Sasera Beauty

☝️حبيت يكون هالبوست مرجع مفيد. لكن لو عندك اي مشكله تخص بشرتك دائما ارجع لطبيب الجلديه :)
☝️كثرة التقشير ما حتعطي بشره مثاليه. الفكره دعم تقشر البشره. بشرتنا اصلا تتقشر بعمليه اسمها desquamation
☝️هل التقشير ضروري للجميع؟ لا. بعض الحالات ممكن تستفاد من التقشير لكن البعض ممكن ما يناسبهم.
✅ اسعد الله مساكم بالمحبه والعافيه🤩 اذا عندكم اي اسئله تفضلوا بالتعليقات حتى تكون فايده للجميع
#بغداد #العراق #السعودية #الامارات #اكسبلور #اربيل #هولير #دبي #البصرة #بغداد #الموصل #كركوك #تجاعيد #تقشير #تصبغات #تفتيح #المسامات #خلطات #الشعر #ماسكات

✅كثير نخلط بسبب الوعود عالمنتجات انها تقوي شعرنا ودائما تسألوني شنو تقصدين بمقويات الشعر.
🔹️منتجات البلسم، الماسك، الزيوت، بديل الزيت كلها وظيفتها ترسب مرغيات ومواد منعمه عالشعر تمنع التشابك اللي هو من اسباب التقصف وتحمي الشعر من الضرر. فهي اساسيه لمنع تكسر وتضرر الشعر لكن هالمواد حتبقى على سطح الشعر مؤقتا لغاية الغسله التاليه.
🔹️اما مقويات الشعر فهي تشتغل على اصلاح التلف والضرر بالشعر المتضرر من التسريح المفرط والحراره، والقصر..
🤔وهي نوعين اما 1️⃣تصلح روابط الشعر (اسحب الصور لطفا) مثل اولابلكس ، لوريال سمارت بوند وغيرها او 2️⃣تصلح بروتين الشعر مثل البروتينات عاليه الاختراق مثل الK18 مثلا
⚠️هام: لو ما تستعملين حراره بكثره، ما تقصرين، عالأكثر الشعر مو متضرر فممكن مقويات الشعر ما تشوفين عليها نتيجه قويه. محتمل شعرج اساسا رقيق ويحتاج عنايه فائقه بالمنعمات العاديه واهتمام اكثر
⚠️سؤال: هل مكونات البروتين بالمنتجات تخترق ويقوي الشعر؟ لا مو شرط يعتمد على حجمه الجزيئي. كلما اكبر حيستقر عالخارج وينعم فقط ما يخترق.
⚠️احيانا نشوف منتجات بلسم وماسك بيها مكونات مثل Hydrolyzed protein, Hydrolyzed keratin. هذه اعتمادا على حجمها كلما اصغر ممكن تخترق الشعر وتقوي لكن مو مضمون الصراحه :)
❎باجر ان شاء الله انزل الفرق بين الاولابلكس والK18. وبعد ما اخلص الK18 حنزللكم تجربتي الخاصه ان شاء الله
🔸️شلونكم؟ تستخدمون مقويات للشعر؟ لو تكتفون بالمنعمات؟ شنو اسئلتكم عن المقويات؟

☝السيليكون انواع و مو كل السيليكونات مثل بعض. مثل الخشب انواع، الورق انواع والسيليكون انواع. عاده بالمنتجات الاسم يكون ينتهي بCone, او Conol. والسيليكون الطيار ينتهي بCiloxane (لو حابه شي يسبب اقل طبقه ممكنه بالشعر)
☝هوايه سوء فهم عن هالمكون. مو شرط لو استخدمتيه وماناسبج معناها هو سيء. كلنا بشرتنا وشعرنا يختلف
☝السيليكون بالمنتجات امن جدا. عدا وامن حتى على البيئه حسب البيانات المتوفره

⚠️عدا في اوروبا فقط حددوا استخدام السيليكون نوع (cyclopentasiloxane) وال(cyclotetrasiloxane) بنسب واطئه جدا ٠.١% في المنتجات اللي ما تنغسل وليس اللي تبقى عالبشره والشعر للتحفظ بناءا على دراسات حيوانيه بجرعه عاليه لانها تنشطف قبل ان تتبخر فممكن تسبب ضرر محتمل عالبيئه
❤مساكم الله بالخير🤗 حبيت اسوي هالبوست لأن اشوف سوء فهم منتشر بالصفحات عن السيليكون. اكرر انه لو ماحبيتي السيليكون بالمنتجات ممكن لا تستخدميه وسوي اللي يناسبج🤗 المصادر بالتعليقات💐

☝فيتامين دال يدخل من ٣ مصادر: الغذاء بشكل بسيط ، الشمس (اشعة الUVB) ، والمكملات
☝عوامل تصنيعه من الشمس تتأثر بعوامل كثيره مختلفه فصعب تتبع توجيهات موحده للكل.
☝لذا الحمايه من الشمس مهمه جدا ومستبعد ان يسبب واقي الشمس نقص فيتامين دال لشخص ماعنده نقص
☝حسب الادله المتوفره، معظم الناس ممكن ياخذون كفايه من فيتامين دال بالتعرض البسيط لجرعه واطئه من الUVB خاصه منتصف النهار اثناء الممارسات الروتينيه مع التعزيز بمصادر الغذاء
⚠️القصد مو بالضروره اجلس احرق نفسي تحت الشمس حتى احصل فيتامين دال لأن هالشي لا يعتبر امن.
☝يفضل عمل فحوص دوريه لفيتامين دال خاصه للمعرضين للنقص: الحوامل، المرضعات، كبار السن ، الاشخاص اللي ياخذون ادويه للمناعه الذاتيه، اللي مايطلعون او مضطرين للبقاء او بالمستشفى بسبب مرض، اصحاب السمنه ، الاشخاص اللي عندهم امراض تقلل الامتصاص للدهون خاصه واخذ المكملات حسب تقييم الطبيب اذا يتطلب الامر
⚠️قيم فيتامين دال بالاسماك ممكن تختلف حسب المنشأ والاصناف. بعض الاغذيه الاخرى مثل الاغذيه المدعمه بفيتامين دال، الفطر
✅مساكم الله بالخير❤

☝حبيت يكون هالمنشور ملخص سريع بسيط عن اكثر مكون مثبت من ناحيه شيخوخه البشره مع واقي الشمس وايضا للحبوب، التصبغات وتلف الشمس
🙏تخيلي الريتنويدات مثل الخضار. والريتنول مثلا خيار، كل الخيار خضار ، بس مو كل الخضار خيار. يعني مو كل الريتنويدات نفس الشي
☝بالنسبه الي هي السحر رغم ما احب هالكلمه بس فعلا شغاله. طبعا احنا متفقين ان احنا نحتاج بس واقي شمس وغسول ومرطب. فالريتنول مو اجباري حسب حاجتج.
☝الصيغ الاضعف صحيح اضعف بس هذا مو معناها ما تشتغل بالعكس بس ممكن تاخذ وقت اطول فيكون تحملها اعلى للبشره لكن اختيار التركيبه مهم جدا لأن الرتنول التجميلي غير مستقر. غير مستقر يعني فاعليته تقل
☝اني استخدم الصيغة الطبيه التريتنوين. من سنين كتبتها الي طبيبه وبقيت مستمره عليها فبشرتي تعودت. صحيح فعال بس نظرا للتهيج القوي والاعراض الجانبيه فما انصح بيه الا بوصفة طبيب
☝الاقتراحات بالصوره على سبيل المثال (ماكو استفاده ماليه من ذكرها)
💐اسحبي الصور للمعلومات لو حابه واكتبولي اسئلتكم عن الريتنويدات وتجاربكم وياه وشنو الانواع اللي جربتوها وفادتكم🤗 المصادر بالتعليقات🤗

☝بديل الزيت شبه أساسي بروتيني (اعتمادي اكثر عالبلسم لإن احس تأثيره اكبر بالنسبه الي) بشكل عام البلسم وبديل الزيت طورا جدا من شعري
⚠️شنو فايدة بديل الزيت؟ ج/ بديل الزيت بيه مكونات مقللات احتكاك تساعد بتقليل التشابك , فيقل الاحتكاك والنفشه اللي تحفز التقصف والتقصف يسوي نفشه اكبر
✅مقللات الاحتكاك مثل المرغيات موجبه الشحنهةاقرون بالمكونات مكتوب Stearamidopropyl dimethylamine , Cetrimonium Chloride
⚠️متى يستخدم؟ ج/اي وقت سواء على شعر جاف او رطب
✅احيانا بعض البنات يقولون يدبق شعرنا منها. بنات الكميه تحكموا بيها حسب حاجة شعركم وكثافته. حطي شويه شويه حسب حاجة الشعر
☝هالانواع استخدمها من فتره وطالما تسألوني هوايه عن بدائل الزيت (الريفيو هذا مو اعلان للمنتجات🤗) (اسحب الصور لطفا)
1️⃣احسنهم بالنسبه الي shea moisture لان خفيف ما احسه ثقيل مهما حطيت. ويعطي نعومه سريعه وكميته كبيره ويبقى فتره مو قليله وما يخلص رغم شعري طويل وثخين
2️⃣الثاني من Okay , أيضا خفيف ويعطي نعومه , ريحته جوز هند قويه بس بالبيت محد يحب ريحة جوز الهند القويه عاد اذواق😅 بس هو أيضا جيد بفك التشابك وتقليل الكهربائيه
3️⃣الSoft wave: اشوفه شغال ورخيص ومتوفر ويسوي شغله وبيه مقللات نفشه
4️⃣الCantu: ايضا كميته حلوه ومتوفر. بس ابدا لا تكثرين منه لأن تحسيه يدبق شوي ويثقل الشعر خاصه لو خفيف. حسيت تأثيره يبين مو رأسا، يعني لما اظفر الشعر واتركه وينشف وافتحه اشوف نتيجه افضل
☝الكل متوفره ورخيصه وتشتغل كبديل زيت. بديل الزيت مهم جدا لتقليل النفشه الناتجه من الاحتكاك والكهربائيه
✅يسعد مساكم بالمحبه❤ تستخدمون بديل زيت بروتين شعركم؟

⚠️ريفيو عن مجموعة Maui للشعر الجاف والخفيف والمتقصف بألياف الBamboo (نموذج تجريبي) (اسحب الصور)
✔الشامبو:
☝ شامبو عادي جدا✔ تنظيف جيد بتجفيف قليل بسبب اضافة الملطفات والمرطبات (فروة راسي عاديه) بيه مرغي قوي بقوة تجفيف الكبريتات وهو sodium C14-16 olefin sulfonate فمو كل شامبو ما مكتوب بيه Sulfate يعني مابيه مرغيات مجففه. بيه مرغيات لطيفه ايضا عموما ما شفته جفف شعري واستخدمه بمعدل مرتين اسبوعيا
☝ضايفيله امور تعطي حجم وهمي للشعر فممكن لو تستخدميه يوميا وشعرج خفيف هتحسين ثقل ونزل الشعر🤔 ما اقدر اؤكد هالشي مجرد نظريه فمو شرط
✔البلسم:
☝هذا اكثر شي حبيته بالمجموعه. نعومه، ثقل وترطيب وريحه منعشه. البلسم يفيد ترسيب مكونات تزيت الشعر، تنعم، تقلل التشابك، الكهربائيه وتمنع التقصف يعني الغايه من اي بلسم هي الترطيب ومنع التقصف وهو ضروري
⚠️اني اكثر بلسم احبه هو ماسك فاتيكا للشعر. بس للأسف ما قارنته بهذا بس حبيت الاثنين🤗
✔البخاخ:
☝ما اشوفه فرق عن لو خلطت مي، وشوية زيت وشوية بلسم وبخيته عالاطراف واشكل الشعر بيدي ينطي منظر اقل تهويش
☝البعض يحبون هالاشياء اكثر من بدائل الزيت لأن تثقل شعرهم وتخليها مزيته لكن لو الشعر من النوع اللي يهيش بالرطوبه ممكن تحسيه ما ناسبج اني اشوفه مرات كافي وما احتاج بديل زيت، واحيانا احس احتاج بديل زيت بعده
☝حبيت استخدامه كمعطر للشعر ريحته غابات على بامبو ونظافه
⚠️بإختصار حبيت البلسم اكثر شي بينهم و ريحة المست جذابه🤩
🤗مساء الفل عليكم❤ احد جرب شي من هالمجموعه؟

❤هالفتره دا استخدم هالمنتجين بغسل الجسم. غسل الجسم مهم لأزاله الدهون والاوساخ والبكتريا والعرق. خاصه بالاماكن اللي تزيد بيها هالامور مثل طويات الجسم
⚠️بالغسولات نحب نشوف مكونات مرطبه تخلي احتماليه الجفاف منها اقل
1️⃣غسول Aveeno Dermexa: عباره عن غسول كريمي مطري للجلد
✅المكونات المرطبه: شوفان غروي (ماده مهدئه مرطبه)، البانثينول، الجلسرين، الدهون الثلاثيه، السيرامايد وتحسوها تبقى عالبشره ما تنشطف
⚠️الشوفان ماده مضاده للالتهاب بمنتجات البشره. تساعد بتهدئه الحكه والجفاف بالاكزيما
✅السعر: ١٠-١٢ الف ل٣٠٠ مل💪اخذته من صيدليه ما اعرفها ببختياري اربيل
✅ما يجفف. وينظف بشكل جيد
✅غير معطر وهذا يخليه مناسب للبشره الحساسه خاصه من العطر حتى بالغسولات
✅جربته لوجهي ايام ما كنت استخدم اكرتين يوميا ماحسيته لائم. لكن بدون تقشير معقول فما اعرف يناسب الوجه او لا يعتمد. ما اعتقد كافي لتنظيف المكياج
2️⃣صابونة دوف Dove
✅هالصابونه هوايه بيها مرطبات وزيوت وربع كريم حسب موقعهم. مرطباتها تبقى عالجلد فتساعد بتقليل الجفاف من الغسل
✅بيها مكونات صابونيه لكن الPH متعادله. بالتالي هالمرغيات يقل تأثيرها بالتجفيف وما تجرد الجلد
✅رخيصه يمكن ٤ صوابين ب٨ الف
✅ما جربتها للوجه. البعض يشوفها مناسبه اني ما احب الصابون للوجه🤷‍♀️
⚠️معطره فما تناسب البشره الحساسه من العطر. الصابون ايضا ممكن يلم بكتريا عليه بالحمام الرطب فاشطفي الصابونه قبل استعمالها واحفظيها بمكان جاف
🔹️اسحبي الصور نصائح مهمه لتقليل الجفاف بسبب الاستحمام
✅ملخص: الاثنين حلوين وما تجفف جلد الجسم. لكن لو تتحسسين من العطر، الجلد متهيج، بيه جروح فهنا حختار غسول افينو

🔸️مسا الفل وبدايه اسبوع موفقه للجميع❤ شنو جربتوا من هالمنتجين؟

✅صارلي فتره استخدم مانع التعرق هذا من Driclor وفعلا يمنع التعرق.
✅يعتبر نسبه علاجيه ٢٠% للتعرق للي عندهم فرط تعرق
❗شلون يشتغل مانع التعرق؟ يسوي بلوك مؤقت يحجب خروح العرق فتبقى المنطقه ناشفه..وهذا التأثير يروح مع تجدد الجلد.
👷‍♀️طريقه الاستخدام: يفضل بالليل اثناء خمول الغدد العرقيه وبروده الجو يسمح للماده بالتغلغل وتشتغل افضل وممكن تمسحين الابط بقطعه قماش مبلله صباحا تزيليه بهالطريقه يكون اشتغل وبنفس الوقت قللتي وقت التلامس ف يقل التهيج
⚠️مو شرط تستخدميه يوميا. ممكن بس بالبدايه بعدها هتحسين الحاجه اله تقل فيصير مره او مرتين بالاسبوع الا لو التعرق عندج شديد
✅اني ماستخدمه كروتين لأن ماعندي تعرق كثير فقط احيانا عند الحاجه
❌عيبه: ممكن يكون مهيج للبعض. مانعات التعرق عاده تجي حامضيه فتسبب تهيج للبعض فلا يفضل استخدامها على بشره محلوقه بالجديد او بشره مجرحه او ملتهبه
✅اكو بنوته قالتلي يسبب ريحه مو طيبه بعد ايام من وضعه فبالنسبه الي ما شفت هالشي. ماكو اي رائحه اساسا
💰سعره : 15-18 الف، الحجم ٦٠ مل
⚠️ممكن يستخدم عالأيد والقدم اذا بيها مشكله تعرق ايضا يوضع بالليل
⚠️ممكن لو عندج مشكله تعرق كبيره ما يفيدها المانع..فعندي بوست مفصل عن الاسباب والعلاجات الاخرى الحبوب والبوتوكس.
❌هل الالمنيوم يسبب سرطان ثدي؟ اسحب الصور لطفا
⚠️دراسات كبيره من منظمات معتمده وكبيره صرحت انه امن ولا داعي للقلق باستخدامه وماكو ربط مقنع بين الالمنيوم وسرطان الثدي. الالمنيوم امن بالتراكيز القليله في مانعات التعرق. اساسا ما تشكل نسبه بسيطه جدا من الالمنيوم اللي نتعرضله بأكلنا
⚠️لا ما يسبب احتباس للسموم! السموم تتطهر عن طريق الكلى والكبد, والعرق غايته الكبرى تبريد الجسم والابط جزء صغير من الجسم

✅موانع الاستخدام: لو سببلج تهيج او حساسيه لا تستخدميه , اذا ما عندج مشكله مع التعرق فما اشوف تحتاجيه، لو الشخص عنده فشل كلوي ايضا يتحذر من استخدام منتجات الالمنيوم
🌻مساكم جمال وخميسكم بهيج🥰
⚠️بعض المصادر بالتعليقات.⤵️

✅كثير يتخوفون ان الاضاءه الصناعيه تضعف شغل الاكرتين او الريتنول ..الادله مو واضحه. نعم ممكن يأثر حسب دراسات على خلايا وليس على بشر حي بالتالي صعب الاعتماد كليا

⚠️كريمات التريتنوين موجوده من سنين و الاناره الصناعيه مخترعه من زمان ومع هذا شغال والنتائج مستمره. لكن
✅لذا الاهم الالتزام بالحمايه من الشمس ، منع التهيج والترطيب وعدم هتك درع الجلد وهذا اهم شي .. لو من نوع هوايه تستخدمين موبايل بالليل ولو هذا سيء عالنوم ممكن تأجلين وضعه لقبل النوم مباشره🤷‍♀️❤
✅ايضا اكو انواع مستقره بالضوء مثل التريتنوين المايكرونايزد ، او الرتنول اللي مكتوب عليه encapsulated اذا تستخدمين رتنول او الدفرين مستقر بالضوء وممكن استخدامه بالنهار بشرط بعده واقي شمس بكميه صحيحه ودمتم بحب ❤🌷
#اكرتين #ريتان

✅لا السيلولايت اللي عندج مو عيب او مرض! اغلب او كل النساء تقريبا عندهم بدرجه معينه!
✅سببه مو معروف! غالبا الجينات والهرمونات الها دور . طبعا الادويه المؤثره عالهرمونات ايضا ممكن تلعب دور، ترهل الجلد مع تقدم السن
⚠️لا سببه مو زيادة الوزن🤷‍♀️ ولا الاكل . نعم زيادة الدهون تخليه اوضح بس مو هي السبب. حنى الرشيقات، الرياضيات، السوبر موديلز عندهم
✅الميديا خلت الناس ينظرون لأمور طبيعيه كعيوب. وهي مو عيوب بحيث الناس نسوا سعادتهم وصاروا يصرفون وقت وفلوس وجهد على اشياء مو مهمه
⚠️بالذات ان كل العلاجات المتوفره مو مضمونه وحتى النتائج وقتيه.. لان مثل ما قلت سببها مو واضح.
⚠️ممكن تفيد البعض بنسبه معينه لكنها مو مضمونه ١٠٠%
🤷‍♀️طبعا ممكن تحسينها لو حبيتي لكن جهد ووقت وفلوس على شي مو مضمون وعلى شي طبيعي! لازم تحسبيها صح
⚠️محد يهتم للسيولايت عندج! الكل عنده اللي مكفيه. احيانا احنا نظل ندقق على اشياء محد يشوفها
⚠️لا ماكو اي مكملات، دهونات، فرش ، جلف مو طبيعي حيشيلها لذا نتعايش وياها افضل
⚠️اكو ٣ اشياء مهمه بالحياه السلولايت مو من ضمنها
✅اسمعيني صديقتي🤷‍♀️❤ العمر واحد ونعيشه مره وحده. اللي يعتبر السلولايت عيب طنشي. السلولايت عادي جزء من الجسم وما يغير من قيمتج وذاتج شعره
❤اللي انصح بيه لعب الرياضه بالذات المقاومه مثلا سكوات، اثقال هتنعم شكلها وتحسنها. اهتمي بتغذيتج لأجل الصحه والحفاظ عالوزن، عيشي ايامج وركزي على ما يسعدج
🤩مساء الجمال 🤩 المصادر بالتعليقات

✅لا تخافين! الضوء المنبعث من تلفونج او التلفزيون او الاناره المنزليه ما حيضر بشرتج بالأستخدام الطبيعي (اسحبي الصور مهم لطفا)
✅الاولى الحذر من الشمس! لأن الضوء المنبعث من هالاجهزه ما يجي شي مقارنه بالشمس! الشمس تدخل UVA , وضوء مرئي عالي الطاقه حتى من النوافذ
⚠️فلو تستخدمين واقي شمس وتجددين عند اللزوم عند زوال الواقي بالتعرق او عند التعرض المباشر للشمس فأنتي كلش تمام وماكو داعي للتخوف
⚠️الدراسات اللي بينت ان ضوء الشاشات (الضوء المرئي) يدمر كولاجين البشره انعملت على خلايا خارج جسم الانسان ما تمثل جلدنا الحيوي اللي كله طبقات وامتصاصه يختلف للضوء هذا غير طرق السطوع كانت عاليه ما تمثل الواقع
⚠️الكميه من الضوء اللي سببت تصبغ للسمر كانت بين ٤٠-٩٩ جول/سم ٢ .. هاي صح تعادل ساعات (١.٥-٢.٥) ساعه من التعرض للشمس لكن تعادل ١٨٠٠-٢٠٠٠ ساعه من التعرض المتواصل القريب للشاشات🤦‍♀️🤷‍♀️
⚠️فلو سمراء وعندج كلف عنيد..للحمايه من هالضوء من الشمس اعتمدي واقيات بيها اوكسيد الحديد وخلي كونسيلر بيه اوكسيد الحديد عالتصبغ لان مثبت انه يحسن زوال الكلف. وحاولي تبقين بالظل والبسب نظارات شمسيه
⚠️ولا تقلقين ابدا بكل الاحوال من هالشاشات والتلفزيون.. المهم تحمين بشرتج من الشمس لأنها مثبته اكثر انها تضر الجلد..لكن الضوء المرئي لا زال مو كلش واضح لحد الان
✅مسا الحب عالحبايب🤩❤المصادر بالتعليقات