Baray New today

ព្រឹកថ្ងៃព្រហស្បតិ៍ ១៥រោច ខែទុតិយាសាឍ ឆ្នាំមមី អដ្ឋស័ក ពុទ្ធសករាជ ២៥៧០
ត្រូវនឹងថ្ងៃទី១៣ ខែសីហា ឆ្នាំ២០២៦
*********
លោក ឃន ចាន់ថៃ អភិបាល នៃគណៈអភិបាលស្រុក និងសហការីបានចុះពិនិត្យស្ថានភាពទឹក និងការប្រមូលផលស្រូវ របស់បងប្អូនប្រជាកសិករ ក្នុងឃុំត្នោតជុំ ស្រុកបារាយណ៍ ខេត្តកំពង់ធំ។

លោកអភិបាលបានផ្តល់អនុសាសន៍ណែនាំដល់អាជ្ញាធរឃុំ និងមន្ត្រីជំនាញពាក់ព័ន្ធ ឱ្យបន្តយកចិត្តទុកដាក់តាមដានស្ថានភាពទឹក និងស្ថានភាពដំណាំស្រូវរបស់ប្រជាកសិករ ជាពិសេសនៅតំបន់ដែលអាចប្រឈមនឹងការខ្វះទឹក ឬបញ្ហាផ្សេងៗដែលប៉ះពាល់ដល់ផលិតកម្មកសិកម្ម។ ប្រសិនបើមានបញ្ហាប្រឈមអ្វីមួយ ត្រូវសហការគ្នាក្នុងការជួយសម្របសម្រួល និងដោះស្រាយជូនពុកម៉ែបងប្អូនប្រជាកសិករឲ្យទាន់ពេលវេលា

រសៀលថ្ងៃពុធ ១៤រោច ខែទុតិយាសាឍ ឆ្នាំមមី អដ្ឋស័ក ពុទ្ធសករាជ ២៥៧០
ត្រូវនឹងថ្ងៃទី១២ ខែសីហា ឆ្នាំ២០២៦
********
លោក ឃន ចាន់ថៃ អភិបាល នៃគណៈអភិបាលស្រុក បានអញ្ជើញជាអធិបតីក្នុងពិធីសំណេះសំណាលសួរសុខទុក្ខ និងនាំយកជាគ្រឿងឧបភោគ-បរិភោគ ឧបត្ថម្ភដល់បងប្អូនខ្មែរ-ឥស្លាម ដែលមានជីវភាពខ្វះខាត។

គ្រឿងឧបភោគ-បរិភោគដែលបានផ្តល់ជូនបងប្អូនខ្មែរ-ឥស្លាម គឺទទួលបានពីការឧបត្ថម្ភរបស់សប្បុរសជន លោក អេ រិច នាយកសាលាសាឡូមូន។ នេះ គឺជាសកម្មភាពមនុស្សធម៌ដ៏មានអត្ថន័យ ដែលបានរួមចំណែកជួយសម្រាលការលំបាកក្នុងជីវភាពប្រចាំថ្ងៃរបស់បងប្អូប្រជាពលរដ្ឋដែលមានជីវភាពខ្វះខាត និងជាការបង្ហាញពីស្មារតីសាមគ្គីភាព ការយកចិត្តទុកដាក់ និងការចូលរួមពីសប្បុរសជនក្នុងសង្គម។

ពិធីនេះប្រព្រឹត្តទៅនៅព្រះវិហារខ្មែរ-ឥល្លាម ក្នុងភូមិត្រពាំងឈូក ឃុំបឹង ស្រុកបារាយណ៍ ខេត្តកំពង់ធំ។

ថ្ងៃអាទិត្យ ១១រោច ខែទុតិយាសាឍ ឆ្នាំមមី អដ្ឋស័ក ពុទ្ធសករាជ ២៥៧០
ត្រូវនឹងថ្ងៃទី៩ ខែសីហា ឆ្នាំ២០២៦
**********
លោក ឃន ចាន់ថៃ អភិបាល នៃគណៈអភិបាលស្រុក បានអញ្ជើញត្រួតពិនិត្យ និងឧបត្ថម្ភគ្រឿងឧបភោគ បរិភោគ ជូនដល់កម្លាំងដែលត្រូវប្រចាំការ សម្រាប់ការប្រឡងសញ្ញាបត្រមធ្យមសិក្សាទុតិយភូមិ និងពិនិត្យស្ថានភាពការស្នាក់នៅរបស់សិស្សានុសិស្សមកពីស្រុកបារាយណ៍ ដែលត្រូវចូលរួមប្រឡងមធ្យមសិក្សាទុតិយភូមិ សម័យ ១០ សីហា ឆ្នាំ២០២៦ នៅទីរួមខេត្តកំពង់ធំ។
❤️អរគុណសន្តិភាព❤️

រសៀលថ្ងៃសៅរ៍ ១០រោច ខែទុតិយាសាឍ ឆ្នាំមមី អដ្ឋស័ក ពុទ្ធសករាជ ២៥៧០
ត្រូវនឹងថ្ងៃទី៨ ខែសីហា ឆ្នាំ២០២៦
********
លោក ឃន ចាន់ថៃ អភិបាល នៃគណៈអភិបាលស្រុក និងលោក ណឹម ចាន់ថា អនុប្រធានក្រុមការងាររាជរដ្ឋាភិបាលចុះមូលដ្ឋានស្រុកបារាយណ៍ បានអញ្ជើញជាអធិបតីក្នុងពិធីសំណេះសំណាលជាមួយអាណាព្យាបាល និងសិស្សានុសិស្សដែលមានជីវភាពខ្វះខាតចំនួន ៣១នាក់ ត្រៀមប្រឡងសញ្ញាបត្រមធ្យមសិក្សាទុតិយភូមិ ឆ្នាំ២០២៦ នៅសាលប្រជុំសាលាស្រុកបារាយណ៍។
ជាមួយគ្នានេះ ក្រោមការយកចិត្តទុក្ខដាក់ ពីសំណាក់ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ និងជាប្រធានក្រុមការងាររាជរដ្ឋាភិបាលចុះមូលដ្ឋានស្រុកបារាយណ៍ ឯកឧត្តម និងលោកជំទាវ បានផ្តល់ប្រាក់ឧបត្ថម្ភដល់សិស្សានុសិស្សដែលត្រូវចូលរួមប្រឡងសញ្ញាបត្រមធ្យមសិក្សាទុតិយភូមិ តាមរយៈ លោកអភិបាលស្រុក ដើម្បីជាការរួមចំណែកសម្រួលដល់ការធ្វើដំណើរ និងស្នាក់នៅរបស់សិស្សានុសិស្ស។
លោកអភិបាលស្រុក និងលោកប្រធានមន្ទីរ បានមានប្រសាសន៍សំណេះសំណាល សួរសុខទុក្ខ និងលើកទឹកចិត្តដល់សិស្សានុសិស្សទាំងអស់ ឱ្យខិតខំប្រឹងប្រែង ពង្រឹងសមត្ថភាព គោរពវិន័យ មានភាពអត់ធ្មត់ និងមានទំនុកចិត្តលើខ្លួនឯង។ ជាពិសេស ត្រូវត្រៀមខ្លួនឱ្យបានល្អទាំងផ្នែកចំណេះដឹង ស្មារតី និងសុខភាព ដើម្បីឈានទៅប្រឡងប្រកបដោយភាពជឿជាក់ និងទទួលបានលទ្ធផលល្អ។

ថ្ងៃអង្គារ ៦រោច ខែទុតិយាសាឍ ឆ្នាំមមី អដ្ឋស័ក ពុទ្ធសករាជ ២៥៧០
ត្រូវនឹងថ្ងៃទី៤ ខែសីហា ឆ្នាំ២០២៦
********
លោក ឃន ចាន់ថៃ អភិបាល នៃគណៈអភិបាលស្រុក និងជាប្រធានសមាគមអតីតយុទ្ធជន និងនិវត្តជនស្រុក និងសហការី បាននាំយកថវិកាបេឡាមរណសង្គ្រោះរបស់សមាគមអតីតយុទ្ធជន និងនិវត្តជនកម្ពុជា ទៅជូនដល់គ្រួសាររបស់លោក សំ ឆៃ សមាជិកសមាគមអតីតយុទ្ធជន និងនិវត្តជនកម្ពុជា ដែលទទួលមរណភាពកាលពីថ្ងៃ២៦ ខែកក្កដា ឆ្នាំ២០២៦ នៅភូមិសិរីសុខុម ឃុំឈូកខ្សាច់ ស្រុកបារាយណ៍ ខេត្តកំពង់ធំ។

ព្រឹកថ្ងៃអាទិត្យ ៤រោច ខែទុតិយាសាឍ ឆ្នាំមមី អដ្ឋស័ក ពុទ្ធសករាជ ២៥៧០
ត្រូវនឹងថ្ងៃទី២ ខែសីហា ឆ្នាំ២០២៦
_______________________________

លោក ឃន ចាន់ថៃ អភិបាល នៃគណៈអភិបាលស្រុក បានដឹកនាំសហការី ចុះសួរសុខទុក្ខ និងនាំយកជាគ្រឿងឧបភោគ-បរិភោគ មានដូចជា អង្ករ មី ភេសជ្ជៈ ទឹកត្រី ទឹកសុទ្ធ និងថវិកាមួយចំនួន ឧបត្ថម្ភជូនដក់កម្លាំងប្រចាំការ នៅទីបញ្ជាការស្រាលបារាយណ៍

ក្នុងឱកាសនោះ លោកអភិបាល បានមានប្រសាសន៍ផ្តាំផ្ញើដល់កម្លាំងប្រចាំការទីបញ្ជាការស្រាល ឱ្យបន្តខិតខំបំពេញតួនាទីភារកិច្ច ប្រកបដោយការទទួលខុសត្រូវខ្ពស់ លើការងារ ទប់ស្កាត់ បង្ការ បង្ក្រាបបទល្មើស នេសាទ ត្រូវផ្សព្វផ្សាយអប់រំដល់ប្រជាពលរដ្ឋ កុំឱ្យប្រព្រឹត្តបទល្មើសនេសាទ ជាពិសេសត្រូវទប់ស្កាត់ជាដាច់ខាត ចំពោះការទន្ទ្រានចូលប្រើប្រាស់អាស្រ័យផលលើដីស្ថិតក្នុងតំបន់៣

រសៀលថ្ងៃព្រហស្បតិ៍ ទី៣០ ខែកក្កដា ឆ្នាំ២០២៦
____________________________________

រដ្ឋបាលស្រុកបារាយណ៍ បានរៀបចំពិធីប្រកាសចូលកាន់តំណែងអភិបាលរង នៃគណៈអភិបាលស្រុក និងពិធីបំពាក់គ្រឿងឥស្សរិយយសជូនមន្ត្រីរាជការ នៃរដ្ឋបាលស្រុកបារាយណ៍ ក្រោម អធិបតីភាពដ៏ខ្ពង់ខ្ពស់ ឯកឧត្តម នួន ផារ័ត្ន អភិបាល នៃគណៈអភិបាលខេត្តកំពង់ធំ នៅសាលាស្រុកបារាយណ៍។

លោក ឆយ កុសល់ ត្រូវបានតែងតាំងជាអភិបាលរង នៃគណៈអភិបាលស្រុកបារាយណ៍ បានប្តេជ្ញាចិត្ត ខិតខំបំពេញតួនាទី និងភារកិច្ចប្រកបដោយស្មារតីទទួលខុសត្រូវខ្ពស់ គោរពច្បាប់ លិខិតបទដ្ឋានគតិយុត្តជាធរមាន និងសាមគ្គីភាពផ្ទៃក្នុង ដើម្បីលើកកម្ពស់ប្រសិទ្ធភាពគុណភាពការងារ និងការផ្តល់សេវាសាធារណៈជូនប្រជាពលរដ្ឋឱ្យកាន់តែល្អប្រសើរ។

ពិធីនេះមានការអញ្ជើញចូលរួមពីថ្នាក់ដឹកនាំខេត្ត ថ្នាក់ដឹកនាំស្រុក លោក លោកស្រី ប្រធាន អនុប្រធានមន្ទីរ អង្គភាពជុំវិញខេត្ត-ស្រុក កងកម្លាំងប្រដាប់អាវុធទាំងបីប្រភេទ មន្ត្រីរាជការ អាជ្ញាធរឃុំ-ភូមិ និងបងប្អូនប្រជាពលរដ្ឋជាច្រើនរូប។
ជាមួយគ្នានេះ ឯកឧត្តមអភិបាល បានថ្លែងអំណរគុណ និងកោតសរសើរចំពោះមន្ត្រីរាជការដែលទទួលបានគ្រឿងឥស្សរិយយស ដោយចាត់ទុកថា នេះគឺជាការទទួលស្គាល់នូវស្នាដៃ ការខិតខំប្រឹងប្រែង និងការលះបង់ក្នុងការបំពេញភារកិច្ចបម្រើជាតិ និងប្រជាពលរដ្ឋកន្លងមក។ ទន្ទឹមនឹងនេះ ឯកឧត្តមបានលើកទឹកចិត្តឱ្យមន្ត្រីរាជការទាំងអស់បន្តរក្សាក្រមសីលធម៌ វិន័យ មនសិការវិជ្ជាជីវៈ និងបំពេញការងារដោយតម្កល់ផលប្រយោជន៍សាធារណៈជាចម្បង

នៅព្រឹកថ្ងៃពុធ ១៥កើត ខែទុតិយាសាឍ ឆ្នាមមី អដ្ឋស័ក ពុទ្ធសករាជ ២៥៧០ ត្រូវនិងថ្ងៃទី២៩ ខែកក្កដា ឆ្នាំ២០២៦
______________________________________

លោក អួង សារឿន ប្រធានក្រុមប្រឹក្សាស្រុក និងលោក ឃន ចាន់ថៃ អភិបាល នៃគណៈអភិបាលស្រុក ព្រមទាំងសហការីបានអញ្ជើញចូលរួម ពិធី សំណេះសំណាល និងបញ្ចុះបឋមសិលាសាងសង់អាគារមួយខ្នង បីបន្ទប់ ស្ថិតក្នុងបរិវេណវត្តខ្សាច់ល្អិត ភូមិខ្សាច់ល្អិត ឃុំចុងដូង ស្រុកបារាយណ៍ ខេត្តកំពង់ធំ

នៅសៀលថ្ងៃអង្គារ ១៤កើត ខែទុតិយាសាឍ ឆ្នាមមី អដ្ឋស័ក ពុទ្ធសករាជ ២៥៧០ ត្រូវនិងថ្ងៃទី២៨ ខែកក្កដា ឆ្នាំ២០២៦
______________________________________

លោក អួង សារឿន ប្រធានក្រុមប្រឹក្សាស្រុក និងលោក ឃន ចាន់ថៃ អភិបាល នៃគណៈអភិបាលស្រុក ព្រមទាំងសហការីបានអញ្ជើញចូលរួម ពិធីបុណ្យផ្កាប្រាក់សាមគ្កី និង ចូលព្រះវស្សា វត្តបារាយណ៍