Apna Paroa News Tv

گورنمنٹ ڈگری کالج پروآ میں سیرتِ نبوی ﷺ پر منفرد علمی سیمینار
’’The Prophet’s Seerah as an Interdisciplinary Research Framework‘‘ کے موضوع پر فکری و تحقیقی نشست، طلبہ و طالبات کی بھرپور شرکت

پروآ گورنمنٹ ڈگری کالج پروآ میں شعبہ اسپورٹس اینڈ فزیکل ایجوکیشن کے زیرِ اہتمام سیرتِ طیبہ ﷺ کے موضوع پر ایک منفرد، علمی اور فکری سیمینار منعقد ہوا، جس کا مرکزی عنوان “The Prophet’s Seerah as an Interdisciplinary Research Framework” تھا، جبکہ سیمینار کے بنیادی مباحث میں Humanities، Social Sciences، Ethical Leadership، Human Transformation، Social Change اور Peace Building جیسے اہم موضوعات کو سیرتِ نبوی ﷺ کے تناظر میں زیرِ بحث لایا گیا۔
سیمینار کے آغاز میں شعبہ اسپورٹس اینڈ فزیکل ایجوکیشن کے طالب علم عارف بلال نے بحیثیت کمپئیر فرائض انجام دیتے ہوئے پروگرام کو نہایت خوبصورت، باوقار اور مربوط انداز میں آگے بڑھایا۔ تقریب کا باقاعدہ آغاز تلاوتِ کلامِ پاک سے ہوا، جس کی سعادت شعبہ اسپورٹس اینڈ فزیکل ایجوکیشن کی طالبات نے حاصل کی، جبکہ اس کے بعد بارگاہِ رسالت مآب ﷺ میں نذرانۂ عقیدت پیش کیا گیا۔
سیمینار کا سب سے اہم اور مرکزی مرحلہ ہیڈ آف دی ڈیپارٹمنٹ اسپورٹس اینڈ فزیکل ایجوکیشن پروفیسر ڈاکٹر نیاز احمد حسین کا خصوصی خطاب تھا، جو بطور Keynote Speaker شریک ہوئے۔ ڈاکٹر نیاز احمد حسین نے سیرتِ رسولِ اکرم ﷺ کو محض ایک تاریخی واقعہ یا روایتی موضوع کے طور پر پیش کرنے کے بجائے اسے ایک جامع تحقیقی، انسانی، سماجی اور اخلاقی فریم ورک کے طور پر اجاگر کیا۔
اپنے منفرد علمی انداز میں انہوں نے واضح کیا کہ سیرتِ طیبہ ﷺ انسانی شخصیت کی تعمیر، اخلاقی قیادت، معاشرتی اصلاح، برداشت، امن، عدل، بین الانسانی تعلقات اور اجتماعی تبدیلی کے ایسے اصول فراہم کرتی ہے جو آج کے جدید علمی اور سماجی مباحث میں بھی رہنمائی کا ذریعہ بن سکتے ہیں۔ ان کا خطاب روایتی اندازِ بیان سے ہٹ کر اس امر پر مرکوز رہا کہ سیرتِ نبوی ﷺ کو صرف پڑھا نہ جائے بلکہ اسے تحقیق، کردار، قیادت اور معاشرتی زندگی کے عملی اصول کے طور پر سمجھا جائے۔
سیمینار میں اس امر پر بھی زور دیا گیا کہ آج کی نوجوان نسل اگر سیرتِ رسول ﷺ کو محض تقریروں اور تقریبات تک محدود رکھنے کے بجائے اسے اپنی عملی زندگی، تعلیمی تحقیق، کردار، رویوں اور معاشرتی ذمہ داریوں کا حصہ بنائے تو معاشرے میں مثبت تبدیلی کی بنیاد رکھی جا سکتی ہے۔
تقریب کے اختتام پر پرنسپل گورنمنٹ ڈگری کالج پروآ کی جانب سے سیمینار میں حصہ لینے والے طلبہ و طالبات میں تحائف تقسیم کیے گئے، جبکہ سیمینار کے مرکزی مقرر پروفیسر ڈاکٹر نیاز احمد حسین کو بھی بطورِ اعترافِ خدمات اعزازی شیلڈ پیش کی گئی۔
شرکاء نے سیمینار کو ایک بامقصد اور فکری نوعیت کی علمی سرگرمی قرار دیتے ہوئے کہا کہ تعلیمی اداروں میں اس نوعیت کے پروگرام وقت کی اہم ضرورت ہیں، کیونکہ کالج اور یونیورسٹیاں صرف ڈگریاں دینے کے مراکز نہیں بلکہ کردار سازی، فکری تربیت اور ذمہ دار نسل تیار کرنے کے مراکز بھی ہیں۔
ضرورت اس امر کی ہے کہ نوجوان نسل کو سیرتِ نبوی ﷺ سے جوڑنے کے لیے ایسے پروگرام محض مخصوص مواقع تک محدود نہ رکھے جائیں بلکہ انہیں مستقل علمی و تحقیقی سرگرمیوں کا حصہ بنایا جائے، تاکہ سیرتِ طیبہ ﷺ کتابوں کے صفحات اور تقریبات کے اسٹیج سے نکل کر نوجوانوں کے کردار، فکر، اخلاق اور عملی زندگی میں جلوہ گر ہو۔
گورنمنٹ ڈگری کالج پروآ میں منعقد ہونے والا یہ سیمینار اسی فکری سفر کی ایک خوبصورت کڑی ثابت ہوا، جہاں سیرتِ نبوی ﷺ کو عقیدت کے ساتھ ساتھ تحقیق، علم، انسانیت، اخلاقی قیادت اور امنِ عالم کے ایک جامع علمی زاویے سے سمجھنے کی کوشش کی گئی۔

منگنی کی خوشی، حبیب اللہ خان ناصر کو دل کی گہرائیوں سے مبارکباد

مبارک ہو تم کو یہ منگنی تمہاری،
سدا خوش رہو، یہ دعا ہے ہماری۔

ہمارے پیارے بھائی جیسے دوست اور میڈیا رپورٹر حبیب اللہ خان ناصر کو منگنی کی خوشی پر دل کی اتھاہ گہرائیوں سے مبارکباد پیش کرتے ہیں۔

دعا ہے کہ اللہ تعالیٰ اس نئے رشتے کو محبت، خوشیوں اور برکتوں سے بھر دے، دونوں خاندانوں کے لیے یہ رشتہ باعثِ رحمت و مسرت بنے اور آنے والی زندگی خوشیوں سے معمور ہو۔

منجانب: دوست احباب و اہلِ علاقہ

ویلج ماہڑہ — سابقہ چیئرمین ویلج کونسل ماہڑہ و رہنما پاکستان تحریک انصاف سردار ملک عبدالکریم طاہر خیل نے ایک اور مثالی قدم اٹھاتے ہوئے تین گروپوں کے درمیان دیرینہ تنازعہ کو دوستی میں تبدیل کر دیا*

تفصیلات کے مطابق ویلج ماہڑہ میں تین فریقین کے درمیان زمینی اور ذاتی رنجشوں پر کافی عرصہ سے تنازعہ چلا آ رہا تھا۔ سابقہ چیئرمین سردار ملک عبدالکریم طاہر خیل کی مسلسل کوششوں اور مخلصانہ کردار کی بدولت فریقین کو ایک جرگہ میں اکٹھا کیا گیا۔

جرگہ میں سردار ملک عبدالکریم طاہر خیل نے قرآن و سنت کی روشنی میں صلح کی اہمیت پر روشنی ڈالی اور فریقین کو بھائی چارے کا درس دیا۔ جس پر تینوں گروپوں نے اپنی رنجشیں ختم کرنے اور آئندہ بھائیوں کی طرح رہنے کا اعلان کیا اور ایک دوسرے سے گلے مل کر دوستی کا عہد کیا۔

مقامی عمائدین اور اہل علاقہ نے سردار ملک عبدالکریم طاہر خیل کے اس اقدام کو خوب سراہا اور کہا کہ ایسے لوگ معاشرے میں امن کی ضمانت ہیں۔

اس موقع پر صلح کی خوشی میں ایک پرتکلف عشائیہ کا بھی اہتمام کیا گیا۔ اہل علاقہ کی جانب سے سردار ملک عبدالکریم طاہر خیل کی امن دوست کاوشوں کے اعتراف میں انہیں روایتی *لنگی (پگڑی)* بھی پہنائی گئی اور پھولوں کے ہار پہنائے گئے۔

آخر میں ملک کے لیے امن و امان اور علاقے میں بھائی چارے کے قیام کے لیے خصوصی دعا بھی کی گئی۔

ویلج کونسل گھمسان، رمک اور میرن میں صفائی مہم جاری

تحصیل پروا کی ویلج کونسل گھمسان، رمک اور میرن میں صفائی ستھرائی مہم بھرپور انداز میں جاری ہے۔ ویلج سیکرٹری انور شاہ استرانہ کی نگرانی میں صفائی عملہ گلیوں، بازاروں اور عوامی مقامات کی صفائی میں مصروف ہے۔

عیدالاضحیٰ کے موقع پر بھی صفائی عملے نے اپنی ذمہ داریاں احسن انداز میں نبھاتے ہوئے کوڑا کرکٹ کی بروقت تلفی اور صفائی کے انتظامات کو یقینی بنایا۔ مقامی شہریوں نے صفائی مہم کو سراہتے ہوئے کہا کہ علاقے میں صفائی کی صورتحال پہلے سے بہتر ہوئی ہے۔

ویلج سیکرٹری انور شاہ استرانہ نے کہا کہ عوام کو صاف ستھرا ماحول فراہم کرنا ہماری اولین ترجیح ہے اور صفائی مہم مستقل بنیادوں پر جاری رکھی جائے گی۔(رضوان بلوچ)

ہماری طرف سے تمام اہل اسلام کو عید الاضحی بہت بہت مبارک ہو
منجانب: معتصم خان کٹی خیل