Rubi, Jeanet

DSWD XII, SINIGURONG MAKAKATANGGAP NG AYUDA MULA SA AHENSYA ANG LAHAT NG MGA KWALIPIKADONG TRICYCLE DRIVERS

Tiniyak ng Department of Social Welfare and Development Region 12 na lahat ng kwalipikadong drivers ay makakatanggap ng ayuda sa ilalim ng Assistance to Individuals in Crisis Situations o AICS program, kasunod ng epekto ng patuloy na pagtaas ng presyo ng langis.

Sa panayam ng Radyo BIDA kay DSWD - XII Regional Information Officer Dennis Domingo, inihayag nitong ₱5,000 ang ibibigay na tulong pinansyal para sa bawat rehistradong drivers.

Ayon kay Domingo, uunahin lang muna sa ngayon ang mga tricycle drivers sa lungsod sapagkat mayroon na silang organisasyon at mas mapapabilis ang pamamahagi sa kanila.

Gayunpaman, isasama sa mga susunod na rollout ang iba pang sektor ng mga Public Utility Vehicle (PUV) tulad ng jeepney, multicab at traysikad drivers sa patuloy na pakikipag-ugnayan ng ahensya sa iba’t-ibang tanggapan ng pamahalaan.

Samantala, nakatakdang simulan ang pamamahagi ng ayuda sa April 8, 2026, pagkatapos ng Semana Santa, kung saan unang makikinabang ang mga malalaking lungsod, tulad ng Kidapawan, Gensan, Tacurong CIty at Koronadal City bago sunod-sunod na isagawa sa iba pang munisipalidad ng rehiyon.

Binigyang diin naman ng opisyal na kinakailangan ng mga driver na magsumite ng kaukulang dokumento tulad ng valid driver’s license, at sertipikasyon mula sa kanilang lokal na pamahalaan, na magsisilbing basehan sa pagbuo ng listahan ng mga benepisyaryo.

Igiinit ng DSWD na direktang mapupunta sa mga driver ang ayuda, at hindi sa operator, basta’t sila ay may valid na prangkisa at kumpletong papeles.

Sa ngayon, hinihintay pa ang mga susunod na desisyon kung maisasama rin ang iba pang mga sektor tulad ng mga empleyado na apektado rin ng kasalukuyang krisis, sapagkat ang AICS program ay para sa lahat ng mga Pilipinong nangangailangan.