MAY in Purple

ဆယ်တန်း (တက္ကသိုလ်ဝင်တန်း) အောင်စာရင်း ထွက်တဲ့နေ့မှာ ရင်ခုန်စိတ်လှုပ်ရှားနေကြမယ့် မောင်လေးတွေ ညီမလေးတွေအားလုံးကို မေတစ်ခု ပြောပြချင်ပါတယ်။
စာမေးပွဲဆိုတာ ဘဝရဲ့ အောင်မြင်မှု၊ ကျရှုံးမှုကို အပိုင်တွက်ပေးနိုင်တဲ့ အရာတစ်ခု မဟုတ်ပါဘူး။ ဒါဟာ ဖြတ်ကျော်ရမယ့် အဆင့်တစ်ခုထက် မပိုပါဘူး။ မေ ကိုယ်တိုင်လည်း အသက် ၁၉ နှစ်၊ ဘာဆိုဘာမှ မရှိသေးတဲ့ အရွယ်ကတည်းက ကိုယ်မြတ်နိုးတဲ့ ဝါသနာတစ်ခုတည်းကိုပဲ စွဲစွဲလမ်းလမ်းနဲ့ ဒီနေ့အထိ ၁၁ နှစ်တိုင်တိုင် အကောင်းဆုံး လျှောက်လှမ်းလာခဲ့တာပါ။ အဲ့ဒီတုန်းက ဘဝမှာ အောင်မြင်ရေးလမ်းညွှန်ဆိုတာ မရှိခဲ့သလို၊ ဘယ်လမ်းက အမှန်ဆုံးလဲဆိုတာလည်း ဘယ်သူမှ ကြိုမသိနိုင်ခဲ့ပါဘူး။
တကယ်တော့ ဘဝဆိုတာ ကိုယ်ကောင်းမယ်ထင်တဲ့ လမ်းကို ရဲရဲဝံ့ဝံ့ ရွေးချယ်ပြီး ကြုံလာတဲ့ အခက်အခဲတွေကို ဖြေရှင်း၊ အခွင့်အရေးတွေကို ရအောင်ယူရင်း အနိမ့်အမြင့်၊ အတက်အကျတွေကြားထဲ ရှေ့ဆက်ရတဲ့ ခရီးရှည်ကြီးတစ်ခုပါ။ နောက် ၁၀ နှစ်လောက် ကြာသွားတဲ့အခါ အခုရခဲ့တဲ့ အမှတ်တွေ၊ ရလဒ်တွေဟာ ဘာမှ အရေးမကြီးတော့တဲ့ အရာတစ်ခု ဖြစ်သွားလိမ့်မယ်ဆိုတာ မေ ရဲရဲကြီး အာမခံရဲပါတယ်။

ဒါကြောင့် အောင်စာရင်း ရလဒ်က ဘယ်လိုပဲဖြစ်ဖြစ်... အောင်တဲ့သူတွေလည်း မိမိကိုယ်ကို ယုံကြည်မှုအပြည့်နဲ့ အကောင်းဆုံး ဆက်လျှောက်ပါ။ ရလဒ်မကောင်းခဲ့ရင်တောင် ဒါဟာ ဘဝရဲ့ အဆုံးသတ် မဟုတ်ဘူးဆိုတာ သတိရပြီး ထပ်ကြိုးစားပါ။ စာမေးပွဲတစ်ခုရဲ့ ရလဒ်က မောင်လေးတို့ ညီမလေးတို့ရဲ့ ဘဝလမ်းကြောင်းတစ်ခုလုံးကို အဆုံးအဖြတ် မပေးနိုင်ပါဘူး။

ကိုယ်လျှောက်ရမယ့် လမ်းကိုသာ ဇွဲမလျှော့တမ်း အကောင်းဆုံး ဆက်လျှောက်သွားရင် တစ်နေ့မှာ ကိုယ်ပိုင် နေရာတစ်ခု၊ ကိုယ်ပိုင် နာမည်တစ်ခုနဲ့ အောင်မြင်မှုက သေချာပေါက် ရောက်လာမှာပါ။
အားလုံးပဲ အနာဂတ်လမ်းခရီးမှာ စိတ်ခွန်အားအပြည့်နဲ့ ရှေ့ဆက်နိုင်ကြပါစေရှင်။