Mak Nita Online Shop

"ជាអ្នកណាមិនសំខាន់"
ការពិតទៅ មនុស្សយើងជាអ្នកណាមិនសំខាន់នោះទេ អ្វីដែលសំខាន់ គឺយើងដឹងខ្លួនឯងថា "ខ្លួនឯងជាអ្នកណា ?"
មនុស្សយើងមានក្តីស្រលាញ់ មានការគិត និង ចំណង់ចំណូលចិត្តមិនដូចគ្នា ហើយអ្វីដែលរឹតតែខុសគ្នាបំផុតនោះ គឺភាពជាខ្លួនឯងរៀងៗខ្លួន ។ យើងមិនអាចដូចគេ គេក៏មិនអាចដូចជាយើងដែរ ។
ពេលនេះ យើងស្ថិតនៅកន្លែងណា កំពុងធ្វើអ្វី វាមិនសំខាន់នោះឡើយ ហើយក៏មិនគួរបណ្តោយឲ្យខ្លួនឯងដេកដួលទៅតាមស្ថានភាព ។ បើយើងមិនដឹងថា ខ្លួនឯងជាអ្នកណាទេ យើងនឹង វង្វេងផ្លូវជីវិតរបស់ខ្លួនឯង ដើរចូលទៅលើវិថីនៃជីវិតរបស់អ្នកដទៃជាមិនខាន ។ ពេលនោះហើយដែលធ្វើឲ្យយើងយល់ថា ខ្លួនឯងអន់ អសមត្ថភាព គ្មានប្រយោជន៍ មិនបានការ ។ល។ តែការពិតទៅ មកពីយើងដើរច្រលំផ្លូវ មិនដឹងថា ខ្លួនឯងជាអ្នកណា កើតមកមានទេពកោសល្យពិសេស សម្រាប់ធ្វើអ្វី ?
បើយើងស្គាល់ពីខ្លួនឯងច្បាស់ ដឹងពីគោលបំណងក្នុងជីវិតរបស់ខ្លួនឯង ប្រាកដណាស់ ទោះបីយើងធ្វើការងារតូចតាចមិនសូវមានអ្នកឲ្យតម្លៃក៏យើងមានសេចក្តីសុខនឹង ធ្វើវាដែរ ។ ព្រោះយើងធ្វើចេញពីចិត្ត មិនមែនធ្វើចេញពីការស្នើសុំ ឬ ការបង្ខំ ដើម្បីតែគោលដៅរបស់អ្នកណាម្នាក់ឡើយ ។
គ្មានអ្នកណាយល់ពីយើង ច្បាស់ជាងយើងខ្លួនឯងទេ ដូច្នេះ ចូររៀនសង្កេត រៀនស្វែងយល់ពីចិត្តគំនិត និង ចំណង់ចំណូលចិត្តរបស់ខ្លួនឯង ហើយឧស្សាហ៍ព្យាយាមធ្វើអ្វីដែលខ្លួនឯងចង់ក្លាយជា ។ ថ្ងៃណាមួយ អ្នកដទៃនឹង មើលឃើញជាក់ច្បាស់ ថា យើងជាអ្នកណា នៅពេលដែលយើងអាចសម្រេចនូវលទ្ធផលចេញពីការខំសន្សំជារៀងរាល់ថ្ងៃរបស់យើង កែច្នៃខ្លួនឯងទៅជាអ្នកណា ដែលយើងចង់ក្លាយជាពិតប្រាកដ នេះហើយជាដំណើរជីវិត តម្រូវឲ្យយើងឆ្លងកាត់រាល់រឿងរ៉ាវទាំងឡាយ ទម្រាំទៅដល់ចំណុចកំពូល ។

"ចាញ់ចិត្តខ្លួនឯង"
ជារៀងរាល់ថ្ងៃតែងតែផ្តល់នូវថ្ងៃថ្មីសម្រាប់មនុស្សគ្រប់គ្នា ប៉ុន្តែ មិនប្រាកដថាមនុស្សគ្រប់គ្នាសុទ្ធតែចាប់យកឧ៌កាសពីថ្ងៃថ្មីបានទាំងអស់គ្នានោះឡើយ ។
ជាទូទៅមនុស្សយើងចូលចិត្តស្រម៉ៃ បណ្តែតបណ្តោយឲ្យខ្លួនឯងវង្វេងលង់ទៅក្នុងការគិត រហូតដល់ពេលខ្លះ ចាញ់បោកចិត្តរវើករវាយរបស់ខ្លួនឯង ។ ហើយយល់ច្រលំថា “ខ្លួនឯងជាមនុស្សគ្មានប្រយោជន៍ គ្មានបានការ គ្មានតម្លៃ គ្មាននេះគ្មាននោះ” តែការពិត អ្វីដែលមនុស្សមួយចំនួនគ្មាន គឺចិត្តក្លាហានតែប៉ុណ្ណោះ ។
បើយើងរវល់តែរស់នៅក្នុងគំនិតខ្លួនឯងយូរពេក មិនព្រមហ៊ានបោះជំហានជម្នះចិត្តភ័យខ្លាចនឹង ចាប់ផ្តើមធ្វើអ្វីមួយថ្មី សម្រាប់ជីវិតខ្លួនឯងទេ ។ យើងនឹង មានឈ្មោះថា “មនុស្សចាញ់”។ បើសូម្បីតែយកឈ្នះចិត្តខ្លួនឯងមិនអាចធ្វើបានផង តើយើងអាចនឹង យកឈ្នះអ្វីផ្សេងបានទៅ ?