Drood pak

مجھ کو فرصت ہی کہاں موسم سہانا دیکھوں،
میں تیری ذات سے نکلوں تو زمانہ دیکھوں،

سلام بحضورِ تشنہ کامانِ کربلا

بس اب تو رہتے ہیں آنکھوں میں اَشک آئے ہوئے
زمانہ بِیت گیا ہم کو مُسکرائے ہوئے
غمِ حُسینؓ کا گھاؤ ہے کِس قدر گہرا
یہ اُن سے پُوچھ جو ہیں دِل پہ چوٹ کھائے ہوئے
نبیؐ کے گھر کے اُجالوں کا اب خدا حافظ
اندھیرے شامِ ستم کے ہیں سر اُٹھائے ہوئے
لگی ہے بھیڑ غم و رنج و درد و کُلفت کی
ہم اپنے دِل میں ہیں اِک کربلا بسائے ہوئے
عجیب وقت ہے زہراؓء کے گُل عِزاروں پر
سکینہؓ پیاسی ہے، اصغرؓ ہیں تیر کھائے ہوئے
یہ ناتوانی، یہ رستے کی سختیاں سجادؓ !
چلو گے کیسے بھلا بیڑیاں اُٹھائے ہوئے
نمازِ عشق کی یہ طُرفگی کوئی دیکھے
حُسینؓ سجدے سے اُٹھے تو سر کٹائے ہوئے
شکست دے نہ سکی عزمِ ابنِ حیدرؓ کو
اجل کھڑی ہے ندامت سے منہ چُھپائے ہوئے
سبب خموشی کا پوچھا گیا جو زینبؓ سے
تو رو کے بولیں کہ ناناؐ ہیں یاد آئے ہوئے
یہ شب کہیں شبِ عاشُور تو نہیں لوگو
اُداس چاند ہے تارے ہیں جِھلملائے ہوئے
پلٹ کے آئے نہ اب تک مِرے چچا عبّاسؓ
سکینہؓ روتی ہے دستِ دُعا اُٹھائے ہوئے
نڈھال کر گئی اصغرؓ کی آخری ہچکی
حُسینؓ خمیے میں لائے کمر جُکھائے ہوئے
بھٹک رہی ہے ابھی تک تلاش میں منزل
گُزر گیا ہے کوئی کارواں لُٹائے ہوئے
وہ حق پرست سرِ منزلِ وفا پہنچے
خدا کی یاد کو زادِ سفر بنائے ہوئے
ہم اہلِ دل ہیں، ہمیں اہلِ زر سے کیا مطلب
ہم اپنے شاہِؓ نجف سے ہیں لَو لگائے ہوئے
نصؔیر ! گُلشنِ زہراؓء کے پیاسے پُھولوں کو
سَلام کہتے ہیں آنکھوں میں اَشک آئے ہوئے

فرمُودۂ الشیخ پِیر سیّد نصِیرالدّین نصؔیر جیلانی الحَسنی والحُسینی رحمتُ اللّٰه تعالٰی علیہ، گولڑہ شریف