Alcohol & Smoking

#ការទទួលទានគ្រឿងស្រវឹង ឬស្រា លើសកម្រិតគឺបង្កើនហានិភ័យនៃជំងឺមហារីកមួយចំនួន និងជំងឺផ្សេងៗដែលអាចគំរាមកំហែងដល់អាយុជីវិត ជាពិសេស អ្នកកើតជំងឺទឹកនោមផ្អែម ព្រោះក្នុងជាតិស្រវឹងខ្លះ មានអត្រាជាតិស្ករខ្ពស់ បណ្ដាលឱ្យជាតិស្ករក្នុងឈាមឡើងខ្ពស់ពិបាកគ្រប់គ្រង ផ្ទុយទៅវិញបើការទទួលទានជាតិស្រវឹងលើសលប់ពេក គឺជំរុញឱ្យថ្លើមធ្វើការកាន់តែខ្លាំង និងធ្ងន់សម្រាប់បញ្ចេញជាតិពុល និងធ្វើឱ្យជាតិស្ករក្នុងឈាមចុះខ្លាំង ជាកត្តាគ្រោះថ្នាក់ធ្ងន់ធ្ងរ ដែលជាមូលហេតុ ត្រូវប្រុងប្រយ័ត្នខ្ពស់។

តាមការបញ្ជាក់របស់លោកវេជ្ជបណ្ឌិត ហាក់ ចាន់ភក្តី ឯកទេស ថ្លើម ក្រពះ ពោះវៀន នៅមន្ទីរសំរាកព្យាបាល អេគីប បានឱ្យដឹងថាទៀតថា «ស្រា ក្រៅពីមានជាតិស្ករខ្ពស់ហើយ ក៏មានកាល់ឡូរីខ្ពស់ផងដែរ។ កាល់ឡូរី គឺជាថាមពល ដូច្នេះបើកាល់ឡូរីខ្ពស់ នោះថាមពលក៏ច្រើនដូចគ្នា ពេលអត់បានប្រើប្រាស់ ពីសរីរាង្គខ្លួនយើង វានៅសេសសល់នឹងស្ដុកទុកជា ទ្រីក្លីសេរីត ជាសារធាតុខ្លាញ់ ហើយជាដើមចមធ្វើឱ្យលើសជាតិខ្លាញ់នៅក្នុងសាច់ថ្លើមបណ្ដាលឱ្យមានជំងឺខ្លាញ់រុំថ្លើម»។

លើសពីនោះ លោកវេជ្ជបណ្ឌិត ថ្លែងបន្ដថា ការទទួលទានគ្រឿងស្រវឹងជាប្រចាំលើសកម្រិត ជះឥទ្ធពល នឹងបង្កឲ្យមានជំងឺរលាកថ្លើម ជំងឺរលាកលំពែង ហើយក៏ជាហានិភ័យឲ្យមានជំងឺមហារីកមួយចំនួនដូចជា ជំងឺមហារីកពោះវៀនធំ មហារីកបំពង់អាហារ មហារីកក្រពះ ។ល។

#ការប្រើ​ប្រាស់គ្រឿងស្រវឹងបង្កជំងឺជាង ២០០ មុខ ខណៈមនុស្ស ២.៦ លាននាក់ស្លាប់ជារៀងរាល់ឆ្នាំ

#ផលប៉ះពាល់សុខភាពនៃការទទួលទានគ្រឿងស្រវឹងច្រើនហួសកម្រិត
ផលប៉ះពាល់សុខភាពនៃការទទួលទានគ្រឿងស្រវឹងច្រើនហួសកម្រិត គ្រឿងស្រវឹង ឬស្រា គឺជាសារជាតិពុលម៉្យាងដែលត្រូវបានផលិតចេញពីម្សៅមេ វាជាសារជាតិដែលមានឥទ្ធិពលដល់ចិត្តសាស្ត្រ និងធ្វើឱ្យមានការផ្លាស់ប្តូរផ្នែកអារម្មណ៍ដល់អ្នកប្រើប្រាស់។​ ស្រាធ្វើឱ្យប៉ះពាល់​ ឬខូចខាតស្ទើរគ្រប់​សរីរាង្អក្នុងខ្លួនយើង ប្រសិនបើមានការទទួលទានច្រើនពេក។ វាក៏នាំឱ្យមានការផ្លាស់ប្តូរដំណើរការក្នុងសរីរាង្គរបស់យើង ទាំងរាងកាយ ខួរក្បាល ហើយក្នុងនោះ អ្នកទទួលទានជាប់អាចនាំឱ្យញៀន។

នៅក្នុងសង្គមបច្ចុប្បន្ន គ្រឿងស្រវឹងភាគច្រើន ត្រូវបានដាក់ជូនសម្រាប់បម្រើការនៅក្នុងពិធីជួបជុំនានា ដូចជា ពិធីអាពាហ៌ពិពាហ៌ ឡើងគេហដ្ឋាន ខួបកំណើត​ និងកម្មពិធីជប់លៀងផ្សេងៗ។ ជាទូទៅ គ្រឿងស្រវឹង មានឈ្មោះផ្សេងៗគ្នាទៅតាមតំបន់ និងប្រទេសនីមួយៗ ដែលក្នុងនោះមានដូចជា ទឹកត្នោតជូរ ស្រាបៀរ ស្រាក្រហម ស្រាវីស្គី ម៉ាទីនី ជាដើម។

បរិមាណនៃជាតិអាល់កុលសុទ្ធត្រូវបានរកឃើញនៅក្នុង៖

ស្រាបៀរ ៣៥០ មល (ជាតិអាល់កុល ៥%)

ទឹកត្នោតជូរ ៣០០ មល (ជាតិអាល់កុល ៣%)

ស្រាក្រហម ១៥០ មល (ជាតិអាល់កុល ១២%)

ស្រាខ្លាំង ៤៥ មល (ជាតិអាល់កុល ៤០%) ឧ. Gin, Rum, Vodka, Whiskey

មនុស្សដែលមិនគួរពិសាគ្រឿងស្រវឹង រួមមាន៖

អ្នកមានអាយុតិចជាង ២១ឆ្នាំ

អ្នកមានផ្ទៃពោះ ឬត្រៀមមានផ្ទៃពោះ ស្រ្តីទើបឆ្លងទន្លេរួច ស្រ្តីកំពុងបំបៅដោះកូន

អ្នកបើកបរគ្រឿងយន្តគ្រប់ប្រភេទ អ្នកមានគម្រោងចេញដំណើរមានណាត់ទៅណាមួយដែលត្រូវធ្វើដំណើរតាមរយៈ យានជំនិះផ្សេងៗ

អ្នកកំពុងព្យាបាល រឺកំពុងប្រើប្រាស់ថ្នាំផ្សេងៗ​

អ្នកដែលមានប្រតិកម្មជាមួយគ្រឿងស្រវឹង

អ្នកដែលបានផ្តាច់ការញៀនស្រាបានរួចហើយ

អ្នកកំពុងមានជំងឺផ្សេងៗដូចជា ជំងឺលើសសម្ពាធឈាម ជំងឺបេះដូង រលាកថ្លើម រលាកលំពែង រលាកតម្រងនោមជាដើម

ផលប៉ះពាល់សុខភាពរយៈពេលខ្លី ឬភ្លាមៗ

ការប្រើប្រាស់គ្រឿងស្រវឹងច្រើនហួសប្រមាណមានផលប៉ះពាល់ភ្លាមៗដែលបង្កើនហានិភ័យនៃស្ថានភាពសុខភាពដែលបង្កគ្រោះថ្នាក់ជាច្រើន មានដូចខាងក្រោម៖

នៅលើស្បែក​ អាចឡើងរោល ក្រហមមុខ ហើម ឬអាឡែកស៊ី

បាត់បង់ការគ្រប់គ្រងអារម្មណ៍ ស្មារតី

ងងុយគេង បាត់បង់ជាតិស្ករ រាគ ក្អួត ចង្អោរ ចង្វាក់បេះដូងមិនប្រក្រតី ខ្យល់គ សន្លប់

គ្រោះថ្នាក់ចរាចរណ៍ លង់ទឹក រលាក ឆក់ខ្សែភ្លើង

អំពើហឹង្សាផ្សេងៗទាំងក្នុងគ្រួសារ និងអ្នកដទៃ ការរំលោភផ្លូវភេទ ការធ្វើអត្តឃាត រឺសម្លាប់ខ្លួន

ការពុលស្រា រឺអាល់កុល ដែលបណ្តាលមកពីកម្រិតជាតិអាល់កុលក្នុងឈាមខ្ពស់ នាំឱ្យមានការ​សង្រ្គោះ​បន្ទាន់

ប៉ះពាល់ដល់ផ្លូវភេទ រួមទាំងការរួមភេទដោយមិនបានការពារ ឬការរួមភេទជាមួយដៃគូច្រើន អាចបណ្តាលឱ្យមានផ្ទៃពោះដោយអចេតនា ឬជំងឺកាមរោគ រួមទាំងមេរោគអេដស៍