Lifestyle & relaxation

វាលស្រែ៥០០

វាលស្រែ៥០០ ជាកន្លែទេសចរណ៍មួយ ដែលមានព្រៃភ្នំធម្មជាតិដ៏ស្រស់ស្អាត និងមានផ្ទាំង​ថ្មតូចធំជាច្រើន។ នៅទីនេះ ក៏មានផ្កាបំពង់ក្រឡោម ផ្កាកេសរកូលព្រៃ ដើមស្រូយ និងមេ​អំបៅជាច្រើនប្រភេទ ដែលជួយបន្ថែមសម្រស់វាលស្រែ៥០០ ឱ្យកាន់តែស្រស់ស្អាត។ បន្ថែមពី​នេះវាលស្រែ៥០០ ក៏មានកន្លែងទេសចរណ៍ជាច្រើនរួមមាន ថ្មប្រាសាទ ជាកន្លែង​សម្បូរទៅដោយផ្ទាំងថ្មធម្មជាតិ ដែលមានអាយុកាលរាប់រយឆ្នាំ ​ដុះតម្រៀបគ្នាដោយផ្នែក​ខាងក្រោមដូចជញ្ជាំងប្រាសាទ និងផ្នែកខាងលើស្រួចឡើងដូចកំពូលប្រាសាទ។

រីឯ កន្លែងទេសចរណ៍មួយទៀត គឺខ្លោងទ្វារមេឃ ដោយមានថ្មសងខាងមានសណ្ឋាន ស្រដៀងនឹងខ្លោងទ្វារ។ ពេលទេចរមកដល់ទីនេះ ពួកគេតែងដើរឆ្លងខ្លោងទ្វារនេះ ដើម្បី​សុំសេចក្ដីសុខ និងគាប់បំណងប្រាថ្នា។ នៅវាលស្រែ៥០០ ក៏មានទីតាំងសមាធិ និងល្អាង​ទឹកអម្រិតស័ក្តិសិទ្ធិ។ ទីតាំងសមាធិនេះ បែរមុខចំលំហូរនៃខ្យល់បក់ ចេញពីខ្នងភ្នំ ដែល​ពោរពេញទៅដោយអុកស៊ីសែន យ៉ាងល្អសម្រាប់ខ្យល់ដង្ហើម។

ចំណែកនៅខាងក្រោម មានផ្ទាំងថ្មដ៏ធំ និងមានល្អាងទឹកអម្រិតដ៏ស័ក្តិសិទ្ធ។ អ្នកមានជំនឿ តែងមកបួងសួងសុំទឹកអម្រិតនោះ ដើម្បីសុំសេចក្ដីសុខ៕

ទឹកជ្រោះពពកវិល

ទឹកជ្រោះពពក ជាកន្លែងទេសចរណ៍ដ៏ទាក់ទាញមួយនៅភ្នំបូកគោ។ នៅវដូវវស្សា អ្នកទេសចរ អាចងូតទឹកលេងកម្សាន្ត និងផ្ដិតយករូបសម្រស់នៃទឹកជ្រោះមួយនេះ និងព្រៃព្រឹក្សាធំៗ ដុះសងខាងមាត់ជ្រោះ។ ចំណែកនៅរដូវប្រាំង ទេសចរអាចធ្វើ​ដំណើរចុះដល់បាតជ្រោះ ដើរគយគន់ថ្ម ដែលមានផ្ទាំងតូចធំ ហាក់ដូចជាគេកាត់​យកមកតម្រៀបលើគ្នា ដូចផ្ទាំងគំនូរគួរជាទីគយគន់។

សណ្ឋាគារ ឡឺបូកគោផាឡេស

សណ្ឋាគារ​ដ៏​ប្រណិត និង​ប្រវត្តិសាស្ត្រ ​តាំងពី​ទសវត្សរ៍​ឆ្នាំ​១៩២០ ​ត្រូវបាន​បើក​ឡើងវិញ​នៅ​ដើមឆ្នាំ​១៩៦២ ដោយ​ព្រះករុណា ព្រះបាទ​សម្តេច ព្រះ​នរោត្តម សីហនុ ដែល​ផ្តល់​សេវាកម្ម​ជូន​មន្ត្រីជាន់ខ្ពស់ រាជរដ្ឋាភិបាល និង​ពាណិជ្ជករ ​ដែលមាន​ទ្រព្យ​សម្បត្តិ​ស្ដុកស្ដម្ភ ហើយក៏​ជា​កន្លែង​វិស្សម​កាល ដែលអតីតព្រះមហាក្សត្រ ​ព្រះករុណា ព្រះបាទ​សម្តេចព្រះ នរោត្តម សីហនុ សព្វរាជហឫទ័យ​​ជាទី​បំផុត​។ ​សព្វថ្ងៃនេះ សណ្ឋាគារ ឡឺ បូកគោ ផា​ឡេស ត្រូវបាន​ជួសជុល​ឡើងវិញ​ដោយ​សណ្ឋាគារ និង​រមណីយដ្ឋាន​សុខា​។ ស្ថិតនៅ​ច្រាំង​ថ្ម​ចោត​នៃ​កំពូល​ភ្នំ​បូកគោ សណ្ឋាគារ​ប្រវត្តិសាស្ត្រ​មួយ​នេះ ផ្តល់នូវ​ទេសភាព​ដ៏​ស្រស់ត្រកាល ដែល​ត្រូវបាន​ជនជាតិ​បារាំង​ហៅថា ឆ្នេរសមុទ្រ​បៃតង​។

វិហារកាតូលិច

ព្រះវិហារកាតូលិក ត្រូវបានសាងសង់ឡើងដោយជនជាតិបារាំង នៅដើមឆ្នាំ១៩២០។ ទេសចរ ដែលទៅដល់ព្រះវិហារនេះ តែងតែផ្ដិតរូបភាព ជាមួយសំណង់អគារព្រះវិហារ និងអាចគយគន់ថ្ងៃលិចដ៏ស្រស់ស្អាត។

ដំណាក់ស្លាខ្មៅ

ដំណាក់ស្លាខ្មៅ ត្រូវបានសាងសង់ឡើងនៅឆ្នាំ១៩៣៦ ពីបាយអរ និងបិទឈើស្លាខ្មៅ ជាទី ព្រះរាជដំណាក់សម្រាកលំហែព្រះកាយ របស់ព្រះបរមរតនកោដ្ឋ ព្រះបាទ នរោត្តម សីហនុ ក្នុងសម័យសង្គមរាស្រ្តនិយម។ ដោយសារសង្រ្គាមស៊ីវិល ដំណាក់ស្លាខ្មៅនេះ ត្រូវរងការ​ខូចខាត ប៉ុន្តែអគារនេះ មានសភាពរឹងមាំ។ ទេសចរ ដែលមកភ្នំបូកគោនេះ តែងមិនមើល រំលងដំណាក់ស្លាខ្មៅនេះឡើយ។