H.E Pov Sopheak

សារលិខិតថ្វាយព្រះពរ

សូមក្រាបបង្គំទូលថ្វាយ សម្តេចព្រះមហាក្សត្រី នរោត្តម មុនិនាថ សីហនុ ព្រះវររាជមាតាជាតិខ្មែរ ក្នុងសេរីភាព សេចក្តីថ្លៃថ្នូរ និងសុភមង្គល

ជាទីគោរពសក្ការៈដ៏ខ្ពង់ខ្ពស់បំផុត!

បពិត្រ សម្តេចព្រះមហាក្សត្រី ព្រះវររាជមាតាជាតិខ្មែរ ជាទីគោរពសក្ការៈដ៏ខ្ពង់ខ្ពស់បំផុត!
ក្នុងឱកាសដ៏មហានក្ខត្តឫក្សឧត្តុង្គឧត្តម នៃព្រះរាជពិធីបុណ្យចម្រើនព្រះជន្ម គម្រប់ខួប ៩០ព្រះវស្សា ឈានចូល ៩១ព្រះវស្សា នៅថ្ងៃព្រហស្បតិ៍ ៤កើត ខែបឋមាសាឍ ឆ្នាំមមី អដ្ឋស័ក ពុទ្ធសករាជ ២៥៧០ ត្រូវនឹងថ្ងៃទី១៨ ខែមិថុនា ឆ្នាំ២០២៦ ទូលព្រះបង្គំខ្ញុំ សូមព្រះ បរមរាជានុញ្ញាតលើកហត្ថទាំងទ្វេប្រណម្យ បួងសួងដល់គុណបុណ្យព្រះរតនត្រ័យ និងវត្ថុស័ក្តិសិទ្ធិក្នុងលោក សូមក្រាបបង្គំទូល ថ្វាយនូវសព្ទសាធុការពរជ័យ បវរសួស្តី សិរីមង្គល វិបុលសុខ មហាប្រសើរគ្រប់ប្រការ ថ្វាយចំពោះ សម្តេចព្រះវររាជមាតា ជាតិខ្មែរ សូមព្រះអង្គទ្រង់ប្រកបដោយព្រះរាជសុខភាពបរិបូរណ៍ ព្រះកាយពលមាំមួន ព្រះបញ្ញាញាណភ្លឺថ្លា និងមានព្រះ ជន្មាយុយឺនយូរជាងរយព្រះវស្សា។
សូមក្រាបបង្គំសម្តែងនូវកតញ្ញូតាធម៌ និងដឹងគុណយ៉ាងជ្រាលជ្រៅបំផុតចំពោះ ព្រះរាជគុណូបការៈដ៏ថ្លៃថ្លា និងមហាសាលរបស់ សម្តេចព្រះវររាជមាតាជាតិខ្មែរ ដែលព្រះអង្គតែងតែបានបរិច្ចាគនូវ ព្រះកាយពល ព្រះបញ្ញាញាណ និងព្រះរាជទ្រព្យផ្ទាល់ ក្នុងការបំពេញព្រះរាជបូជនីយកិច្ចដ៏ឧត្តុង្គឧត្តម បម្រើជាតិមាតុភូមិ និង ប្រជារាស្ត្រខ្មែរ ទូទាំងព្រះរាជាណាចក្រកម្ពុជា ក្នុងនាមព្រះអង្គគឺជានិមិត្តរូបនៃព្រះមាតាប្រកបដោយព្រហ្មវិហារធម៌ និងជា ព្រះនិមិត្តរូបនៃសន្តិភាព ដែលជានិច្ចកាលតែងតែគង់ប្រថាប់ជាម្លប់ដ៏ត្រជាក់ត្រជុំ ក្នុងការរួមចំណែកយ៉ាងសកម្មលើកស្ទួយ វិស័យអប់រំ សុខាភិបាល វប្បធម៌ និងជាពិសេសសកម្មភាពមនុស្សធម៌នានា ជួយសង្គ្រោះប្រជារាស្ត្រក្រីក្រ ទុគ៌តជន ចាស់ជរា និងកុមារកំព្រា ឱ្យទទួលបាននូវក្តីសង្ឃឹម និងស្នាមញញឹមជានិច្ច។
នាទិវាដ៏មហាមង្គលសួស្តីនេះ ខ្ញុំសូមបួងសួងដល់គុណបុណ្យព្រះរតនត្រ័យ កែវទាំងបី ទេវតាថែរក្សាព្រះមហាស្វេតច្ឆត្រ ព្រះបារមីនៃព្រះវិញ្ញាណក្ខន្ធអតីតព្រះមហាក្សត្រ ព្រះមហាក្សត្រិយានីខ្មែរគ្រប់ព្រះអង្គ ជាពិសេស ព្រះបារមីព្រះបរមរតនកោដ្ឋ សូមព្រះមេត្តាប្រោសប្រទានពរជ័យសិរីមង្គល ថ្វាយ សម្តេចព្រះមហាក្សត្រី ព្រះវររាជមាតាជាតិខ្មែរ សូមព្រះអង្គបានសមប្រកបដោយព្រះពុទ្ធពរទាំងបួនប្រការគឺ អាយុ វណ្ណៈ សុខៈ និងពលៈ កុំបីឃ្លៀងឃ្លាតឡើយ ដើម្បីគង់ប្រថាប់ជាម្លប់ដ៏សុខដុមរមនា ដល់ប្រជារាស្ត្រខ្មែរជាកូនចៅ ចៅទួត យូរអង្វែងតរៀងទៅ។
សូមក្រាបបង្គំទូលថ្វាយ ថ្ងៃពុធ ៣កើត ខែបឋមាសាឍ ឆ្នាំមមី អដ្ឋស័ក ព.ស.២៥៧០ រាជធានីភ្នំពេញ ត្រូវនឹងថ្ងៃទី១៧ ខែមិថុនា ឆ្នាំ២០២៦