Beauty and health pharmacy

صباحكم جميل 🌹

حكيت في الأيام اللي فاتت عن تساقط الشعر و أنواعه و دورة حياة الشعر و شن الحاجات اللي ممكن تكون السبب الرئيسي في تضرره

باهي شن الحل عشان نقلل من الضرر و نرده زي قبل أو أحسن 💡

طبعا في منتجات واجد في السوق و في لهن عيوب و مميزات و حنحكي عليهن بس اللي لفت نظري الفترة الأخيرة منتج فريد من ناحية طريقة شغله و نتائجه!

NANOGEN 💛

شركة نانوجين الانجليزية دارت منتج فريد من نوعه بحيث مكوناتها رغم اختلافها الا انه تشتغل على شيء واحد اللي هوا (صحة الشعر)

تركيبته عبارة عن 10 مواد فعالة :

1️⃣ VASCULAR ENDOTHELIAL GROWTH FACTOR :
وظيفته يحسن كمية الدم أو الإمداد الدموي اللي توصل لبصيلاات الشعر و تساعده على النمو بغزارة و بطريقة صحية ، بحيث انه يزيد تكوين الأوعية او angiogenesis اللي تغذي بصيلة الشعر و يزيد قطرها.
2️⃣REDENSYL
3️⃣ANAGAIN
4️⃣CAPIXYL

الثلاث مكونات هذينا يحفزن نمو الشعر بدرجة قوية يعني الشعره ما تطلعش خفيفه او مسرع ما تنكسر
ميزتهن انهن يعطن نتيجة حلوة للناس اللي يستعملو في minoxidil يعطن معاه فعالية 33%

5️⃣NIACINAMIDE
6️⃣SUPEROXIDE DISMETASE
7️⃣HYDROLYZED LAPINE PROTEIN
8️⃣TOCOPHEROLS
9️⃣BETA - GLUCAN
🔟GLYCERIN
باقي المكونات تزيد من ترطيب الشعر بحيث الشعر الجديد اللي يطلع ما يطلعش جاف او يابس و يحسن حتى هوا من صحة الشعر و يطلع بطريقة صحية

يعني من مزايا النانوجين او من كلام اللي جربوه انه يقلل من تساقط الشعر ، يحافظ على انه الشعر يطلع بطريقة صحية و كمية جيده ، يعطيه سماكة و كثافة و يرطبه بس بدون ما يدهنه او يخليه مليس

العيب الوحيد له انه عبوته صغيرة تسد أقل من شهر و سعره غالي بس مقارنة بالنتائج ممكن اتغاضى عن السعر.

هذا بالنسبة للنانوجين و ديرو بحث عليه و شوفو النتائج متاعه

حنحكي في بوست تاني عن باقي المنتجات المتداولة 😊

🌹

اهم نقاط لازم نركز عليهن او نراقب بيهن الشعر
العدد ✅
المكان✅
الفترة ✅
الظروف✅

🔹️العدد: نلاحظ كمية الشعر اللي يطيح
🔹️المكان: اكتر الأماكن فيهن فراغ او كم دائرة
🔹️الفترة: كم الفترة اللي يتساقط فيها كل يومين او يوميا
🔹️الظروف: في حالة تعرض لضغط نفسي او عصبي قوي

سوء التغذية برضو زي ما قلنا له علاقة ، بالذات الناس اللي ادير في دايت يصير عندهم تساقط بشكل قوي.

بالنسبة التحاليل هي في الواقع مالهش أهمية كبيرة الا في حالات معينة :
زي تحليل الدم او مخزون الحديد ، الزنك ، أو هرمونات الغدة الدرقية TSH ,T3, T4

تحليل فيتامين D لا يعتبر مهم لانه بالطبيعي كلنا نعانو من نقص فيتامين دال عشان هكي ما ينفعش يكون علامة او مؤشر لتساقط الشعر.

مساء الورد 🌹

من أكثر المشاكل الي تضايق منها البنات هي تساقط الشعر

تساقط الشعر أنواع و له أسباب واجد..

و نصف العلاج اني نعرف نوع التساقط اللي عندي و سببه !

أولاً دورة حياة الشعر

الشعر يمر بثلاث مراحل :

مرحلة النمو ---> تستمر لمدة ثلاث سنوات.

مرحلة الثبات ---> و هوا تكون فيه الشعره لا تنمو و لا تتساقط و تستمر بالحالة هذي 3 شهور.

مرحلة التساقط ---> المرحلة هذي الشعر ينفك من جذوره و يبقى يا دوب متماسك و في خلال 3 أسابيع يتساقط بروحه يا أما لما تمشطي شعرك او لما تغسليه او اي شد خفيف.

الطبيعي شعرنا يطيح من 50 إلى 100 شعره في اليوم، و في الحالة هذي لا يعتبر مرض و غير مقلق.

الغير طبيعي انه يطيح فوق من 100 شعره في اليوم و يبان التساقط ملحوظ و بشكل يخوف .. هنا ممكن يكون السبب مرضي.

أشهر 4 أنواع لتساقط الشعر :

1. أول نوع من تساقط الشعر و أشهرهن Telogen effluvium
هذا سببه انه الشخص متعرض لنقص تغذية او مرض معين أو شد عصبي قوي أو أي ظرف ممكن يأثر على الشعر و تخليه يتساقط بشكل أسرع من الطبيعي و يكون التساقط فوق من 100 شعره في اليوم يعني ببساطة ينتقل لمرحلة التساقط على طول 😞

2. النوع الثاني تساقط الشعر الوراثي و هوا يصير اكتر شي عند الرجال و الحمدالله ههههه male baldness pattern
بس يصيب حتى السيدات بس بشكل مختلف و بدرجات مختلفة و بالتدريج كيف ما باين في الصور الفرق بين الرجال و النساء
النوع هذا تلاحظوه اكتر شي في العشرينات و الثلاثينات بسبب هرمونات معينة عشان هكي ما يصيرش في مرحلة الطفولة أقل شي يبدأ من سن 20 !

3. ثالث نوع Alopecia areata و سببها يكون لخبطة في الجهاز المناعي نتيجة صدمة قوية أدت إلى انه مناعة الجسم تاخد وضع الدفاع و حتهاجم بصيلات الشعر 😥
و يكون يا أما على شكل دائرة صغيرة او كبيرة او اكتر من دائرة وحده و الشعر يبدأ يطيح في فترة بسيطة ، بالذات اذا استمر الضغط العصبي احتمال يؤدي إلى تزايد عدد الدوائر و الشعر يتساقط كله!

4. رابع نوع و الأخير و النوع هذا يصير عند النساء بس بالذات في سن 40 او 50 Frontal fibrosing alopecia
و يصير اكتر شي في المنطقة الأمامية للشعر يبدأ بفراغ بسيط مع الوقت خط الشعر الامامي يبدأ يوخر و أحياناً يتساقط حتى شعر الحواجب
لعند توا مالش سبب واضح بس الاغلب ممكن يكون من مناعة الجسم نتيجة التغيرات الهرمونية.

طبعاً في أسباب اخرى بس مش بقدر أهمية الأسباب الأربعة اللي ذكرتهن

لما ناخذ الواقي حتلقى عليه كلمة Spf و اللي هي درجة الحماية و تتراوح من 30 إلى 100
بالنسبة للصيف مش أقل من 50
و الشتاء من 15 إلى 30

🌸الطريقة الصحيحه لإستخدام او توزيع الواقي 🌸

🔸️أغلب اللي يستخدمن في الواقي يوزعن فيه بطريقة غلط يا تحط كمية بسيطه او توزيع عشوائي 🤨

🔸️الكمية لازم تكون كافيه و تغطي وجهك كله و تجددي الواقي من ساعتين إلى 3 ساعات لانه فعاليته ما تزيدش عن هكي

ما ينفعش تحطيه و تنسي لازم من التجديد

عشان هكي تلقي اللي تشكي انها استعملت واقي و مافيش اي تحسن بالعكس الوضع قعد أسوء يا انسمرت، انحرقت، أو صارلها تحسس و السبب انها ما تجددش في الطبقة!

🔸️معلومة ثانية مهمة لما تحطي الواقي و توزعيه على البشرة لازم تنتظري من 15 إلى 20 دقيقه قبل التعرض للشمس عشان البشرة تمتصه بالكامل و بوقت كافي .

🔸️لازم نتجنب التعرض مباشرة للشمس بقدر الإمكان مش معنى انك حاطه واقي معناها تتشمسي او تقعدي مقابله الشمس !
نحاول بقدر الإمكان ما نتعرضش للشمس خصوصاً في الوقت ما بين الساعه 10 صباحاً إلى 2 مساءً

🔸️ زي ما قلنا حتى و نحن بالبيت لازم نحط واقي لانه أشعة الشمس تدخل عن طريق النوافذ و حتى عند التعرض لأي هواء ساخن في المطبخ بالذات انه أكلنا كله أمبوخ و طياح سعد🤣

🔸️أخيراً لا يُفضل استعمال الواقي بخاخ لانه لا يتوزع بالكامل على البشرة لانه رذاذ عشوائي بس ممكن تستعملي Airgel من شركة Heliocare حطيته مع الصور ، حلو و خفيف عالبشرة .

ان شاء الله يا ربي استفدتو من البوست و لو في اي استفسار تفضلو🥰🌹

نكملو باقي البوست اللي حكينا فيه عن الواقي

مادام عرفنا انه الواقي مهم و الأهم نعرف شن نوع بشرتي عشان نستفيد و نلقى نتيجة

لازم نعرف انه البشرة انوع

دهنية / جافة / المختلطة / حساسة

🌸بالنسبة للبشرة الدهنية : ديما اختاري الواقي اللي يكون قوامه جل gel او مستحلب Emulsion ، عشان امتصاصه سريع و مش حيعطي اللمعه المزعجه او زي ما نقولو مزيت

🌸البشرة الجافة / المختلطة : حنختار كريم او مرهم عشان يعطي ترطيب و يحسن من قوام البشرة و ما يسببليش جفاف

🌸 البشرة الحساسة : حنختار الواقي الفيزيائي

الواقي الفيزيائي حتلقي من ضمن مكوناته zinc oxide و Titanium dioxide ( زنك أوكسايد و تيتانيوم داي أوكسايد)
الاغلب المتوفر في السوق حيكون خليط بين الكيميائي و الفيزيائي ف حتلقي مكتوب عليه مناسب حتى للبشرة الحساسة

فكرة الفيزيائي : زي الدرع او حاجز يعكس أشعة الشمس و يترك أهم مادتين اللي هما زنك و تيتانيوم بس عيبه يدير طبقة بيضاء على الوجه

اما الكيميائي : زي الاسفنجة مكوناته تمتص أشعة الفوق بنفسجية الضارة و تحولها إلى أشعة تحت حمراء غير ضارة .

المهم عرفنا نوع بشرتنا شنو و حنقدرو نختارو الواقي بروحنا و نحن مطمنين.

مساء الخير عليكم 🌸

مرحبتين بيكم في البيج و ان شاء الله تكون فيها فائدة لكم و محتواها هادف .

أول بوست نبدو فيه حنحكو عن موضوع في غاية الأهمية الفترة هذي اللي هوا واقي الشمس

🌸واقي الشمس و أهميته 🌸

أولاً فترة الصيف تكون فيه أشعة الشمس أقوى من أي وقت في باقي السنة على قد ما الشمس مفيدة بس حتسبب أضرار للبشرة في حالة التعرض لها مباشرة

أشعة الشمس نوعين :
UVA
اللي هي موجة طويلة للأشعة الفوق بنفسجية اللي حتسرع شيخوخة البشرة
UVB
الموجة قصيرة للأشعة الفوق البنفسجية السبب الرئيسي لحروق الشمس

و بهكي أشعة الشمس حتكون سبب للتجاعيد، الكلف، الحبوب ، الحروق ....

لذلك واقي الشمس مهم جداً جداً بغض النظر عن الناحية التجميلية ف هوا مهم حتى لحمايتها من الحروق و الحبوب
لأن أشعة الشمس ضارة حتى و نحن بالبيت!

عشان هكي لازم الواقي يكون أساسي في الروتين اليوم للعناية بالبشرة .

و بالذات الناس اللي تعالج في بشرتها من الحبوب ، الكلف، أو التصبغات عموماً ، لأنه لو ما استخدمتي الواقي و لا كأنك درتي حاجه و علاجك حيعدي عالفاضي و أحياناً يعطي نتيجة عكسية ↙️

باهي السؤال اللي ديما ينسأل شنو أفضل واقي نستعمله ؟ شنو أحسن شركة ؟
مافيش حاجة أسمها أفضل أو أحسن بس المهم انك تعرفي شن نوع بشرتك و تختاري الواقي المناسب لها .. مش مهم غالي او شركة معروفه على قد ما يهم انه مناسب لبشرتك عشان تستفيدي منه و تلقي نتيجة !

حنكمل في البوست التاني🌹