيبي لابات فيلو نتاعك حطيها بالطبقة وكل طبقة ادهنيها بالسمن الذايب حتان تكملي عشر طبقات ديري الحشو نتاعك تكوني وجدتيه من قبل ديري طبقة نتاع الحشو ماتكونش عالية بزاف سقميه بيدك مليح وادهني بالسمن وابداي تحطي لابات نتاعك كيما الاولى بين كل ورقة وورقة ديري سمن ذايب حتان تكمل عشر طبقات وكي تكملي قطعيها بالموس الشكل لي تحبي وديريلها السمن من الفوق مليح ودخليها طيب كي طيب وتكمل شربيها بالعسل تكوني دفيتيه من قبل وخليتيه يبرد وخليها تشرب مليح
الحشو 300 غ كوكاو محمص ومرحي او لوز لي تحبي 125 غ سكر بني او العادي م ك فرينة م ص تحبي تزيدي ذوق لي تحبي لوز جوز .
5)- بقلاوة الديول
طيبت واستعملت الديول
•كأس و نصف فرينة
• كأس ماء
•ملعقة زيت
•رشة ملح
نطيبوهم ب بانسو سيلكون على مقلات تيفال.
*من بعد ندهن سنيوا بالزبدة و نضع 5 ورقات ديول و في كل الورقة ندهنها بالزبدة بعد 5 ورقات نحط الحشو ديالي (3كيلات كاوكاو+كيلة سكر +رشة قرفة و ماء الزهر) بعدها نكمل نفس الطريقة 5 ورقات ديول و كل روقة ندهانها. طريقة سهلة و بسيطة نقطها حسب الشكل المرغوب و نضعها في فرن سخن و نتركها مدة ساعة و نصف على 180درجة . كي طيب نشربها بالعسل دافئ . و نخليها تبات حتى ترطاب و تتشرب مليح.
6)- بقلاوة الظفيرة
هنا نختار اي عجينة بقلاوة رح نشرح المبدا فقط انا نحب السريعة لي نخدم بيها دوما،
نجيب عجينة البقلاوة ونحط 5-6 ورقات فوق بعض، ونحلها مستطيل طوله حيب طول البلاطو لي عندك ، والعرض 18 سم ، نحط الحشوة في منتطف المستطيل ونقطع الاطراف بطول 5 سم علا الجهتين جهة اليسار وجهة اليمين الشرائط هاذو رح تكون المسافة تاعهم 1 سم فقط ونبدا نظفر كيما الظفيرة تع الشعر حتى نكمل المستطيل ، نهزو ونرتبو في البلاطو وهكذا ثم نقص البقلاوة ونشربها بلي دام ونخليها تبات غدوة من ذاك نطيبها ونعسلها ..
7)- بقلاوة الشامية
أيضا رح نشرح الطريقة فقط العجينة تقدرو تستعملو السابقين طبعا ، وحتى عجينة الفيلو..
لما نحل العجينة نقطعها مربعات بحيث الضلع 12-15 سم ، ونحط الحشوة في المنتصف ونطوي المربع من قطر للقطر يولي شكل مثلث نلصقو بياض البيض وهنا نحب نحشيها كرام باتيسيار كيما الصور لكن يلزم تستهلك خلال 4 أيام،
ثم ندهن المثلثات بلي دام نفضل سمن وحدو، ونطيبها ، طبعا في التعسيل مش رح تدي بزاف ،متغرقوهاش تتفتت..
8)- بقلاوة تركية مورقة
العجينة
4 كيلات فرينة +1 كيلة مارغرين {صول } مذوبة نعم السر هو مارغرين صول وهي خاصة بالحلويات وخصوصا الصابلي
+لفاني غبرة+ماء دافئ +ماء الزهر
الحشوة
3 كيلات لوز او كاوكاو على الطريقة الى قدمتها+1 كيلة سكر قلاصي+ لفاني +مبشور الليمون+ رشة قرفة + رشيها بماء الزهر على شكل فتيل
*ثم في الاخير السر انتاعها في العسل { عسل خفيف + السيرو } مخلطين مع بعض ديري كيلة ماء ب1/2 كيلة سكر والمقادير تختلف بالاختلاف حجم لي بغيتي
*متنساوش السر الثاني وهو ذوبي الزبدة صول مع السمن المدينة ودهني بين الطبقات
* بعدما تلمي العجينة وخليتيها ترتاح حليها مليح بالحلاّل او حليها في الالة وانثري اعليها المايزينة وخليها في الرقم الاخير او ماقبل الاخير حسب كل الالة وستفي الطبقات انتاوعك ومابين كل طبقة ادهنى بالزبدة صول مخلطة مع السمن ديري 7 طبقات من التحت ثم ديري في الطبقة 7 الحشوة دون وضع الزبدة وستفي كامل الحشوة انتاعك ثم ضعي الطبقات انتاوعك الباقية هم 6 طبقات منبعد قطعيها مربعات او مثلث ورشقي اللوز او الكوكاو او الجوزة كيماتحبي وزيدي ادهنى من فوق بالزبدة وخليها ترتاح شوية
سخنى الفرن انتاعك على 180 درجة وديري السنوى في الوسط وخليها مدة 45 د فقط طفي اعليها من الاسفل واشعلي اعليها من الفوق قدما تحمار ومن جهة اخرى اتكوني دفيتى العسل انتاعك وصنعتى السيروعادي ماهو ثقيل ماهو خفيف في الوسط ثم خلطيهم مع بعض وسقي البقلاوة انتاعك وخليها قدما تشرب العسيلة ديريها في ليكيسات
بالتوفيق لجميع وانشاء الله انكون اشرحتلكم مليح..
9)- بقلاوة رولي
هنا كاين 2 انواع لي بعجينة الفليو ولي بالعجينة العادية الفرق بيناتهم لي بعجينة الفيلو تجي معكرشة شوي بالمعنى كي تجي ترتبيها شكلها مايجيش مسطح كيما الاخرى، طبعا نفس المبدا
نجيب العجينة وندهن يسمن ذايب، بين الطبقات ، نحط 5-6 طبقات فوق بعضثم نحط في الحاشية الحشوة ونلف لفتين فقط ، ونقط نهز الحربوش ونحطو في البلاطو ونكمل كامل البلاطو نقص مقروضات او مربعات ونشربها بالسمن ثم نخليها مدة ونطيبها ونعسلها ،
أسرار البقلاوة:
#تظيفي حليب بودر للعجينة تجي تحفة.
#لي دام في البقلاوة الاحسن تخلطي سمن وزبدة ذايبة، زبدة كامل يصلحو زبدة صول لابال ، توريق صااالحة..
#العجينة تعجنيها بالحليب تجي روعة بصح الماء احسن .
#بسيي الفرينة مليح وغربليها باش تضيفي المكونات الاخرى،
#قد ماترتاح العجينة تعاونك في الخدمة الأحسن تبات ليلة كاملة.
#الحشوة مذابيك تنقصي السكر شوي علا خاطر رح تتعسل مباعد.
#بالاكي تشمخي الحشوة رشي فقط ، بعد يومين تولي عجين
#بالاكي من العسل يكون خفيف ومميه رح تتشمخ ايضا..
#مذابيك تحلي العجينة بالمايزينة ،
#ضروري تشربيها بلي دام ، وضروري تشربيها بالعسل ليلة كاملة.
#شعلي الفور يسخن مليح ثم حطي البقلاوة ونقصي نار 180-170،
#ديري ديكور بالعجينة لي تقعدلك ازهار وصدفة .. ورد .. او أخر طبقة عقبيها في الة تقطيع الرشتة وخليها من فوق تجي مقطعة،
#حاولي تغيري شكل مثلث مربع في تقطيع البقلاوة..
# # # # #من بين الأسئلة التي تطرح في امتحان شهادة التأهيل، هل تستعملين عسل مصنوع في البيت ام الذي يباع؟؟ وما الفرق بينهما؟ #هنا العسل الذي يباع مصنوع من الغلوكوز، ولي يخلي حبة البقلاوة تبقى أطول مدة شادة روحها..