Glow mirale

مشاهد النيران في ولايات الوطن تدمي القلب
اللهم بردا و سلاما …

هذي الايام راني متهلية فيكم بالمنشورات اللهم بارك 💚
رايحة نقلكم على سر
عرضو عليا نخدم منتج طبيعي بديل لوحد العلامة كيميائية
و مكاش هنا في الجزائر !! رايحة نغيب لفترة عن النشر و الصفحة للتفرغ الجيد لهذا المزيود
الشئ المؤسف انو لما ينجح مراحش يكون باسم علامتي (هذا هو الاتفاق
حبيت نوجّه شكر كبير لفريق العمل راهم على قدم و ساق و ديما يشجعوني لما يشوفوني تعبت و نقلهم اليوم مكاش خدمة

اتمنى لي و لكم التوفيق يا رب 💚

بالنسبة للدورة منسيتكمش …مزالها في البرنامج فقط نكمل بعض الانشغالات و اعلن عليها
حبيت ايضا نشوف رايكم ؟!
حاحبين الدورة تكون كاملة مكملة (يعني بالقواعد تع المنتجات الكيميائية و الطبيعية ) ؟
ولا تدو فكرة خفيفة على الكيميائي المتداول و ننتقل مباشرة إلى الطبيعي 100 %و كيفية استبدال هذا بذاك
و طريقة التفاعل و النسب لكل منتج و حسب البشرة ؟

ما هو الموضوع لي عندو علاقة ببشرتك و مزال إلى اليوم لم تفهميه ؟
نحاول نرد على اكبر عدد ممكن من التساؤلات باذن الله في منشور واحد 💚

حكينا من قبل انو العلماء لحد اليوم مزالهم يبحثو في تركيبة الجسم و خباياه …
و من بين الاعظاء لي مزالهم يدرسوها هي الجلد
زمان كانو يقولو انو هذا الجلد يمنع دخول البكتيريا و المواد الضارة يعني حاجز للحماية
لكن مع الدراسات و الأبحاث الجديدة تغيرت بزاف مفاهيم
عرفو انو خلايا الجلد في تواصل مستمر مع خلايا الجهاز المناعي
تخدم كيما حارس الأمن …إذا شاف سراق او دخيل يتواصل مباشرة مع الشرطة

اذا دخلت بكتيريا، فيروس، مادة مسببة للحساسية، أو حتى صار جرح صغير، خلايا البشرة تطلق رسائل كيميائية خاصة لجهاز المناعة على انو كاين خطر …يجي جهاز المناعة، و يقوم بالواجب على هذي تلقاو احمرار،سخونة خفيفة،انتفاخ،وأحيانا ألم (نتي تشوفيه التهاب بصح العلماء يشوفو رسالة استغاثة )
هذو كامل بدلو على انو جهازك المناعي بدأ يخدم
لكن احيانا يصرا مشكل اي خلل في التواصل بين البشرة و جهاز المناعة
هذاك الحارس يرجع اي شي يشوفو حتى و ماشي ضار يعطيط لهذيك الشرطة و يديرلها حالة استنفار و يتعبها باطل

وهذا تقريبا واش يصرا في بعض الأمراض الجلدية…
في الأكزيما، حاجز البشرة يكون ضعيف فتدخل مواد بسيطة، لكن البشرة تتصرف وكأنها خطر كبير، وترسل إشارات كثيرة لجهاز المناعة، فيبالغ في رد الفعل

في الصدفية، جهاز المناعة يرسل أوامر لخلايا البشرة باش تتجدد بسرعة أكبر من اللازم فتتراكم الخلايا وتظهر القشور…

حتى اصحاب الوردية تعرضهم لأمور بسطة كيما الحرارة ولا الطعام الحار ..البشرة ترسل إشارات التهابية اقوى

لهذا العلماء اليوم ما عادوش يشوفو الأكزيما والصدفية كمشكل في الجلد فقط بل كمشكل في الحوار بين البشرة وجهاز
المناعة
لكن يا أم ميرال واش هو الحل في هذي الحالة !!
حافظو على قدر الاستطاعة على حاجز البشرة
بعدو على التقشير القاسي و بكون مرة في الأسبوع بمواد لطيفة مع زيوت
ترطيب البشرة بما يلائمها
تفادي غسل الوجه بالصابون القاسي ذو الحموضة المغايرة
بعدو قدر الإمكان على مستحضرات التجميل الكيميائية الملوثة لانو تراكمها و الاستعمال المستمر يديرلك كارثة و يصرا خلل في الميكروبيوم
و اكثر شي نوصيكم بيه هو الابتعاد عن التوتر و القلق لانو حسب الدراسات اغلب حالات إشارات الالتهاب بسبب الضغط الشديد

عزيزاتي عاملة تإكيد الطلبيات مزال تتواصل معكم واحد تلو الآخر باذن الله واحد ما ننساوه
بالنسبة للإرسال ممكن جدا نتعطلو شوية و ان شاء الله تعذرونا
السبب الأول انتظر وصول بعض المواد الاولية
السبب الثاني التذبذب الذي حصل هاته الايام و انقطاع الكهرباء …خاصة آلة التعقيم L’autoclave صرا فيها تلف بسيط نحاول تدارك الأمر باذن الله

في البداية
كنت ندير مقارنات بين الكتب …بين الوصفات …بين أقوال العلماء الخ
من بين الكتب لي قريتهم و شفت المفارقات
الأول قديم نوعا ما كان الطبعة الثالثة من السلسة 1836يشرح طرق الاستخلاص ،تحضير المراهم و الزيوت و حتى الصبغات
الثاني مرجع حديث في علم النباتات الطبية و التجميل
مثلا الأول يستخلص بالنقع، غلي، تقطير بسيط، عصر
الثاني يكون الاستخلاص بالمذيبات، ثاني أكسيد الكربون فوق الحرج، الاستخلاص بالموجات فوق الصوتية، وغيره
الأول يعتمد على تقييمه عن طريق الملاحظة و الخبرة
الثاني لا يعتمد على قياسات مخبرية، وتصوير الجلد، ودراسات سريرية عند توفرها
الأول لا يعطي أولوبة للسلامة يعني يخدمو بدون اختبارات حقيقية متطورة
الثاني يعتمد على أنظمة حفظ مدروسة واختبارات تحدي ميكروبي و الثبات لضمان سلامة المنتج
يعني الأول كان تقليدي نوعا ما عكس الثاني الذي يفصل في أمور حديثة اكثر
بالمختصر القديم يورث الخبرة…والحديث يختبرها….فما صمد أمام الدليل بقي..وما لم يصمد استبعد
العلم القديم ركيزة و التطور الحديث يصحح و يراجع 💚
هذي اجابة على العديد من الرسائل لبيولجيين حابين يطورو من انفسهم و ديرو مشوار جيد و يبداو باذن الله مشروعهم
للابد من مراجعة للقديم وًمواكبة الحديث

إذا كنت دكتورة في المجال و متعرفيش هذي المعلومة هنا نزيد نأكد على البحث المستمر و مواكبة المعلومة الحديثة )هذا ليس انتقاص من اي احد ولا اعني اي شخص بالتحديد )
شفت بزاف معلقين على احد المواضيع و انو كاين مواد و زيوت تسد المسام و ما إلى ذلك و استعملو مصطلح كوميدوجينيك و غيره …لكن للأسف على ما يبدو من درسوكم لم يقولو لكم ان تلك الابحاث كانت في السبعينات و الثمانينات
انتهى عهدها مع التطور الحاصل (لان تلك القياسات من صفر لخمسة )لم تعد موجودة
لانو حتى التجربة كانت خاطئة استعملوها على أذن الأرانب بدل جلد الإنسان تمام ؟ فهمنا هذي النقطة
الأكاديميات العالمية للأمراض الجلدية و ما إلى ذلك و حتى الإرشادات الحديثة مراهيش تستعمل ذاك المصطلح لانو غير دقيق و ليس مبني على الحقيقة المثبتة
إذا لقيتو كلمة ليس كومودجني او عكسه (تجاري فقط)
نجو لكلمة هذا الزيت يسد المسام خطأ كبييير لانو ماشي هكذا يكون التقييم و بمجرد شخص متعلم يقلي هذا الكلام نعرف انو حبيس تلك الأبحاث القديمة و دراسة غير معمقة
الزيت ميغلقش المسام إنما عوامل مثلا تغير الميكروبيوم الجلدي …الاستعداد الوراثي و الهرموني …تراكم الخلايا الميتة داخل بصيلة الشعر …كثرة إفراز الزهم …و نختمو بمستحضرات التجميل الكيميائية العفنة
هذو هوما لي يغلقو و نتي مثلا بشرتك راهي فيها واش ذكرت تروحي ديري نوع من الزيوت واش يصرا ؟بتخلط الحابل بالنابل و يخرجو حبوب و بشرتك تتغم
نتي واش رايحة تقولي ؟ من الزيت
لكن لا أبدا هذاك الزيت لقاها واجدة و معمرة و رايحة تنطق
مسكين داي غير الشيعة
نجو مثلا لزيت جوز الهند لي بزااااف تأثرو بكلام المتعلمين يقولو انو يسد المسام و ثقيل الخ
لكن الحقيقة لي بشرتهم صحية و غير قابلة لما اسلفت الذكر يستعملوه و لا مرة صرالهم مشكل
مثلا زيت جوجوبا ياك نعرفو انو اقرب زيت لدعم البشرة و خفيف فيه حمض اللينوليك لكن كي تكون البشرة تغمت من واش ذكرت و واجدة لأي شي زيادة و يبانو العيوب ممكن هو وحدو تحطيه اليوم لي بعدو تلقاي حبوب خرجت !!!
اين العيب إذا ؟
المشكل مراهوش في الزيوت و المكونات الطبيعية إنما في البيئة الخصبة تع بشرتك
هذي الأفكار و المعتقدات العلمية التي تم تداولها قديمة جدا و خاطئة و كبار العلماء الغاوها من مفرداتهم
الصحيح هو ان الزيوت الطبيعية و الزبدات و اي شي طبيعي
لازملو تركيبة مدروسة من حيث الكمية و التوازن و يتم الحكم و النظر في المنتج بعد تجربته على عدة أشخاص بدل الاعتماد على الحكم المسبق و الرقم الثابت
ان شاء الله الفكرة تكون لحقت كما ينبغي 💚

حطيتلكم من قبل في ستوري سلسلة تع بعض المكونات الكيميائية المصنعة لي يستخدموها في انتاج أغلى الماركات باش نتي تشري مرضك بالملايين و تكوني جد سعيدة !!
و كل ما دفعتي اكثر كلما كان المنتج اكثر ضررا …ماشي معناه ضمنتي الجودة (و ماشي معناه يخضع لتحاليل جودة راكي محمية ) هذيك مجرد تحاليل تبينلك المنتج واش فيه و درجة الاستقرار و الحموضة و ما إلى ذلك ..و كاين شركات عالمية للأسف لا تكتب كل المكونات و اتكلم بكل ثقة لانو مع احتكاكي بهم تعرفت على عدة خبايا …على كل نرجعو و نقولو ان المصدر الموثوق اهم من الماركة بحد ذاتها
نجيو نقولو مثلا فوندايشن او كريم ليلي او نهاري الخ
جيبو اي عبوة شريتوها من الماركة العالمية الفلانية و يديروها مثلا الأغنياء ماشي تع العالم تع الجزائر (لانو واش يلحقك نتي هنا ماشي نفسو لي يلحق الآخرين هذي كونك متهنية )
شوفو المكونات تلقاوها كلمات جد صعبة في النطق و ارقام مراحش تفهموها …
و مرة في منشور قلت انو مكون متقدرش تنطقو مديروش في وجهك
تمام نجيو تذكرو بعض المكونات لي يستعملوهم هذو العلماء الكبار و الكيميائيين في مخابر عالمية (لي تتغناو بيهم و تذكروهم كأمثلة بمجرد ان له صفة و مخبر )
علابالك عزيزتي انو يستعملو مادة ميكروپلاستيك microplastics باش يحسنو قوام المنتج و يجيك ملمسو ما شاء الله و يفرحك (هذي المادة جد خطيرة على البيئة منقلكش على صحتك لانو ممكن متهمكش صحتك إذا نقلك خمي على البيئة )
نجيو للمواد الحافظة لي راكي فرحانة بيهم باش يحميولك المنتج من التعفن واش يديرو اهم واحد هو البارابين Parabens هذا بحد ذاتو الهيئات العالمية لي تحوس تحميك حذرت منه لانو عندو آثار هرمونية و يسبب حساسية قوية
تذكرو مواد حافظة اخرى كيما Phenoxyethanol، Formaldehyde Releasers هذو يسببو تهيجات و يطلقو الفورمالديهايد و لكم ان تتخيلوا …
نكملو !!!ياك نتوما تحبو لي يهدر بالدليل و العلم ماشي مشكل
تعرفو السليكون ؟يستعملوه ايضا باش يعطيك النعومة و اللمعان
تعرفي تريكلوزان Triclosan هذا مضاد بكتيري باش يحمي المنتج و يحميك !! ااه يحميك هنا لا أظن لانو أسوء شي ممكن يخرب جسمك و البيئة و كاين منظمات ايضا تحذر منو
نجيييو للرائحة الجميلة لي تشموها في منتجاتكم (العطوور و المثبتات) قلك لالا ميديروش العطور !!ااه يخلوك تشمي ريحة الكيماويات المصنعة !!مستحيل لازم تعجبك الرائحة و تخليك تحسي بالجمال و الأنوثة رغما عنك (هذي خدمتهم)
و اول قاعدة نتعلموها كي نحبو نخدمو منتجات آمنة هي (ممنوع العطور في الوجه ) لكن هوما معندهمش ممنوع …عندهم نتي لازم يعجبك المنتج مهما كلف و متهموش نتي بحد ذاتك كإنسانة و بشر 💚
بلا ما ننسى المذيبات لي تجفف البشرة مع الاستعمال المستمر
المشاكل ممكن متبانلكش تم تم مع الوقت رايحة تفهميني 💚
و مع الوقت رايحة تعرفي انو شريتي مرضك بالملايين !
صحا دك نتي واش عليك ؟ تخلي المنشور يطلع لأكبر عدد ممكن من الناس و المعلومة متقعدش عندك
تحياتي …ام ميرال 💚

الناس لي متبعتني هذا مدة رجعت تعرفني مليح و انو لا أتكلم عن الهوى إلا و يكون عندي دراية تااامة بواش راني نهدر باش لي يجي يجادلني نعرف واش نرجعلو و منقعدش كالذي قيل فيه (و بُهت الذي كفر ) لي يحب يأمن و يأخذ بمعلومتي مرحبا و ايضا لي ضدي مرحبا
اقراو مليح واش رايحة نهدر و لي عندو كلام آخر يتفضل مرحبا
في الإشعارات لقيت متابعة طاقاتني في منشور لوحدة مايكپ ارتيست معروفة شرات فوندايشن طبيعي على وحدة من المجال نعرفها من زمان حتى و كان عندي خلاف معها في عدة نقاط من بينها تكذيبي في قضية الصابون بالرماد لكن …
اليوم جيت نقول كلمة حق لها ما لها و عليها ما عليها تحب تخدم بضمير و طور من علمها …و انك نتي كمختصة في التجميل الكيميائي تقولي انو منتجها يعيف و مرتع للبكتيريا و تشريه باش تعرضيه للناس و تنتقديه بهذيك الطريقة !!أنا في مكانها نرفع عليك دعوة بدون ولا شفقة
و نتي العفن لي راكي ديري فيه لروحك و لغيرك تسميه ماركات عالمية و تشريها بالملاييين و تتباهاي بيها !!!كون نبدأ نقلك المكونات لي يكتبوها و لي ميعلنوش عليها تم تعرفي العفن تع الصح …علاش متهدروش فيهم و تقولو الحقيقة!
رغم خطأ الأخت …لكن النصيحة كانت أنها تكون بينك و بينها
لانو التوعية الحقيقية تبدأ من المنتجات المصنعة التي تستعملونها
زيد تقولي انو أصحابها مختصين و كيميائيين !! معلابلكش انو لي يخدمو منتجات طبيعية كيميائيين بالدرجة الاولى و مختصين في الطبيعي لي نتوما متستعرفوش بيه !! او بالأحرى عقولكم أصبحت عمياء و بصيرتكم و هويتكم طُمست
تأثير المواد الكيميائية…الإشهارات…الترندات…اللعب بالكلمات و شوية مشاهير و ماركات تصنع في الصين باش يقلك إيطالية و فرنسية ووو
كاين حتى مواد لا يصرحون بها و الترخيص يجوز تحت الطاولة !
باش في الأخير تنتقدي الطبيعي و تصفينه بأبشع الصفات و انو زبدة جوز الهند و الزيوت المعصورة الخليط عبارة عن مواد ضارة و عفنة ؟؟ من أنت !إذا أردت انتقاد منتج مهما كان يتم بطريقة علمية مبنية على أسس صحيحة و ليس مصطلحات تهجمية
و المقارنة تكون عادلة و ليس دعما للكيميائي الأكثر ضررا و لي احيانا اصحابو و يحذرو منو !!
كي ديري فوندايشن لي فيها سيليكون و عطور عادي و فوندايشن فيه زبدة شيا ،زيت لوز ، عكر فاسي و غيره رجع مضر و مشين …حبيتي تشمي فيه ريحة العطور المصنعة اوك و لي يعرف للمجال علابالو انو ممنوع نديرو منتج فيه عطر و يكون موجه للوجه !!! تستهلكو كل ما هو كيميائي و بعدما تشوفو الأضرار تروحو ديرو جلسات ليزر و تصليح و ترميم لبشرتكم باش تبانو في احلى حلة و المتابعين يأمنوكم
لكن منلومكش كبرتو بيهم و معندكمش قابلية للتحري و التطور و التحرر …معندكمش القدرة باش تخرجو تقولو هذا يضر لانو تعتبروه دخل ليكم و لا يهمكم صحة المتابع !!
حبينا ولا كرهنا مزلنا بعااااد لانو الناس لي هكذا وًعندهم قاعدة جماهيرية كبيرة و بالملايين مشاهدات مراحش تقدر تغلبهم في شهور لانو تأثيرهم جد كبير للأسف
لكن يبقى الطبيعي يُدرّس في اكبر المعاهد و المختبرات بمختلف اللغات لمعرفة بعض الاسرار و تعويض الخلل الحاصل
باش منطولش اكثر رايحة ندير فاصلة فقط ،و للحديث بقية