Life style

في حالة إن فيه خطوط متسجلة برقمك القومي وإنت متعرفش عنها أي حاجة، تتصرف إزاي؟

أولًا، قبل ما تنتظر رد فعل من أي شركة اتصالات، روح اعمل محضر إثبات حالة، واذكر فيه عرفت بالموضوع إزاي وإمتى، وأرقام الخطوط والشركات التابعة ليها.

وحاول تعرف كل المعلومات المرتبطة بالأرقام دي؛ شوف الواتساب اللي معمول بالرقم، والتليجرام، وأي أكونتات تانية مرتبطة بيه، وشوف الرقم متسجل بإيه على Getcontact، وهل فيه محفظة إلكترونية باسمه، وهل الرقم مربوط بـ InstaPay وباسم مين -لو موجود-.. وكل دا لازم تذكره في المحضر.

ثانيًا، اعمل إنذار على يد محضر من المحكمة للشركة، وتذكر فيه نفس التفاصيل، وتطلب إلغاء وقفل جميع الخطوط المسجلة باسمك دون علمك، وتنبه الشركة إن في حالة عدم اتخاذ الإجراءات اللازمة هتتخذ الإجراءات القانونية ضد الشركة وصاحب الخط.

ثالثًا، أوعى تعمل تنازل عن الخط في الشركة، لأن التنازل ده ممكن يُعتبر إقرار ضمني منك إن الخط كان ملكك، وبالتالي يضعف موقفك بعد كده في إثبات إن الخط اتسجل باسمك من غير علمك أو موافقتك. -لكن ممكن تقدم طلب إنكار لملكية الخط لكن راجعه كويس قبل ما توقع عليه-

رابعًا، لحد الآن مافيش تصريح رسمي واضح بيشرح الموضوع ده بيتم إزاي، لكن وجود خطوط بتتسجل بأسماء أشخاص دون علمهم يفتح الباب لاحتمال وجود شبكات إجرامية بتستغل أو تتعاون مع بعض الموظفين داخل شركات الاتصالات لتسهيل استخراج خطوط ببيانات أشخاص عشوائيين.

خامسًا، حافظ على سرية بياناتك ومعلوماتك الشخصية، ولو بطاقتك ضاعت، روح اعمل محضر إثبات حالة فورًا؛ لأن أي شخص ممكن يستخدم بيانات البطاقة في استخراج خطوط باسمك، وممكن الموضوع يتطور لأكتر من كده.

وأخيرًا، في جميع الأحوال، لو ثبت وجود تقصير من شركة الاتصالات أدى لتسجيل أو تشغيل خطوط باسمك دون علمك، فمن حقك اتخاذ الإجراءات القانونية والمطالبة بالتعويض عن الأضرار اللي لحقت بيك.

ومن وجهة نظري، واجب على القضاء الجنائي تغيير عقيدته في القضايا التي تعتمد على الخطوط الهاتفية، وألا يكتفي بمجرد ثبوت ملكية الخط أو تسجيله باسم المتهم، وإنما ينظر إلى أدلة حيازة الخط واستعماله فعليًا؛ لأن تسجيل الخط باسم شخص لا يعني بالضرورة أنه هو من كان يحوزه أو يستخدمه وقت ارتكاب الجريمة.