WATER JASMINE

ရေကဲ့သို့ကျင့်ပါ
-------------------
“ရေစက်ရေပေါက်လေးများသည် ကျောက်တုံးကို ဖြိုခွဲနိုင်သည်ဆိုခြင်းမှာ အင်အားကြောင့်မဟုတ်။ အဆက်မပြတ် တိုးတိုက်နိုင်စွမ်းကြောင့်ဖြစ်သည်။ ရေကဲ့သို့ကျင့်ပါ။ အရှုံးမပေးပါနှင့်”

ထိုစကားပုံလေးကို အလွန်သဘောကျမိသည်။

လက်တင်စကားပုံတစ်ခုတွင်လည်း

“ရေစက်ကလေးသည် ကျောက်တုံးကို ပေါက်စေသည်” ဟူ၍ တွေ့ရသည်။ ထိုသဘောအတိုင်း ဖြစ်သည်။ အောင်မြင်ချင်သလား စဉ်ဆက်မပြတ် (Consistency) လုပ်ဆောင်နိုင်စွမ်းလိုသည်။ အဆက်မပြတ် တိုးတိုက် နိုင်စွမ်းသည်သာလျှင် စွမ်းအားဖြစ်သည်။

ကျောက်တုံးဆိုသည်မှာ ခိုင်မာတောင့်တင်းသည့် “ခွန်အား” ကို ကိုယ်စားပြုသည်။ ရေဆိုသည်မှာ နုညံ့ ပျော့ပြောင်းသော်လည်း “ဇွဲ” ကို ကိုယ်စားပြုသည်။ ကျောက်ဆောင်ကြီးတွေ ရေနှင့် ပွတ်တိုက်ဖန်များသော် ပြိုပျက်ရသည်။ မည်မျှ မာကြောသည်ဆိုစေ အချိန်နှင့်အမျှ တိုက်စားဖန်များလျှင် ပြိုပျက်သည်။ အစဉ်တစိုက် လုပ်ဆောင်နိုင်စွမ်းက အရေးကြီးသည်။

“ရေကဲ့သို့ကျင့်ပါ” ဆိုသည်ကို Bruce Lee လည်းပြောဖူးသည်။ ရေ၏ထူးခြားချက်မှာ သူ့ကိုထည့်ထားသည့် ခွက်အနေအထားအရ ပုံစံပြောင်းနိုင်သည်။ ထည့်သည့် အိုးခွက်အလိုက် ပုံစံအမျိုးမျိုးတည်နိုင်သည်။ သို့သော် အက်ကြောင်းလေးတစ်ခုတွေ့သည်နှင့် ထိုးဖောက်ထွက်တတ်သည်။

ဖောက်ထွက်နိုင်မှုကို ကံတရားကြောင့်ပါဟု အချို့ကထင်ကြသည်။ အမှန်တော့ စနစ်တကျလေ့ကျင့်မှုက အောင်မြင်မှုတစ်ခုဖြစ်သွားနိုင်သည်။ မည်သည့်နယ်ပယ်တွင်မဆို ကျွမ်းကျင်သူတစ်ဦး ဖြစ်ရန်အတွက် တစ်နေ့တည်း၊ တစ်ချိန်တည်းနှင့် မရနိုင်ပေ။ အချိန်ယူကာ နေ့စဉ်လေ့ကျင့်ပြီး လုပ်ဆောင်နိုင်စွမ်းကသာလျှင် အောင်မြင်မှုကို ဖြစ်စေနိုင်ပါသည်။

ဥပမာ စာရေးချင်သူတစ်ဦးအနေဖြင့် စိတ်ကူးပေါက်မှ ထရေးခြင်းထက်၊ နေ့စဉ်ပုံမှန် အချိန်ပေးပြီး ဖတ်ချိန်ဖတ်၊ ‌တွေးချိန်တွေး၊ ရေးချိန်တွင်ရေးနေခြင်းသည် စာရေးဆရာကောင်းတစ်ယောက် ဖြစ်စေနိုင်ပါသည်။

Scapegoating ဆိုသည့် စကားလုံးတစ်လုံးရှိသည်။ မိမိ၏အမှား၊ ကျရှုံးမှု သို့မဟုတ် လူ့အဖွဲ့အစည်းတွင် ဖြစ်ပေါ်နေသည့် ပြဿနာရပ်များအတွက် တရားခံအစစ်ကို ရှာဖွေရမည့်အစား အပြစ်မရှိသူ သို့မဟုတ် ခုခံနိုင်စွမ်းမရှိသူ သို့မဟုတ် အုပ်စုတစ်စုကို ဓားစာခံအဖြစ် အပြစ်ပုံချခြင်းဖြစ်သည်။

"Scapegoat" သည် ရှေးဟောင်းဘာသာရေး ဂျင်းတစ်မျိုးဖြစ်သည်။ ရှေးခေတ်လူတွေသည် အပြစ်တစ်ခုခု ပြုလုပ်မိလျှင် သူတို့လုပ်ထားသည့် အပြစ်ကို ကျေပျက်စေရန်အတွက် ဆိတ်တစ်ကောင်ကိုခေါ်လာပြီး သူတို့အပြစ်ကို ဆိတ်ခေါင်းပေါ်တင်ကာ ထိုဆိတ်ကို တောထဲမောင်းထုတ်လိုက်ခြင်းမျိုးဖြစ်သည်။ ငါတို့ အပြစ်တွေ ဆိတ်နဲ့အတူပါသွားပြီ၊ ငါတို့ သန့်ရှင်းသွားပြီဟူ၍ ထင်သည့်အလေ့အထကစတင်ခဲ့သည်။

လူတစ်ယောက်သည် ကိုယ့်အားနည်းချက် သို့မဟုတ် မကောင်းသည့်စိတ်များဖြစ်ပေါ်လာသည့် အခါတွင် မိမိကိုယ်မိမိအပြစ်တင်ရမည်ကို ကြောက်သည့်အခါတွင် အခြားသူအပေါ် ပုံချခြင်းများ လုပ်တတ်ကြသည့် သဘောပင်။

Scapegoating သည် အမှန်တရားကို ရင်မဆိုင်ရဲသူတို့၏ သူရဲဘောကြောင်သော လုပ်ရပ်ဖြစ်သည်။

အမုန်းတရားကို နှလုံးသွင်းကာ အငြိုးအတေးကြီးနေသူတစ်ယောက်အတွက် မည်သည့်အခါမျှ ငြိမ်းချမ်းမှု မရနိုင်ပေ။ သူ့နှလုံးသားသည်လည်း အမုန်းရေစက်ဖြင့် တစ်စက်စက်၊ တစိမ့်စိမ့် ချေဖျက်ထားခြင်း ခံနေရသော ကြောင့် ကျေပျက်ကောင်း ကျေပျက်နေပေလိမ့်မည်။ သူ့နှလုံးသားထဲကို အမုန်းတရားရေစက် အဆက်မပြတ် ထိုးဖောက်ခြင်းကို ခွင့်ပြုထားသူ၏ ခံစားရမည့် ဆုလာဘ်ဖြစ်သည်။

မည်သူမဆို မိမိလုပ်ဆောင်ချက်အပေါ် ယုံကြည်မှုရှိပြီး၊ နေ့စဉ်စိတ်ကောင်းနှလုံးကောင်းဖြင့် အောင်မြင်သည် ဖြစ်စေ၊ ရှုံးနိမ့်သည်ဖြစ်စေ လုပ်ဆောင်နိုင်လျှင် သူတစ်ပါးကို လက်ညှိုးထိုးစရာမလိုသည့် စိတ်အေးချမ်းမှုကို ရရှိစေနိုင်သည်။

သူတစ်ပါးကို အပြစ်တင်နေသူမှာ အမြဲပူလောင်နေရမည်မှာ သေချာသည်။

Crd to ဆရာဦးတင်ညွန့်

#ရပ်တန့်မနေနဲ့

ဘဝမှာလူတိုင်းက တခါတခါတော့
ဘာလုပ်လို့ဘာကိုင်ရမှန်းမသိအောင်
တွေဝေရင်း
လမ်းပျောက်နေခဲ့ကြဖူးတယ်။

အဲ့ဒီလိုကြုံလာရင် အကြာကြီး
တွေဝေမနေဖို့
ကိုယ့်ကိုယ်ကို ဘာတွေလုပ်နိုင်မလဲ၊
ဘာတွေလုပ်သင့်တယ်ဆိုတဲ့
အတွေးနဲ့အမြန်ဆုံးတွန်းအားပေး
ခိုင်းစေပါ။

အသက်အရွယ်နဲ့ အချိန်အခါရှိတုန်းမှာ
ကိုယ့်ဘဝရှေ့ရေးကြိုတွေးလို့
ကြိုးစားထားရမှာပါ။

လူတွေအိပ်နေတယ်ဆိုရင်တောင်
အချိန်တွေကတော့လည်ပတ်ရင်း
ကုန်ဆုံးနေဆဲပါပဲ။

ရပ်တန့်ထားလို့မရတဲ့ အချိန်တွေဟာ
တွေဝေနေတဲ့
ကိုယ့်အတွက်အချိန်လွန်နောင်တတွေက
လက်ဆောင်အဖြစ် ရောက်လာနိုင်လို့
ပါပဲ။

ဘဝတစ်ခုကိုရရှိထားတဲ့လူတိုင်း
အောင်မြင်ဖို့ဆိုတာထက်
ကြိုးစားမှုတွေ ရပ်တန့်မနေဖို့ပဲ
အရေးကြီးတာပါ။

ကြိုးစားမှုတွေ မရပ်သရွေ့ ကိုယ့်အတွက်
ထိုက်တန်တဲ့တစ်နေရာတော့ ရှိနေစမြဲပါပဲ။

တွေဝေလွန်းရင် ကိုယ့်ကိုယ်ကို
ယုံကြည်မှုတွေနည်းလာတတ်တယ်။

ကိုယ်ရည်ရွယ်တဲ့ အလုပ်တိုင်းကို
သူများတွေတောင်လုပ်နိုင်သေးတာပဲ
ငါလည်းလုပ်နိုင်ရမယ်ဆိုတဲ့
ကိုယ့်ကိုယ်ကို ခိုင်မာတဲ့စိတ်၊
ယုံကြည်မှုအပြည့်နဲ့လုပ်မယ်ဆို
အလုပ်နဲ့ပတ်သက်တဲ့ သင်ယူမှု
တွေဟာ
တတ်မြောက်လွယ်စေတယ်
အခက်အခဲတွေကိုလည်း နည်းစေပါ
တယ်။

ကိုယ့်ဘဝကို
မျက်တောင်မွှေးတစ်ဆုံးလောက်သာ
ကြည့်ပြီးလမ်းပျောက်မနေပါနဲ့

မျက်စိတစ်ဆုံးမြင်နိုင်သလောက်
ခပ်ဝေးဝေးကို မြင်အောင်ကြည့်ပါ
လုပ်သင့်တာတွေမြင်လာပါလိမ့်မယ်။

တချို့လည်း သင်ယူလေ့လာမှုတွေနဲ့
သူတို့ဘဝကို
စတင်ပြီးအကောင်အထည်ဖော်နိုင်ဖို့
ပထမခြေလှမ်းအဖြစ် ကြိုးစားနေ
ကြတယ်။

တချို့လည်းသင်ယူမှုတွေပြီးလို့
သူတို့ဘဝလမ်းကို ယုံကြည်မှုတွေနဲ့
ရည်ရွယ်ရာပန်းတိုင်ဆီ လျှောက်လှမ်း
နေကြပြီ။

သင်ကရော ဘာလုပ်ရမှန်းမသိပဲ
တွေဝေရင်းလမ်းပျောက်နေတုန်းလား။

ဆုံးဖြတ်ချက်ကို အလျင်စလိုချဖို့
မလိုပါဘူး။

ကိုယ်နဲ့အသင့်တော်ဆုံးအလုပ်တစ်ခု
ဘာတွေလုပ်နိုင်မလဲ၊ ဘယ်လိုလုပ်ရင်
ကိုယ့်အတွက် အကောင်းဆုံးဖြစ်နိုင်မလဲ
စဉ်းစားပြီး စတင်ပါတော့။

ဘာပဲလုပ်လုပ်
စမိတဲ့ချိန်ကစ အဆုံးသတ်သည်ထိ
အကောင်းဆုံးကြိုးစားနိုင်မှ
သင့်ပန်းတိုင်ကိုရောက်မှာပါ။

ကိုယ့်အလုပ်အတွက် အရင်းအနှီး
မရှိလို့ဆိုတာ ပျင်းရိခြင်းအတွက်
အကောင်းဆုံးဆင်ခြေပါလို့ ထင်မိပါ
တယ်။

ဘယ်သူမှမွေးကတည်းက လိုတရ
အရာရာ ပြီးပြည်စုံသူမရှိပါဘူး

ကိုယ့်ဘဝတွက်လိုအပ်တာကို
အောက်ခြေကစ တဆင့်ချင်းကြိုးစားပြီး
အမြင့်ရောက်ဖို့ တက်လှမ်းရမှာပါ။

ကံကောင်းလာမယ့်နေ့တွေနဲ့
ကိုယ့်အတွက် အခွင့်အရေးရနိုင်မယ့်
အချိန်ကောင်းကို ထိုင်စောင့်ရင်း

သင့်ရဲ့တန်ဖိုးရှိတဲ့အချိန်တွေက
အချိန်လွန်နောင်တနဲ့ကြိုးစားမှုတွေ
မလုပ်နိုင်တော့တဲ့ အိုမင်းခြင်းဆီကို
သင့်ကို ခေါ်ဆောင်သွားပါလိမ့်မယ်။

ကံကောင်းလာမယ့်နေ့အတွက်
သင့်ရဲ့နုပျိုခြင်းအချိန်တွေကိုရင်းပြီး
အချိန်မဖြုန်းပါနဲ့

အလကားနဲ့ပေါ့ပေါ့လေး ရတဲ့အရာတွေ
ဆိုတာ တန်ဖိုးထားသူနည်းတယ်။

အချိန်လွန်မှ နောင်တမရစေဖို့
သင့်ကြိုးစားမှုတွေကို ရပ်တန့်မနေပါနဲ့။

သင့်ရဲ့ မျက်စိ၊ နား ၊ဦးနှောက်တံခါးကို
ဖွင့်လို့
လုပ်သင့်တာတွေမြင်အောင်ကြည့်ပြီး
ကြိုးစားမှုတွေစတင်ပါတော့

ကြိုးစားနေသူတွေကလည်း
လျော့နေတဲ့ခွန်အားများဖြည့်တင်းလို့
ဆက်လျှောက်ကြပါလို့
သိသလောက်နဲ့ အတွေးအမြင်လေးကို
အကြံပြုရေးသားလိုက်ရပါတယ်။

ခေါင်းဆောင်သုံးမျိုး
--------------------------
တရုတ်တွေးခေါ်ပညာရှင်ကြီး လောင်ဇု (Lao Tzu) က

“အတော်ဆုံးခေါင်းဆောင်ဆိုသည်မှာ သူရှိနေမှန်းကို ပြည်သူတွေက သတိမထားမိလောက်အောင်ဖြစ်နေသူပါ။ လူတွေက ဝိုင်းဝန်းနာခံပြီး ချီးမွမ်းနေကြတဲ့ခေါင်းဆောင်ကတော့ သိပ်ပြီးကောင်းလှတယ်လို့ မဟုတ်ပါ။ လူတွေ မုန်းတီးရွံရှာတဲ့ ခေါင်းဆောင်မျိုးဟာ အဆိုးဆုံးပါ” ဟုဆိုဖူးသည်။

တော်သည့်ခေါင်းဆောင်သည် သူ့အလုပ်သူလုပ်နေမည်သာဖြစ်သည်။ သူ့ကို ချီးမွမ်းလည်း ဂရုမစိုက်၊ မြှောက်ပင့်လည်း အလေးမထားသူဖြစ်သည်။ ညံဖျင်းသည့် ခေါင်းဆောင်တွေကတော့ လူတွေ ချီးမွမ်း မြှောက်ပင့်မှုကို သာယာနေတတ်သည်။ သူ့မှာ အရည်အချင်းမရှိသောကြောင့်လည်း သူ့အနားတွင် “မှန်ပါ့ဘုရား” လုပ်ကာ ခစားနေသူတွေသာထားသည်။ တတိယခေါင်းဆောင်မျိုးမှာ လူတွေမုန်းတီးသည့် ခေါင်းဆောင်မျိုးဖြစ်သည်။

ခေါင်းဆောင်ကောင်းဆိုသည်မှာ အမိန့်တွေပေးပြီး ကြွားလုံးထုတ်နေတတ်သူမျိုးတွေမဟုတ်။ စနစ်တစ်ခုကို ပြီးမြောက်အောင်မြင်စေရန် ဖန်တီးပေးနေသည့်အတွက် အလုပ်တွေကပြီးမြောက်နေမည်သာဖြစ်သည်။ ပြည်သူတွေက ခေါင်းဆောင်လုပ်လို့ ပြီးမြောက်အောင်မြင်သွားတာဟုမထင်၊ ငါတို့စုပေါင်းညီညွတ်မှုကြောင့် ပြီးမြောက်အောင်မြင်သွားသည်ဟု ထင်စေရန် ကြံဆောင်ပေးတတ်သူသည်သာလျှင် ခေါင်းဆောင်ကောင်း ဖြစ်သည်။

ဒုတိယခေါင်းဆောင်မျိုးမှာ သူ့ကိုကြောက်၍ဖြစ်စေ၊ ကြည်ညို၍ဖြစ်စေ ဝိုင်းပြီး “မှန်လှပါဘုရား” လုပ်နေ သူတွေကိုသာ မျှော်လင့်တတ်သည်။ သူ့ကိုချီးမွမ်းခန်းဖွင့်နေသူတွေသည် သူ့မာန အတ္တ (Ego) ကိုကျွေးမွေး ခစားနေသူများဖြစ်ခြင်းကြောင့် ထိုသူမျိုးတွေနှင့် သာယာနေသည့် ခေါင်းဆောင်ကို လောင်ဇုက ဒုတိယအဆင့် ခေါင်းဆောင်အဖြစ် သတ်မှတ်ခြင်းဖြစ်သည်။

အဆိုးဆုံးခေါင်းဆောင်သည် သူ့လုပ်ရပ်ကို ပြည်သူတွေက မကြည်ဖြူဘဲ ကျိန်ဆဲ မုန်းတီးခြင်းကို ခံနေရသူများ ဖြစ်သည်။

ခေါင်းဆောင်ကောင်းဆိုသည်မှာ လေထုနှင့်တူသည်။ လူတိုင်း အသက်ရှူရန်လေကိုလိုအပ်သောကြောင့် လူတိုင်းထိုလေကို ရှူနေကြသော်လည်း လေရှိကြောင်း မည်သူမျှ သတိထားမိကြသည် မဟုတ်ပေ။ ခေါင်းဆောင်ဆိုးတွေကတော့ မီးခိုးနှင့်တူသည်။ လူတိုင်းကို အသက်ရှူကျပ်စေပြီး မျက်စိစပ်စေသည်။

CRT to ဆရာတင်ညွန့်

🌟 ကမ္ဘာပေါ်မှာ အကောင်းဆုံး သမားတော်ကြီး (၇) ဦး
(၁) နေရောင်ခြည်ကို ခံယူခြင်း
(၂) ပြည့်ဝစွာ အနားယူခြင်း
(၃) ကိုယ်လက်လှုပ်ရှား လေ့ကျင့်ခန်းလုပ်ခြင်း
(၄) အစားအသောက်ကို ချင့်ချိန်စားသုံးခြင်း
(၅) မိမိကိုယ်ကို ယုံကြည်မှုရှိခြင်း
(၆) လောဘ၊ ဒေါသ၊ မောဟ နည်းပါးစွာ နေထိုင်ခြင်း
(၇) ကောင်းမွန်သော မိတ်ဆွေအပေါင်းအသင်း

ဒီသမားတော် (၇) ဦးကို လူ့သက်တမ်းတလျှောက် နှလုံးသွင်းပြီး ကျန်းမာပျော်ရွှင်စွာ နေထိုင်ကြပါနော်။

အချိန်တန်ရင်တော့ ကျွန်ုပ်တို့အားလုံးဟာ ဘဝကန့်လန့်ကာချပြီး နှုတ်ဆက်ထွက်ခွာကြရမှာပါ။
ဒါကြောင့် အသက်ရှင်နေထိုင်စဉ်အတွင်းမှာ -
* သင့်မိသားစုကို နွေးထွေးစွာ ချစ်ပါ။
* မိတ်ဆွေသူငယ်ချင်းတွေကို တန်ဖိုးထား ချစ်ပါ။
* သင့်ဘဝလက်တွဲဖော်ကို ကြင်နာစွာ ချစ်ပါ။
* သင့်အပေါ် ကျေးဇူးရှိသူတွေကို အောက်မေ့စွာ ချစ်ပါ။
* သင့်ပတ်ဝန်းကျင်အပေါ် တတ်နိုင်သလောက် ကူညီရိုင်းပင်းပေးကြပါ။

CRT…

လောကကြီးမှာ
ကိုယ့်အပေါ်မကောင်းပြောနေလည်း
ကိုယ်ကပြန်မပြောမိပါစေနဲ့။

ကိုယ့်အပေါ်
မဆီမဆိုင် မုန်းနေလည်း
ကိုယ်ကပြန်မမုန်းမိပါစေနဲ့။

ကိုယ့်အပေါ်
အမြင်စောင်းပြီးတစ်မျိုးမြင်နေလည်း
ကိုယ်ကအမြင်မစောင်းတစ်မျိုး မထင်မိပါစေနဲ့။

ကိုယ့်အပေါ်
တကယ်မချစ်တဲ့သူနဲ့တွေ့ခဲ့ရင်လည်း
ကိုယ်က သူ့အပေါ်မေတ္တာ မပျက်မိပါစေနဲ့။

သူက ဘာပေးပေး
ကိုယ့်ဆီက သူ့ကို မေတ္တာပဲပြန်ပေး လိုက်ပါ။

မေတ္တာဆိုတာ ဝဋ်ကြွေးတွေကို
ဆပ်ဖို့အတွက် အကောင်းဆုံး
ပေးဆပ်ခြင်းပဲ ဖြစ်ပါတယ်။

ဒီဘဝမှာ
အမုန်းတွေရှိရင်လည်း ကျေပါစေ။

အငြိုးတွေရှိရင်လည်း ကျေပါစေ။

ဒီဘဝမှာ အကြွေးဆပ်ဖို့
အကြောင်းပါလာရင်
ဒီဘဝမှာပဲ အကျေဆပ်ခဲ့လိုက်ပါ။

နောက်ဘဝတွေ အထိယူမသွားပါနဲ့။

မိတ်ဆွေ "သိထားရမည့်အရာက

ကိုယ့်မှာ အားနည်းချက်ရှိရင်
သူတစ်ပါး ပျော့ကွက်ကို
ချမနင်းဘဲ နေတတ်ရမယ်။

ကိုယ့်မှာခံနိုင်ရည် မရှိရင် ...
သူတစ်ပါး နစ်နာစရာစကားကို
ဆင်ခြင်ပြောဆိုတတ်ရမယ်။

ကိုယ့်မှာ ဒုက္ခဆိုတာရှိရင်...
သူတစ်ပါးဘဝ ပျက်စီးကြောင်းကို
ရှောင်ရှားတတ်ရမယ်။

ကိုယ့်မှာ အရှက်ရှိရင်...
သူတစ်ပါး ဂုဏ်သိက္ခာကို
ငဲ့ညှာတတ်ရမယ်။

ကိုယ့်အပေါ်မပြုစေချင်တဲ့ အရာရှိရင်...
သူတစ်ပါး မနှစ်သက်တာကို
မလုပ်မိအောင် စာနာတတ်ရမယ်။

ကိုယ့်မှာ အပြစ်နဲ့မကင်းရင်
သူတစ်ပါးအမှားကို လက်ညှိုး
မထိုးမိအောင် နေတတ်ရမယ်။

ကိုယ့်မှာဝေဒနာရှိရင်
သူတစ်ပါး နာကျင်မှုကို
ခံစားပေးတတ်ရမယ်။

ကိုယ့်ကို ကဲ့ရဲ့တာ မကြိုက်ရင်
သူတစ်ပါး မကောင်းကြောင်းကို
မပုတ်ခတ်မိအောင် သတိထားရမယ်။

ကိုယ့်မှာ အမာရွတ်ရှိရင်
သူတစ်ပါး ဒဏ်ရာကို
နားလည်ပေးနိုင်ရမယ်...

ဒါဟာ ကိုယ်ချင်းစာတရားပဲ။
ကိုယ်ချင်းစာတတ်ပါစေ. . .

#မေတ္တာဖြင့်ပြန်လည်မျှဝေပါသည်

ဆရာဝန်တယောက်ဟာ

သူ့ဆေးခန်းရှေ့မှာ လူနာရအောင်ဆိုပြီး
ကြော်ငြာကပ်ထားပါတယ်။

" ပျောက်အောင် ကုသည်။ ဒေါ်လာ - ၂၀ "
"မပျောက်ရင် ဒေါ်လာ - ၁၀၀ ပြန်လျှော်မည် "

ဒီကြော်ငြာကို ရှေ့နေတယောက်ကတွေ့တော့
ပိုက်ဆံရမယ့် နည်းတော့ တွေ့ပြီဆိုပြီး
ဆေးခန်းထဲ ဝင်သွားပါတယ်။

ကျွန်တော်လျှာက အရသာခံလို့ မရတော့ဘူး။
ကုပေးပါ။

သူနာပြုဆရာမ ၊ ဆေးသေတ္တာနံပါတ်(၅)က
ဆေး(၃)လုံး လူနာကို တိုက်လိုက်ပါ။

ရှေ့နေ့က နည်းနည်းမြည်းကြည့်ပြီး ပြောလိုက်တယ်။

ဟမ် … ဒါက ရေနံဆီတွေလေ၊ ဆေးမှ မဟုတ်တာ။

ဂုဏ်ယူပါတယ်ခင်ဗျား၊ အရသာခံလို့ ရသွားပြီ။
ပေး... ဒေါ်လာ ၂၀ 😂

မခံချိ မခံသာဖြစ်နေတဲ့ရှေ့နေဟာ
ရက်အနည်းငယ် ကြာတဲ့အခါမှာ
သူပေးလိုက်ရတဲ့ပိုက်ဆံ ပြန်ရအောင်
တမျိုးကြံပြီး ဆေးခန်းကို သွားပြန်တယ်။

ကျွန်တော် မှတ်ဉာဏ်တွေ ပျက်ကုန်ပြီ။
ဘာမှ မမှတ်မိတော့ဘူး၊

သူနာပြုဆရာမ ၊ ဆေးသေတ္တာနံပါတ်(၅)က
ဆေး(၃)လုံး လူနာကို တိုက်လိုက်ပါ။

ဟမ် … အဲဒါ ရေနံဆီတွေလေ။
အရင်တခါလည်း တိုက်ခဲ့ပြီးပြီ။

ဂုဏ်ယူပါတယ်ခင်ဗျား။
မှတ်ဉာဏ်တွေ ပြန်ကောင်းသွားပါပြီ
ပေး ဒေါ်လာ ၂၀ 😂

အူကြောင်ကြောင် ရှေ့နေဟာ
တပတ်အကြာမှာ ဆေးခန်းကိုပြန်လာပြန်တယ်။

ကျွန်တော် မျက်လုံးတွေ မကောင်းတော့ဘူး။
ဘာမှ မမြင်ရတော့ဘူး။

ကောင်းပြီ၊ ခင်ဗျားအတွက်
ကုစရာဆေး မရှိတော့ဘူး။
ဒီတော့
ရော့ … ဒေါ်လာ (၁၀၀)ယူသွား

ရှေ့နေ့က ပိုက်ဆံကြည့်ပြီး ပြောပါတယ်။

ဟမ် … ဒါက (၁၀၀)တန် မဟုတ်ဘူးလေ။
(၂၀)တန်ကြီး … 😂

ဂုဏ်ယူပါတယ်ခင်ဗျား …
ခင်ဗျား မျက်လုံးတွေ ပြန်မြင်ရပြီ …
ပေး ဒေါ်လာ (၂၀) 🤣

ကဲ … မှတ်ရော့လဟယ် … 😂😂🤣🤣
မူရင်းရေးသူးအား Credit ပေးပါသည်။

၁။ စိတ်တည်ငြိမ်အောင် နေပါ၊ ပုဂ္ဂိုလ်ရေးအရ မယူပါနဲ့။
သူတို့ရဲ့ အပြုအမူတွေက သူတို့ရဲ့ ကိုယ်ပိုင် မလုံခြုံမှု (Insecurity) ကနေ ဖြစ်ပေါ်လာတာများတယ်ဆိုတာကို နားလည်ထားပါ။

သူတို့ရဲ့စကားကို ကိုယ့်အပေါ် တိုက်ရိုက်ပြောတာလို့ မယူဆဘဲ စိတ်အေးအေးထားပြီး တုံ့ပြန်ပါ။

၂။ ယဉ်ကျေးမှုမပျက်၊ တည်ငြိမ်စွာ ဆက်ဆံပါ။
မာနကို မာနနဲ့ ပြန်မတုံ့ပြန်ပါနဲ့။ ယဉ်ကျေးမှုရှိရှိနဲ့ ပြန်ပြောတာဟာ သူတို့ရဲ့ စိတ်အနှောင့်အယှက်ပေးလိုတဲ့ အားကို ဖယ်ရှားလိုက်တာနဲ့ တူပါတယ်။ ရန်လိုတာ၊ စိတ်တိုတာကို ရှောင်ပါ။

၃။ အချက်အလက်အပေါ် အခြေခံပြီး မေးခွန်းထုတ်ပါ။
မာနကြီးသူက တခုခုကို တအားအထင်ကြီးပြီး ပြောလာရင် "ဒါဆို ဘယ်အချက်အလက်တွေက ဒီလိုဖြစ်စေတာလဲ"

ဒါမှမဟုတ် "ဘာဖြစ်လို့ ဒီလိုပြောနိုင်တာလဲ" စသဖြင့် အချက်အလက်ကို ဗဟိုပြုပြီး တိတိကျကျ မေးခွန်းတွေ မေးပါ။ ဒါက သူတို့ရဲ့ စကားလုံးတွေကို စဉ်းစားစေပါတယ်။

၄။ ကိုယ်ပိုင်နယ်နိမိတ် သတ်မှတ်ပါ။
သူတို့ ကိုယ့်ကို စော်ကားတာ၊ အထင်သေးတာမျိုး လုပ်လာရင် ယဉ်ကျေးပေမယ့် ခိုင်မာပြတ်သားတဲ့ လေသံနဲ့ ကိုယ့်ရဲ့ ခံယူချက်နဲ့ ဘောင်ကို ပြောပြပါ။ ဥပမာ- "ဒီလိုလေသံနဲ့ ကျွန်တော့်ကို မပြောပါနဲ့။"

၅။ အရေးမပါတဲ့ အငြင်းအခုံတွေကို ရှောင်ပါ။
သူတို့နဲ့ အချိန်ကြာကြာ အငြင်းအခုံလုပ်နေတာဟာ အကျိုးမရှိပါဘူး။

ကိုယ်ပြောစရာရှိတာကို တိုတိုရှင်းရှင်း ပြောပြီး စကားဝိုင်းကို အဆုံးသတ်ဖို့ ကြိုးစားပါ။

၆။ သူတို့ရဲ့ ချီးမွမ်းခန်းဖွင့်တာကို လျစ်လျူရှုပါ။
သူတို့က ကိုယ့်ကိုယ်ကိုယ် ချီးမွမ်းခန်းဖွင့်နေရင် တကယ်တမ်း မလိုချင်ရင်

အသေးစိတ် အာရုံမစိုက်ဘဲ "ဟုတ်ကဲ့"၊ "ကောင်းပါပြီ" လိုမျိုး အတိုချုပ်သာ ပြောပြီး အကြောင်းအရာ ပြောင်းပစ်ပါ။

၇။ အတတ်နိုင်ဆုံး ကန့်သတ်ပြီး ဆက်ဆံပါ။
မဖြစ်မနေ စကားပြောစရာ၊ အလုပ်တွဲလုပ်စရာ ရှိမှသာ ဆက်ဆံပြီး ကျန်တဲ့အချိန်တွေမှာ တတ်နိုင်သမျှ ဝေးဝေးနေပါ။

ကိုယ့်ရဲ့ ပုဂ္ဂိုလ်ရေးရာ ကိစ္စတွေကိုလည်း မပြောပြမိဖို့ သတိထားပါ။

၈။ လိုအပ်ရင် တတိယလူကို အကူအညီတောင်းပါ။
အလုပ်ခွင် ဒါမှမဟုတ် အဖွဲ့အစည်းတခုမှာ မာနကြီးသူရဲ့ အပြုအမူကြောင့် ပြဿနာတွေ အကြီးအကျယ် ဖြစ်လာရင်

သက်ဆိုင်ရာ ခေါင်းဆောင်၊ မန်နေဂျာ (သို့) ကြားဝင်ဖြေရှင်းပေးနိုင်သူကို အကူအညီတောင်းဖို့ ဝန်မလေးပါနဲ့။

၉။ ရိုးသားပြီး တိုက်ရိုက်ပြောပါ။
တချို့အခြေအနေတွေမှာ သူတို့ရဲ့ မာနကြီးတဲ့ အပြုအမူက တကယ်ပဲ အနှောင့်အယှက် ဖြစ်လာရင် ဒေါသကို ထိန်းချုပ်ပြီး

သူတို့ရဲ့ "အပြုအမူ" ကိုပဲ ရည်ညွှန်းပြီး ပြောပြပါ။ "ရှင်က မာနကြီးတယ်" လို့ စွပ်စွဲမယ့်အစား "ရှင့်ရဲ့ အပြောအဆို/လုပ်ရပ်က သူများကို အထင်သေးသလို ဖြစ်နေတယ်" လို့ ပြောပါ။

၁၀။ ကိုယ့်ရဲ့ ကိုယ့်ကိုယ်ကို တန်ဖိုးထားမှုကို ခိုင်မာစေပါ။

မာနကြီးသူတွေက သူများရဲ့ ကိုယ့်ကိုယ်ကို ယုံကြည်မှု (Self-worth) ကို လျှော့ချဖို့ ကြိုးစားတတ်ပါတယ်။

သူတို့ပြောတာတွေကြောင့် ကိုယ့်ရဲ့ တန်ဖိုးကို မထိခိုက်စေဖို့ ကိုယ့်ကိုယ်ကို အားပေးပြီး ယုံကြည်ချက်ကို ခိုင်မာအောင် ထားရှိပါ။

Crd…,

#တိတ်တိတ်လေးနေပါ

ကိုယ်နာကျင်ဝမ်းနည်းတဲ့အခါ တိတ်တိတ်လေးငိုပါ…ငိုသံတွေ ကျယ်လောင်တဲ့အခါ.. စာနာသနားတဲ့စိတ်နဲ့ ကရုဏာသက်မယ့်သူထက်.. ဝမ်းသာအားရစောင့်ကြည့်တတ်သူက ပိုတတ်လို့ပါ…

ကိုယ်ပျော်ရွှင်တက်ကြွနေတဲ့အခါ တိတ်တိတ်
ကလေးပျော်ပါ..
ဆူဆူညံညံပျော်ရွှင်ပြတဲ့အခါ…လောကကြီးထဲ အဆင်မပြေမှုတွေ.. ဒဏ်ရာတွေနဲ့ ကြေကွဲဝမ်းနည်းသူတွေအပေါ် အလိုက်မသိရာရောက်လို့ပါ…

ကိုယ်အောင်မြင်အဆင်ပြေနေတဲ့အခါ.. ကြွားကြွားဝါဝါတွေ ထုတ်ဖော်ပြသမနေဘဲ တိတ်တိတ်ကလေး အောင်မြင်မှုကို ခံစားပေးပါ…
ကျယ်ကျယ်လောင်လောင် အောင်မြင်အဆင်ပြေပြတဲ့အခါ…ဘဝမှာ ရှုံးနိမ့်မှုတွေ.. ရုန်းကန်မှုတွေကြားထဲ ရှင်သန်နေရတဲ့သူတွေအပေါ် မစာနာရာရောက်လို့ပါ…

ကိုယ့်တစ်ကိုယ်စာလေးလုံခြုံနွေးထွေးနေပေမယ့်…မလုံခြုံတဲ့ဘဝတွေကိုစာနာပေးခြင်းဟာ လူသားဆန်တဲ့ နှလုံးသားရဲ့ဂီတသံတစ်ခုဖြစ်ပါတယ်…

တိတ်ဆိတ်ခြင်းဟာ ကျယ်လောင်ခြင်းထက် ပိုပြီးသိမ်မွေ့နက်ရှိုင်းပါတယ်…
လေးနက်ပါတယ်…
ကိုယ့်ဘဝရဲ့ အဆင်ပြေခြင်း အဆင်မပြေခြင်းတွေဟာ ကိုယ်နဲ့ပဲသက်ဆိုင်ပါတယ်…
ပျော်ရွှင်ခြင်းမပျော်ရွှင်ခြင်းဟာလည်း ကိုယ့်မှာသာ တာဝန်ရှိပါတယ်…
ဘဝကပေးလာတဲ့ လက်ဆောင်တိုင်းကို တိတ်တိတ်လေးသာ ဖွင့်ဖောက်ခံစားပါ။ လူတိုင်းသိဖို့ မလိုအပ်ပါဘူး…
နာကျင်နေတာဖြစ်ဖြစ်.. ပျော်ရွှင်နေတာပဲဖြစ်ဖြစ် တိတ်တိတ်လေးသာနေပါ…

Crd to လွန်းထားထား