Pretty Petite

តើស្តង់ដាសំរស់គឺជាអី្វ?

ស្តង់ដាសំរស់គឺសំដៅទៅលើការកំនត់តំលៃចំពោះលក្ខណៈរូបរាងបុរសនិងស្រ្តីដែលគេចាត់ទុកថាមានភាពស្រស់ស្អាតហើយសាកសមនឹងចុះចំណោមក្នុងសហគមន៍ណាមួយ ហើយមានភាពខុសគ្នាពីរវាងជាតិសាសន៍មួយ ពីវប្បធម៍មួយទៅវប្បធម៍មួយ។ ស្តង់ដាសំរស់នេះផងដែរគឺទាក់ទងនឹងស្បែក សក់ សំលៀកបំពាក់និងផ្នែកផ្សេងៗទៀតនៃរូបរាងកាយរបស់មនុស្ស។ ស្តង់ដាសំរស់ផ្តល់សារៈសំខាន់ជាច្រើន តែបើកំនត់ស្តង់ដាខ្ពស់ពេកវាក៍ផ្តល់ភាពអវិជ្ជមាននិងគ្រោះថ្នាក់ដល់មនុស្សផងដែរ។

ស្តង់ដាសំរស់ផ្តល់ភាពវិជ្ចមានជាច្រើនទាក់ទងនឹងសុខភាពរាងកាយនិងសុខភាពផ្លូវចិត្តរបស់មនុស្សម្នាក់ៗដែលមានដូចជា៖

1. ជំរុញការថែទាំខ្លួនឯង (self care)៖ ស្តង់ដារសម្រស់តែងតែលើកទឹកចិត្តមនុស្សម្នាក់ៗឱ្យថែរក្សាខ្លួនឯង និងផ្តោតសំខាន់ការរក្សារូបរាងកាយរបស់ពួកគេឲ្យបានរឹងមាំល្អ។ ជាក់ស្តែងដូចជា ការមានទម្លាប់ថែរក្សាស្បែក(skincare routine)ដែលសមស្របទៅតាមស្ថានភាពស្បែកបូករូមទាំងការធ្វើលំហាត់ប្រាណជាប្រចាំដើម្បីទទួលបានរាងកាយមួយដែលគេចង់បាននិងសុខភាពទូទៅល្អទាំងកាយនិងចិត្ត។

2. បន្កើនទំនុកចិត្តខ្លួនឯង(boost self confidence)៖ ការប្រកាន់ខ្ជាប់នូវស្តង់ដារនៃភាពស្រស់ស្អាតអាចបង្កើនទំនុកចិត្ត និងធ្វើធ្វើឲ្យការមើលមករូបភាពខ្លួនឯងប្រសើរឡើង។ នៅពេលដែលបុគ្គលម្នាក់ៗមានអារម្មណ៍ល្អចំពោះរូបរាងរបស់ពួកគេ ពួកគេមានទំនោរជឿជាក់លើខ្លួនឯងបន្ថែមទៀតនៅក្នុងទិដ្ឋភាពផ្សេងៗនៃជីវិតរបស់ពួកគេ ដូចជានៅកន្លែងធ្វើការ ក្នុងស្ថានភាពសង្គម ឬក្នុងទំនាក់ទំនងផ្សេងៗជាដើម។

3. លើកកំពស់ការច្នៃប្រឌិត៖ ស្តង់ដារសម្រស់អាចជម្រុញការច្នៃប្រឌិតដោយការព្យាយាមស្រាវជ្រាវរកវិធីសាស្រ្តបច្ចេកវិទ្យាថ្មីៗក្នុងឧស្សាហកម្មវិស័យសម្រស់ និងម៉ូដ។ អ្នកតុបតែងមុខ អ្នករចនាម៉ូដផ្សេងៗ តែងតែបង្កើតនិន្នាការថ្មីៗដែលប្រជែងនឹងបទដ្ឋាននៃស្តង់ដាសំរស់ពីមុនៗមកដែលធ្វើឲ្យមានការបង្ហាញនូវសំរស់ស្អាតចំរុះខុសៗគ្នាជាច្រើនយ៉ាង។

ក្រៅពីមានភាពវិជ្ជមាន ស្តង់ដាសំរស់ក៏មានចំនុចអវិជ្ជមានមួយចំនួនផងដែរគឺ៖

1. មានបញ្ហាសុខភាពផ្លូវចិត្ត៖ ស្តង់ដារសម្រស់ដែលខុសពីការពិតជ្រុល តែងតែនាំឱ្យបុគ្គលម្នាក់ៗប្រៀបធៀបខ្លួនឯងទៅនឹងបុគ្គលផ្សេងទៀតនេះអាចបណ្តាអោយខ្លួនឯងមានអារម្មណ៍ថាមិនគ្រប់គ្រាន់ ការគោរពស្រលាញ់ខ្លួនឯងក៏ចុះទាប។ការព្យាយាមឥតឈប់ឈរដើម្បីបំពេញតាមស្តង់ដារសម្រស់ដែលមិនអាចសម្រេចបានជាហេតុនាំឱ្យមានការថប់បារម្ភ ជំងឺធ្លាក់ទឹកចិត្ត និងបញ្ហាសុខភាពផ្លូវចិត្តផ្សេងទៀតដោយសម្ពាធក្នុងការរកមើលវិធីជាក់លាក់មួយអាចបង្កឱ្យមានភាពតានតឹងយ៉ាងខ្លាំង និងប៉ះពាល់ដល់សុខុមាលភាពទូទៅរបស់មនុស្សម្នាក់ៗ។

2. ហានិភ័យចំពោះសុខភាពរាងកាយនិងជីវិត៖ ការអនុវត្តតាមស្តង់ដាសំរស់ខ្លាំង ដូចជាតមរបបអាហារជ្រុល ការធ្វើលំហាត់ប្រាណច្រើនហួសប្រមាណ ឬការវះកាត់កែសម្ផស្សផ្សេងៗអាចបង្គ្រោះថ្នាក់ធ្ងន់ធ្ងរដល់សុខភាពនិងអាចឈានដល់បាត់បង់ជីវិត។

3. ឥទ្ធិពលមិនល្អក្នុងសង្គម៖ ការកំនត់ស្តង់ដារសម្រស់អាចធ្វើអោយមានការរើសអើងពីមនុស្សមា្នក់ទៅម្នាក់ទៀតដូចជា ការទទួលរាក់ទាក់មិនស្មើរគ្នា ហើយខ្លះក្នុងកន្លែងធ្វើការផ្សេងៗមានភាពលំអៀងក្នុងការតំលើងថានៈការងារដោយផ្អែកលើរូបរាងខាងក្រៅដែលអ្នកខ្លះគិតថាមិនស្អាតមិនសាកសមនឹងស្តង់ដាសំរស់របស់គេ។ ការរើសអើងខ្លះទៀតក៏អាចឈានដល់ ការbully គំរាមកំហែងធ្វើបាបក្រោមរូបភាពខុសៗគ្នាតាមសកម្មភាពរស់នៅផ្ទាល់និងតាមប្រពន្ធ័បណ្តាញសង្គម។

ពួកយើងស្ទើរតែគ្រប់គ្នាទៅហើយដែលតែងតែទទួលបានឃ្លាទាំងនេះ “ហ្អែងកើតមុនទៀតហ្អាស៎” “ស្បែកមើលទៅខ្មៅម៉េស””ធាត់ម៉េស””ស្គមម៉េសអត់ទាក់ទាញសោះ”។ ចាំណាមនុស្សម្នាក់មានភាពស្រស់ស្អាតរាងៗខ្លួន។
Next time don’t forget to remind them that beauty does not form a beautiful character good personality does.

កិច្ចការផ្ទះ: តើស្ដង់ដាសំរស់ផ្ដល់លក្ចណៈវិជ្ជមាន និងអវិជ្ជមានអ្វីខ្លះទាក់ទងនឹងផ្នែកសុខភាពរាងកាយនិងសុខភាពផ្លូវចិត្តរបស់មនុស្សម្នាក់ៗ? និងលើកជាឧទាហរណ៍ឱ្យបាន 3 ចំណុច។
Credit: Thim Sreyleak