House of Havana

أسامة أنور عكاشة، كان مؤسس لدراما النطاعة الأصيلة.

معندناش مشكلة إن الكاتب موقف ورأي، زي ما بيقول، بس هذا الشخص كان محظوظ إن التلفزيون المصري اتفتحله على مصراعيه، واخترع أكبر كذبة في تاريخ مصر وهي إن الانفتاح الاقتصادي في عهد السادات هو اللى دمر مصر.

كل ده عشان أسامة، كان عايش في شقة إيجار تقريبا، أو راكب عربية 128، ولقى جنبه تاجر أو بياع باني عمارتين وعنده محلات سيارات أفخم موديل، فأصبح كل أبطاله الأثرياء، هم لصوص، ومشفناش في تاريخ الدراما المصرية رحلة صعود شخص عادي لفوق بشرف إلا مع كتابة مصطفى محرم في مسلسل لن أعيش في جلباب أبي.

وطبعا دي كانت تُحسب، لنور الشريف، اللى كان رغم ثقافته وجرأته ونزاهته، مرمي في أحضان هذه الأفكار البالية، لكن كان بيلعب حلو على كل التوجهات، لأنه في النهاية فنان.

دراما عكاشة، هي اللى أقنعت المواطن المصري، إنه لما يقعد 12 ساعة يحلل "المؤامرة الإمبريالية" وهو مش لاقي تمن حجر الشيشة، يبقى كدة مناضل ومثقف ويستحق.

عكاشة كان بارع بخطابية رجعية معرفش ازاي أصلا الممثلين كانوا بيطيقوا يمثلوا الكلام ده، إنه يحوّل البطالة لحالة نضالية، وشرعن الحشرية وسماها جدعنة وأصول.

هو اللي خلق "المواطن اللتات" اللي سايب حاله ومحتاله وقاعد يحاكم جاره أخلاقيا.

هذا الرجل بكل العُقد النفسية، أسس لإرهاب أخلاقي، لبسنا العمة وأقنعنا إن النجاح نجاسة.

يعني "سليم البدري" في ليالي الحلمية، هذا النموذج، بيقولك من خلاله لو بتشغل دماغك وبتبني كيان، فإنت خاين للطبقة والمبادئ، لكن لو إنت "سليمان غانم" وبتبعزق ورثك في الهيافة وجاهل،فإنت حبيب الملايين.

ولا الست "فضة المعداوي" في "الراية البيضا"، اللي طالعة من تحت وبتبني "بيزنس"، لازم تطلع "مسخ" وجاهلة، عشان "السفير الأرستقراطي" اللي مبيعملش حاجة غير إنه يتأمل ذكرياته يفضل هو النموذج العظيم.

عكاشة راجل عنصري بكل ما فيه كأنه شغال بواب عند النخبجية اللى شايفين إنهم يستحقوا الفلوس والجاه والسلطة وحق الكلام كمان!

إيه المنطق الأعوج ده؟ ما ده اللى خلى المصريين شايفين كل رجل أعمال ناجح كأنه "حرامي"، وكل ده عشان القطيع اللى زي أسامة، يداروا على فشل الأيديولوجيا اللي هما بينتموا ليها في إنها توكل الناس عيش.

وخير مثال عندك مثلا على النطاعة هي شخصية حسن أرابيسك، بلطجي مدمن غايب عن الوعي وورشته خربانة، فطبعا من غير كلام، أسامة مش هيدينه وينقده، لا هو اللي بيدي دروس في الهوية لعالم ذرة.

متخيلين حالة الإخصاء الفكري اللى عملها أسامة عكاشة وجيله؟

الحقيقة المرة إن عكاشة فنيا على قده، ويكفي فشله في السينما، بس إحنا كنا مخدوعين بمزيكا الشريعي وكلام سيد حجاب، وصوت الممثلين العمالقة اللي شالوا الرغي والخطب بتاعته على أكتافهم.

راجل خلى جيل كامل ينام ويحلم بماضي مكنش بالجمال ده، ويخاف من مستقبل كان لازم يتبني بالعرق مش بالكلام على القهاوي.

فرصة للانضمام لفريق عمل هاڤانا ✨
نبحث عن:
💼 موظفة استقبال
✨ خبرة لا تقل عن ثلاث سنوات

📞 للتواصل والاستفسار : 01007558099